Nyaku ma nyinge Annette upoi ma dong’ ng’atu m’ubemake ku kero pi tarwang’ uredhe i ng’om. Ekoro kumae: “Atimo kero para ceke pi nivoye. Apimo nigoyo nduru de, re ng’atu moko mbe m’uwinjo dwanda. Acwale, anyone, agoye ngumi man agware; ing’eye, apoi m’edhuya ku pala, e kero para ugam uthum.”

Ka nwang’u inweng’iri ku kit lembe m’utimo Annette, nwang’u icopo timo ang’o?

Kadok nwang’u idaru niyikiri pi nibedo ku weng’i kinde m’ibewotho uthieno, lembe marac copo niwok asu. Biblia uwacu kumae: “Jung’wec sagu gin ungo i kwaya . . . kadi bero de jubodho nwang’u gin ungo; ku ba dhanu ceke ng’atuman bedo ku nindo pare man gagi ma podho ire.”—Eklizia 9:11.

Calu Annette, aradu moko ju ma makugi ku kero gitie ju ma jung’eyogi ngo. Aradu mange ke, ju ma makugi gitie ju ma jung’eyogi kunoke wat migi. Ku lapor, jalawobi moko m’ubino nikwo ceng’ni ku pagi Natalie umake nwang’u Natalie utie ku oro apar kende. Natalie ukoro kumae: “Abino ku lworo man lewic, uketho ayero ngo lembene ni ng’atu moko”.

Cwiny Annette bedieng’ asu nia ve en re m’eweko lembe ugam unwang’e. Ekoro kumae: “Lembe m’ukadhu i diewor nica bedwogo i wia kendo kendo. Abed aparu nia nwang’u atim kero lee akeca kara avoye. Re i andha, kinde m’edhuya ku pala, lworo umaka magwei. Gin mange m’acopo timo ubino mbe, ento abed aparu nia nwang’u acikara nitimo lembe moko.”

Natalie bende benwang’u nia ve en re m’eketho lembe unwang’e. Ekoro kumae: “Nwang’u cing’ kud abed ku genogen iwi dhanu swa. Junyodo para giketho cik nia wabed watuki karacelo waku nyamira ka wani lela, ento awinjo ngo. Pieno, anwang’u nia an re m’aweko kaka ni jadhugola mwa nitimo lembe marac i kuma. Lembene unyayu can i jufwa, man abed anwang’u nia an re m’anyayu can i cwinygi. Lembuno dong’ nyayu can i cwinya magwei.”

Ka in de itie ku pidoic ma calu pa Annette kunoke pa Natalie, lembe mi kwong’o m’ukwayu iketh i paru peri utie nia ng’atu ma jumaku ku kero utimo ngo lembe mir akakaka. Pi niumo wi lembe mi mak ma ku kero, dhanu moko giwacu nia jumaco gikumeno, kunoke nia ka jumaku nyaku moko nwang’u en re m’eyenyo. Re ng’atu moko mbe m’uromo nia jumake ku kero. Ka in de judaru meki ku kero, ng’ei nia etie kosa peri ngo!

Nisomo wec m’uyero, “etie kosa peri ngo” utie lembe ma yot, ento niyio lembene copo bedo yot ungo. Jumoko ginyutho ngo pi mak ma jumaku kogi ku kero, pieno pidocwiny dong’ sendogi lee ing’eye man gicaku bedo bende ku pidoic mange ma cuu ngo. Ento kan ibedo ling’ iwi lembene, ng’a ma binwangu berone, nyo in kunoke ng’atu m’umeki ku kero? Icikiri nitimo lembe mange.

Biblia uweco pi won bedopwe ma nyinge Yob; kinde m’ebino kud ang’abacwiny eyero kumae: “Abiweco [pi can] mi ng’eyong’ec para!” (Yob 10:1) In bende kan itimo kumeno, icopo nwang’u bero. Kor lembene ni ng’atu m’igeno; eno copo konyi kara kud ipar iwi lembe m’uwok i kumi, man kara ibed agonya nikum cwinyi m’ubepido.

