Bixuiʼlú ndiʼ: dede guʼsa ti yuubaʼ ndaaniʼ Brian ora biʼyaʼ zedadxiña chupa de ca xcompañeru ra nuu. Maʼ chupa biaje gúdxicabe laabe cúbabe gueza semana riʼ. Ne raríʼ guizaa ni chonna.

Tobi de laacabe ná:

Gulee hombrehuiiniʼ riʼ xiixa cueʼ bolsa stiʼ, ne biʼniʼ ti seña lú Brian ora cudii ni laabe.

Ora biʼyaʼ Brian nuu ti gueza lade bicuinináʼ hombrehuiiniʼ que la? jmaruʼ si guyuu yuubaʼ ndaanibe.

Xi ñuʼnuʼ, pa ñácaluʼ Brian.

Raʼbuʼ nanna ca xcompañeru Brian xi cayúnicaʼ la? O stubisícabe nga gucuaacabe decisión cúbacabe gueza. Zándaca coʼ. Xiñee yaʼ. Purtiʼ zándaca cayúnicabe ni runi xcaadxi xcompañérucabe. Rápacabe gana chúʼcabe lu grupu sticaʼ, nga runi rúnicabe ni ná xcaadxi.

Pa ñuuluʼ lugar stiʼ Brian, xi sti cosa ñuuláʼdxiluʼ ñuʼnuʼ para guni huantarluʼ presión de grupu.

1. GUYUU LISTU

   Sicaríʼ na Biblia: «Binni nuu xpiaaniʼ la? rucaachilú ora guʼyaʼ maʼ zeeda xiixa guendanagana ni zuniná laa, peru ni cadi nuu xpiaaniʼ la? runi guiráʼ ni racalaʼdxiʼ ne racaná» (Proverbios 22:3).

   Nuu biaje rudii binni cuenta ora maʼ zeeda ti problema. Bixuiʼlú zeluʼ ndaaniʼ ti neza, málasi biiyaluʼ ti grupu de joven caguʼbaʼ gueza. Pa dede ante guiníʼ íqueluʼ xi guʼnuʼ la? ziuuluʼ listu para gudxiiluluʼ situación riʼ.

2. GUNÍʼ IQUE

   Biblia ná, lagapa ti conciencia nayá (1 Pedro 3:16).

   Gunabadiidxaʼ laca lii: «Ximodo zuneʼ sentir pa chinandaʼ ni runi xcaadxi binni». Zándaca zaná ca xcompañéruluʼ guidxaagacaʼ lii, peru ti tiempu si. Ximodo zuni sentirluʼ despué yaʼ. Ñee zuchaaluʼ modo lii para si guiaanuʼ bien né ca xcompañéruluʼ la? (Éxodo 23:2).

3. GUDIXHE XI GUʼNUʼ

   Biblia ná: «Binni nuu xpiaaniʼ la? ridxibi ne rixeleʼ de ca cosa malu» (Proverbios 14:16).

   Zadxiña dxí zaguixhe íqueluʼ xi guʼnuʼ, pa guiree ni jneza o coʼ la? naquiiñeʼ gudxiiluluʼ ni. Biblia ruzeeteʼ de caadxi hombre ni biʼniʼ ni jneza, casi José, Job ne Jesús, peru laaca ruzeeteʼ ni de xcaadxi ni qué ñuni ni jneza, casi Caín, Esaú ne Judas. Lii yaʼ, xi guʼnuʼ.

Biblia cayabi laanu guzúʼbanu stiidxaʼ Dios (Salmo 37:3). Pa maʼ guníʼ íqueluʼ xi chiguidxaagaluluʼ pur ni gudixhe íqueluʼ la? jma nagueenda zannuʼ xipeʼ nga racaláʼdxiluʼ. Ne nga nga ni jma galán.

Cadi guizaalaʼdxuʼ, cadi caquiiñeʼ peʼ gusiene chaahuiluʼ ca xcompañéruluʼ. Gudxi laacabe qué zanda diʼ ne biluxe diidxaʼ. Bisihuinni qué zuchaaluʼ modo riníʼ íqueluʼ ne gudxi laacabe:

• «Cadi cuʼluʼ naa lu grupu stiuʼ».

• «Qué rúnediaʼ ca cosa ca».

• «Maʼ nannuʼ xi riníʼ iqueʼ».

Caquiiñeʼ guicábiluʼ nagueendaca ne gusihuínniluʼ qué zuchaa modo riníʼ íqueluʼ. Pa guʼnuʼ zacá la? zándaca dede zadxagayaaluʼ pabiáʼ nagueenda zusaana de guni presionar ca xcompañéruluʼ lii.

Zándaca gusituí ca xcompañéruluʼ luluʼ. Ne gábicaʼ lii: «Xi cayaʼcuʼ pue. ¡Cadi guidxíbiluʼ xombre!». Ndiʼ nga ca diidxaʼ jma riquiiñecabe lu presión de grupu. Xi zanda guʼnuʼ yaʼ. Napuʼ chupa opción:

• Chinanduʼ lu xtoocabe. Ñanda niniʼluʼ: «Napuʼ razón, ridxibeʼ nga runi». Despué bisiene laabe xiñee peru né chupa chonna si diidxaʼ.

• Biʼniʼ sti cosa. Bisiene xiñee qué ruʼnuʼ ni ne gudxi laabe: «Ti binni nuu xpiaaniʼ casi lii la? qué niguʼbaʼ gueza».

Pa qué chuʼdxícabe la? biree de ra nuucabe. Bietenalaʼdxiʼ: pa guiaanuʼ ra nuucabe xadxí la? jma nagueenda ziabaluʼ lu presión ca. Peru pa guireeluʼ la? zusihuínniluʼ lii nga nannuʼ xi guʼnuʼ.

Cadi guiaandaʼ laanu: qué zanda diʼ cueenu presión de grupu. Peru zanda gúʼyanu xi gúninu, gusiénenu xii nga riníʼ íquenu ne guni controlarnu situación ca. Lii nga nannuʼ xi naquiiñeʼ guʼnuʼ (Josué 24:15).