Snonkaku ḇedif fa ḇefrur farbuk ḇe Aneta i, isawen fafaya i ḇe saprop rofyor ifawi ḇaim rosai ḇeḇejadi ya. Doḇe, ”Yaḇensewar fa yapampumi ma yar naba mboi mkaren yedi ndrok ḇa. Yapampumi, yaskopi, yamuni, ma yasnaw fafaya i. Mboi rofyor isyo aya kuker inoi ro baken yedi, yasambraḇ ḇa.”

Au isya ro fafisu ḇeradine ido, nari rosai wafrur ya?

Imbude fasos mankundaw kuker wasasor Au, ḇape roi ḇeḇyeḇa bisa na ḇeḇejadi. Refoya doḇe, ”Fanfabri inema faro mansei ḇefasaw ḇa”. Ma ikofen kako, ”syadiwer kyaremso inema faro snonkaku ḇena fawawi sya ḇa; snar oras ma fafisu kofawiḇa na ndrama myun manseirya kam.”—Pengkhotbah 9:11.

Roma inai babo ḇeḇeso sya, imnis ra Aneta i, snonkaku sifawiḇa sya smun kanandor si fa sifrur farbuk kuker si. Ḇesesyawer ido karyer ḇaido bati sesya siso ḇefrur roi anna faro si. Rofyor Natalia ḇyeumur taun samfur rioser, romawa babo oso ḇebarek fanam kuker rum ḇyedi idif i ma ifrur farbuk kuker i. Doḇe, ”Yamkak ma yamai kaku inja iso ḇefnai fa yakofenḇair na ḇe osoḇaḇeri.”

Aneta ḇyaḇir syasar kaker snar rosai ḇekur i. Doḇe, ”Yakaraker roi ḇekur ayanya. Yaḇaḇir yasambraḇ fa yapampum snonkaku ani. Mboi, rofyor isyo aya, yamkak fafayaḇa. Ipyum ya, fafisu ani yasewar kaku fa yapampumi, mboi yasambraḇ ḇa fa yafrur roi osoḇaḇeri.”

Natalia i kako ḇyensewar kaku fa pyampum swaruser ḇesasar ḇyena. Doḇe, ”Iḇyeya yakyar awer. Sinan ayesuya suḇuk anun insama aya ma eba yedi nuḇekayam rofyor nufnak ro bandi, ḇape yarow’r ḇa. Inja yaḇaḇir yabuk swaf faro snon ḇebar’k fanam ro rum yedi ifrur susa aya. Rosai ḇekur ayanya nawyae kina ayesya, ma yaḇaḇir aya iso ḇekamar rosai ḇeḇejadiya snar yafrur fa sḇesaneso kwar. Iso ḇefnai fa yaḇaḇir yasasar ker.”

Rofyor wakḇaḇir raris Aneta ḇaido Natalia ido, fandun fa waswarepen snar, snonkaku ḇesmai fafisu ḇeradine simewer sismai roi ḇeradirya. Snonkaku ḇeḇeso skara roi anna nun ḇe roi ḇesamswen ḇa. Sisewar nyan fa soḇe roma snon babo sya moḇ sifrur ryairi ḇaido bin ani iso ḇemarisen kako. Kokame na komewer kosmai roi ḇeradine. Inja, rofyor roi ine nkur Au ido, wasasar ḇa!

Kakuḇae, na napyan fa rwower wos ḇekofen ”wasasar ḇa”. Ḇape, na samswen kaku fa ḇaḇir wasasar ḇa. Snonkaku ḇeḇeso sya sikram rosai sḇaḇirna iso ḇefnai fa sḇaḇir sisasar ker ma nakyarenker sne sena. Inja, rofyor fasis monda ido, na mansei ḇemarisen ya, Au ke snonkaku ani? Fandun fa swewar nyan ḇesena.

Refo ikofenḇair ḇe ko rosai ḇero Ayub sneḇaḇir ḇyeja rofyor ismai samswen, doḇe, ”Rofyor sne yedi syarmar nari yawosḇair na!” (Ayub 10:1) Kuker wafar rosai ḇekur Auya nari wasmai fainda. Wawos kuker snonkaku wakyar ya nari nafnoḇek Au fa wasmai sneprei ro rosai ḇeḇejadi faro Au.

