Anet i sek se wan man i holem hem mo i sakem hem i godaon long graon. Hem i talem se: “Mi traehad blong stopem hem, be nogat. Mi traem blong singaot, be hem i blokem maot blong mi. Mi pusum hem, mi kikim hem, mi faetem hem, mo long taem ya nao mi harem naef i fas long mi. Afta mi no moa save wokbaot.”

Sipos yu yu Anet, ?bambae yu mekem wanem?

Yu mas rere oltaem, speseli taem yu aot long haos long naet. Trabol i save hapen eni taem nomo. Baebol i talem se: ‘I no nambawan man blong resis nomo we i stap win, mo i no waes man nomo we i stap kasem gudfala laef, from we samting we yumi no tingbaot i save hapen eni taem nomo.’—Prija 9:11.

Sam yangfala olsem Anet, oli kasem trabol we narafala i mekem long olgeta we oli no tingbaot. Sam narafala, maet memba blong famle blong olgeta nomo i mekem fasin olsem long olgeta.

Anet i stap harem nogud yet from trabol we i hapen long hem. Hem i talem se: “Evri naet mi stap tingbaot samting we i hapen long mi. Mi stap tingbaot sipos mi bin kikim hem strong moa, ating bae hem i lego mi. Be mi fraet tumas from we hem i stikim mi wetem naef. Mi no moa save mekem wan samting, be mi harem se mi sud mekem wan samting.”

Natali tu i stap harem nogud yet, from trabol we hem i kasem. Hem i talem se: “Mi no sud trastem mi wan tumas. Papa mo mama tufala i putum wan rul se, taem mi mo sista blong mi, mitufala i go pleplei afsaed long haos, oltaem mitufala i mas stap tugeta, be mi mi no lesin. Mi harem olsem se mi nao mi givim janis long man we i stap klosap long mifala, blong i spolem mi. Samting we i hapen i mekem famle blong mi i harem nogud bigwan mo mi harem se mi nao mi stamba blong trabol ya. Mo oltaem mi stap harem nogud from trabol ya.”

Sipos yu kasem sem trabol olsem Anet mo Natali, i gud yu tingbaot se i no fol blong yu. Sam man oli talem se fasin ya blong repem narafala, i no wan bigfala trabol. Oli talem se, fasin ya i nomol long ol boe, mo oli talem se samtaem ol gel nao oli pulum ol boe blong mekem fasin ya. Sipos yu yu wan we narafala i bin repem yu, i gud yu tingbaot se, hemia i no fol blong yu.

I isi blong ridim tok ya, “i no fol blong yu,” be i had blong akseptem. Samfala we narafala i repem olgeta, oli kipim ol nogud filing we oli gat, mo samting ya i spolem laef blong olgeta. ?Be hu bambae i safa moa, yu no man we i repem yu? I stap long yu nomo blong jusum, folem nekis haf we i stap.

Baebol i tokbaot stori blong Job we hem i wari tumas from trabol we hem i kasem. Hem i talem se: “Mi stap harem nogud tumas. Plis yu lesin long tok blong mi.” (Job 10:1) Maet yu save harem gud sipos yu mekem olsem Job. Yu toktok wetem wan man we yu trastem hem mo yu save se bambae hem i givhan long yu blong no tingting tumas long trabol we yu kasem, mo blong yu save harem gud bakegen.

Anet i mekem olsem mo samting ya i givhan long hem. Hem i talem se: “Mi stori wetem wan bes fren blong mi, mo hem i talem se mi mas go storian wetem ol elda long kongregesen. Mi glad tumas se mi folem wanem we hem i talem. Ol elda oli storian wetem mi mo oli talemaot se hemia i no fol blong mi nating.”

Natali i storian wetem papa mo mama blong hem long saed blong trabol we hem i kasem. Hem i talem se: “Tufala i givhan long mi mo tufala i talem se mi no mas fraet blong tokbaot samting ya long tufala. Mo hemia i mekem se mi glad mo mi no kros long mi wan.”

Mo tu, Natali i harem gud taem hem i prea. Hem i talem se: “Mi glad taem mi toktok wetem God, speseli long taem we mi harem se mi no moa save toktok wetem narafala. Taem mi prea, mi save toktok we mi no fraet nating. Prea i givhan long mi blong gat pis, mo longfala tingting.”

Bambae yu luk se i gat taem blong “sikman i gud bakegen.” (Prija 3:3) Yu mas lukaotgud long bodi mo filing blong yu mo yu mas spel plante. Samting we i impoten moa, hemia blong dipen long Jehova we hem nao i save mekem man i harem gud.—2 Korin 1:3, 4

Sipos yu yu wan gel, mo boefren blong yu i stap fosem yu blong mekem wan fasin we yu save se i doti, yu mas gat strong tingting mo talem se, “!Yu no mekem olsem!” “!Yu no holem mi!” Yu no mas fraet se bambae yu lusum boefren blong yu. Sipos hem i finis wetem yu from samting we yu talem long hem, hemia i min se hem i no kea long yu. Yu jusum wan man we i save respektem bodi blong yu mo ol tingting blong yu.

“Long skul, ol boe oli stap pulum bra blong mi mo oli talem se sipos mi mekem seks wetem olgeta, bambae mi harem gud.”—Koreta.

Yu yu ting se ol boe ya oli

1. ?Jikim hem?

2. ?Switim hem?

3. ?Askem hem blong mekem seks?

“Taem mifala i stap long bas, wan boe i stap toktok krangke long mi mo i stap holem mi. Mi slapemaot han blong hem, mo mi talem se hem i mas gowe long mi. Boe ya i ting se mi mi krangke.”—Kandis.

?Yu ting se boe ya i mekem wanem long Kandis?

1. ?Jikim hem?

2. ?Switim hem?

3. ?Askem hem blong mekem seks?

“Las yia, wan boe i stap talem long mi oltaem se, hem i laekem mi mo i wantem se mitufala i go long wan ples we i no gat man long hem. Oltaem mi talem no long hem. Samtaem hem i stap holholem han blong mi. Mi talem se hem i mas stop, be hem i no wantem. Mo taem mi stap fasem wansaed sus blong mi, hem i kam holem has blong mi.”—Betani.

Long tingting blong yu, boe ya i:

1. ?Jikim hem?

2. ?Switim hem?

3. ?Askem hem blong mekem seks?

Stret ansa blong trifala kwestin ya, hemia namba 3.

?From wanem fasin blong askem seks i defren long fasin blong jikim mo switim narafala?

Fasin blong askem seks i save gohed nomo, nating se narafala i talem no.

Yumi mas lukaotgud long fasin ya, from we hem i save lidim man blong rep mo mekem sam nogud fasin blong fosem ol woman blong mekem seks wetem olgeta.