Annette unwang’u nia eno lemandha. Eyero kumae: “Akoro lembe m’unwang’a ni jarimba ma ceng’ni man eora nia acidh akore ni judong cokiri mwa ario. Anyong’a unega, pilembe akore igi. Waweco kugi wang’ dupa, man giyero ira tap lembe m’abino ku yeny mi winjo, nia, lembe m’utimere ubino kosa para ngo. Abino mbe ku kosa moko acel de.”

Natalie ukoro ni junyodo pare pi mak ma jumake ko ku kero. Ewacu kumae: “Gimio ira kony, giketho cwinya nia akor lembene; eno ugam ukonya kara kud abed ku can akeca man ku ng’ecwiny i ia.”

Natalie unwang’u jukocwiny bende nikadhu kud i rwo. Eyero kumae: “Niweco ku Mungu ukonya, asagane kinde m’abino paru nia acopo yero ngo lembene ni ng’atu mange. Kan aberwo, ayero lembe ceke. Eno ketho abedo ma cwinya kwio man m’umbe adieng’a moko.”

In bende icopo nwang’u nia “nindo mi cangu [kei kum]” utie. (Eklizia 3:3) Gwok kumi man pidoic peri agwoka. Nwang’ saa m’ibed iyom i ie lee. M’usagu zoo, jengiri iwi Yehova, Mungu mi jukojuk ceke.—2 Jukorinto 1:3, 4.

Kan itie nyaku, man jubemito niroyi i timo marac, etie rac ungo niyero ku tegocwiny kumae: “Weka!” kunoke “Kud imul kuma!” Kud ilwor nia jal peri m’imaru bikweri. Kan ekweri, pi lembe maeno, nwang’u eromo kudi ngo! Iromo ku jalawobi mandha ma woro kumi man cik mi Biblia.

“I darasa, jumaco ma wasomo kugi gitelo thond kalega (soutien) para ku yor ing’eya, man giyero wec ma ketho adoko nyaming’ ming’ nia, kan atimo kugi tarwang’, abiwinjara maber magwei.”—Coretta.

Iparu nia jumaco maeno gibino

1. Nisembo sosi kude?

2. Nicewo ava mi gamiri i kume?

3. Nicewo ava mi tarwang’ i kume?

“Kinde ma wabino i mutukari, jalawobi moko ucaku nibidha man nigwaka. Abayu cingene man awacu ire nia ecor cen. Enena ni dhanu ma rieko pare mbe.”—Candice.

Iparu nia jalawobi maeno ubino timo Candice nenedi?

1. Nisembo sosi kude?

2. Nicewo ava mi gamiri i kume?

3. Nicewo ava mi tarwang’ i kume?

“Oro m’ukadhu, jalawobi moko ucega nia emara man ebemito abed nyaku pare m’ebigamu, kadok awotho kwere de. Saa moko ecaku nyobo cinga. Ayero ire nia kud emedere ku lembene, re ewinjo ngo. Nindo moko, kinde m’abino twio thond wara para, apoi m’egido piera.”—Bethany.

Iparu nia jalawobi maeno ubino:

1. Nisembo sosi kude?

2. Nicewo ava mi gamiri i kume?

3. Nicewo ava mi tarwang’ i kume?

Kud ikind lembe ma jurieyo maluno zoo, dwokowang’ lembe ma cuu utie mir 3.

Pirang’o cewo ava mi tarwang’ ikum ng’atini ukoc ku cewo ava mi gamiri?

Nicewo ava mi tarwang’ i kum ng’atini bebedo timo m’i thenge pa ng’atu acel. Timone medere asu kadok ng’atu ma jubecewo ava i kume ubekwero de.

Timo maeno tie rac akeca. Ecopo tero ng’atini i mak ma ku kero pi tarwang’.