Aneta ḇyaḇir wos anun anna nkaku. Doḇe, ”Yawos kuk’r bati ḇefanam ayedi, ma iwan aya fa yawos ḇe penatua Kristen ḇero sidang. Yamarisen yaso anun ḇyena. Sawos kali ri ḇeḇeso kuk’r aya ma sḇuk kakyar ḇe aya snar rosai ḇeḇejadiya ima sasar ayena ḇa. Sasar osoḇaḇeri ro aya.”

Natalia dawos faro sinan ḇyesuya kuker roi ḇemuni. Doḇe, ”Sufnoḇ’k aya. Suḇuk anun ḇe aya insama yafar rosai yasmaina, ma sufnoḇ’k aya fa yaḇesneso ḇa ma yakram masasor ḇa.”

Natalia ismai kako sneprei rofyor ḇyenadi. Doḇe, ”Nadi ḇe Allah nafnoḇ’k aya kako. Iba syadiwer rofyor yaḇaḇir jadi fa yafar ḇe snonkaku ḇesesya ḇa. Rofyor yaḇenadi, yawos rosai yaḇaḇir nakam. Ine nbuk sneprei ma kananon ḇe aya.”

Na wafawi kako snar ”fafisu ḇebuk pararei” nasya. (Pengkhotbah 3:3) Faduru mankundaw ro baken ma sneḇaḇir Bedi. Buk fafisu fa kwain kuker marisen. Ḇefandun syadi ya, wakyar kaku Allah Yahwe iso na ḇebuk sneprei ḇe Au.—2 Korintus 1:3, 4.

Au iso insos ma sidif Au fa wafrur roi ḇeḇyeḇa ido, fandun fa wakofen ḇeri, ”Wafrur rarirya awer!” ḇaido, ”Wapan awer ro aya!” Wamkak awer nari kabrai saswar muḇena namuk. Mboi imarisen fa kabrai saswar muḇena imuk ido, ima snon ḇemnis kuker Au ḇa! Fandun fa nwa snon ḇeswar kaku faro Au, ma ḇesyowi baken ma kakyar Bedi.

”Roma snonkbor ro rumfarkor yedi sores ro ḇarpur ma siyerker kutang ayedi ma sawos ḇe aya snar rofyor yafrur fararur farbuk kuker si nari yasmai marisen.”—Sarce.

Kakara Bedi ido, rosai snonkbor ansya sifrur ya

1. Sikyaren i?

2. Sembuk i?

3. Sidif i ro fararur farbuk?

”Ro oto oso, snonkbor oser ikofen wos ḇemamas faro aya ma pyansnaw aya. Yasaw’n bramin ḇyeja bur baken ayedi ma yakofen ḇe i fa ikrenbur aya. Myam kyandor aya imnis aya ine snonkaku ḇesarbir.”—Sindi.

Kakara Bedi ido, rosai snonkbor ine ifrur ḇe Sindi i?

1. Ikyaren i?

2. Dembuk i?

3. Idif i ro fararur farbuk?

”Ro taun iwara, snonbkor oser ikofen ḇe aya snar imarisen kuk’r aya ma imarisen ifrur kabrai saswar kuk’r aya. Yakofen ḇe i kwar yamewer mboi idif ker aya. Fyorno ido, ḇyensewar fa pyasnawker baken ayedi. Yakofen ḇe i insama imnai, ḇape imewer. Ramnai, rofyor yafes spatu yedi, ipraper krori.”—Beti.

Kakara Bedi ido, rosai snonkbor ine ifrur ya:

1. Ikyaren i?

2. Dembuk i?

3. Idif i ro fararur farbuk?

Kankinfir ḇekaku faro fakfuken rikyor ine iso kankarem C.

Rosai ḇefnai fa dafdif ro fararur farbuk ine iḇese kuker dembuk ma kayaryaren?

Dafdifer fa sifrur fararur farbuk ine ryama ro marisen snonkaku ḇefrur dafdif ani monda. Snonkaku ḇesmai dafdifer ani imewer mboi na snonkaku ani ifrur rarirya ḇesya kwar.

Dafdifer fa ḇefrur fararur farbuk inema roi ḇefarfnak ḇa. Ine nari nun ḇe fararur farbuk ḇerarmomen.