DEER 6
Uw Rogon ni Nggu Siyeg e Towasar ko Pi Taab Yangar Rog?
MANG E GA RA RIN’?
Mu susunnag e re n’ey: Nap’an ni guy Brian l’agruw i bitir ni yad nga skul ni yow be yib i yib ko gin bay riy, ma aram me pig ban’en u yin. Ke gaman l’agruw yay u lan e re wik ney ni yow be towasariy ni nge un ko mathoy tamagow. Ma ireray e yay ni dalip ngay.
Me gaar e bin som’on e pagel:
“Yigoo gur bayay? Son nggu pi’ ban’en ngom.”
Ma aram me t’ar owchen me fek ban’en u paketo rok nga but’ nge pi’ ngak Brian.
Nap’an ni sap Brian me guy nib tamagow, ma aram miki gel boch e marus rok.
Me gaar Brian, “Siro’, ku gog ngomew faram nda gur ma . . . ”
Me non e bin migid e pagel ni gaar: “Kayog e marus rom!”
Me athamgil Brian ni nge gaar: “Da gur rus!”
Me yan i palayeg fa bin migid e pagel ngak Brian, me gaar, “Mu fek e re n’ey.”
Me chugurnag e bin som’on e pagel fare tamagow nga owchen Brian me sakathkath ngak ni be gaar: “Dab gognew ngak be’. Maku dariy be’ nra nang.”
Faanra gur Brian, ma mang e ga ra rin’?
MU TAL NGAM LEM!
Gur, ke fal’eg i lemnag e gal taab yangar rok Brian nem e n’en ni yow be rin’? Ma gur, yow rorow e yow be dugliy e n’en ni ngar rin’ew? Ba mudugil ni danga’. Bin riyul’ riy e, kar pagew e lem nge ngongol ko girdi’ ni nge gagiyegnag e n’en yow be rin’. Yow baadag ni ngan adag dakenrow, ere aram fan ni yow be pag e girdi’ ni nge gagiyegnag e n’en yow be rin’.
Faanra ke buch ban’en rom ni aray rogon, ma uw rogon ni ga ra dugliy ban’en nib thil mag siyeg e towasar ko pi taab yangar rom?
-
MU LEMNAG E N’EN NRAYOG NI NGE BUCH
Be gaar e Bible: “Be’ nib gonop e ra guy e oloboch ni be yib me pilo’ riy, machane piin nib balyang e darir pilo’gad riy, me yan i tomur mi yad kolngan’rad.”—Proverbs 22:3.
Ba ga’ nib mom ni ngam guy e magawon ni be yib. Bod ni, susun e kam guy ba ulung i bitir ni gimed nga skul u palog ni yad be thoy e tamagow. Faan ga ra lemnag e magawon nrayog ni nge sum riy, ma aram e rayog ni ngam nang e n’en ngam rin’.
-
MU LEM
Be gaar e Bible: “Mpired ndariy ban’en ni be methan’med ngay.”—1 Peter 3:16.
Mu fithem ni nge lungum, ‘Faan gu ra un i rin’ e n’en ni be rin’ e pi taab yangar rog, ma ra tomur riy ma mang e gu ra lemnag?’ Riyul’ nsana yira adag dakenam u taa bochi ngiyal’, machane ra tomur riy ma mang e ra um lemnag? Ba m’agan’um ngay ni ngam pag fan e tin nib ga’ fan mab mich u wan’um ni bochan e ngam fel’ u wan’ e bitir ni gimed nga skul, fa?—Exodus 23:2.
-
MU DUGLIY BAN’EN
Be gaar e Bible: “Girdi’ nib sul laniyan’ ngak e yad ma guy rogon ni ngar pired u orel ko oloboch.”—Proverbs 14:16, BT.
Ra yan i tomur ma gad gubin nib t’uf ni ngad dugliyed e n’en ngad rin’ed, ma angin ara wenegan e gadad e ra yib ngodad. Be weliy e Bible murung’agen boch e pumoon ni bod Josef, nge Job, nge Jesus nib fel’ e n’en nra dugliyed. Ku be weliy murung’agen Kain, nge Esau, nge Judas nib kireb e n’en nra dugliyed. Ere mang e ga ra rin’?
Be gaar e Bible: “En nib yul’yul’ u murung’agen e tin ni ba achig ban’en e ku ra par nib yul’yul’ u murung’agen e tin ni ba ga’ ban’en.” (Luke 16:10) Faanra kam mu’ i lemnag wenegan e n’en nra buch ma kam dugliy lanin’um, ma aram e ra mom ni ngam weliy e n’en kam dugliy, ma ra yib angin.
Dabi magafan’um ya de t’uf ni ngam weliy boor ban’en ko pi taab yangar rom. Rayog ni kemus ni nge lungum, DANGA’. Mog ban’en ni nge m’ug riy ni karim dugliy e tafinay rom ndab mu thilyeg. Rayog ni ngam gaar:
-
“Dab mu unegeg ngay!”
-
“Da gur ma rin’ e tin!”
-
“Dab gu rin’ e re n’ir!”
N’en ngam rin’ e ngam gur nga mog ban’en u fithik’ e pagan’. Faan ga ra rin’ ni aray rogon, ma rayog ni ngam gin nga feni papey nra tal e pi taab yangar rom ndab kur towasariyed gur!
N’EN NGAM RIN’ U NAP’AN NI YIRA MONINGNAGEM
Faan ga ra pagem ko towasar ko pi taab yangar rom, ma aram e ga ra bod ba masin ni yad e yad be gagiyegnag e n’en nge rin’
Uw rogon ni faanra be moningnagem e pi taab yangar rom? Uw rogon ni faanra lungurad, “Mang e kam rin’, ga be rus?” Ngam nang ni mit ney e moning e kub mit e towasar ni ma yib ko pi taab yangar rom. Ere mang e rayog ni ngam rin’? L’agruw ban’en nrayog ni ngam rin’.
-
Rayog ni ngam gaar: “Riyul’ ni gu be rus!” Ngemu’ mag weliy fan ndabum ni ngam rin’ e re n’em.
-
Ku rayog ni ngam ayuwegrad ni nge puluw rogon ni ngar lemnaged fare n’em. Mu weliy fan ndabum ni ngam rin’ e re n’em, me lungum, “Gu be gin ngay ni be’ nib llowan’ ni bodem e baadag ni nge un ko mathoy tamagow!”
Faanra ulul e pi taab yangar rom ni ngar moningniged gur, ma aram e rayog ni ngam man ngam chuw! Dab mu pagtalin ni faanra n’uw nap’an nim par rorad, ma aram e ra gel e towasar ni yira tay ngom. Ga ra chuw ma aram e kam dag ni damur pag be’ ni nge thilyeg e tin nib ga’ fan mab mich u wan’um.
Bin riyul’ riy e, dabiyog ni ngam mith ko towasar. Machane rayog ni ngam dugliy e n’en ngam rin’, mag weliy lanin’um, mag gagiyegnag e n’en ngam rin’. Ra tomur riy me gur e ba milfan ngom e n’en ngam dugliy!—Joshua 24:15.
