Mɔgɔ min binna Annette kan, o y’a ɲɔni ka bin duguma k’a sɔrɔ Annette tun t’a dɔn ko min bɛ sen na. Annette y’a fɔ ko “ne ye ko bɛɛ kɛ walasa ka tila a la. Ne y’a ɲini ka kule nka mankan foyi tun tɛ ka bɔ. Ne y’a ɲɔni, k’a bugɔ bugɔ, k’a wagasi ani k’a tan ni ne senw ye. Ka ne to o la dɔrɔn, ne y’a ye ko a ye muru bɔ ne kama. Ne barika banna o yɔrɔnin bɛɛ.”

Ni o ko sugu ɲɔgɔn tun ye e sɔrɔ, e tun bɛna mun kɛ?

Hali n’i ye i labɛn cogo o cogo, ka i janto i yɛrɛ la ni i bɛ bɔ sufɛ, ko jugu bɛ se ka i sɔrɔ. “Ɲɔgɔn danni ko tɛ sen diya nɔ ye. Kɛlɛ yɔrɔ la se sɔrɔli tɛ fariya nɔ ye. Dumunifɛn sɔrɔli tɛ hakilitigiya nɔ ye. Nafolotigiya tɛ faamuli nɔ ye. Madiyali tɛ dɔnniya nɔ ye. K’a masɔrɔ kow bɛɛ ni u waati ni u tuma don.”​​—⁠Waajulikɛla 9:⁠11.

Iko Annette cogo, mɔgɔ minnu binna funankɛnin caman kan, olu tɛ u dɔnbagaw ye. Dɔw ta ye u dɔnbaga ye walima u ka so kɔnɔmɔgɔ dɔ yɛrɛ. O cogo la, ka Natalie to san tan na, cɛmisɛnnin dɔ min bɛ u ka so kɛrɛfɛ, o binna a kan. A ko: “Ne tun sirannen don kosɛbɛ wa ne tun maloyalen don fo ne ma se ka kɔn ka o fɔ mɔgɔ ye joona.”

Hali bi, Annette bɛ ka taa a fɛ ka a yɛrɛ jalaki ko kɛlen na. A ye a fɔ ko: “Ne taara a fɛ ka miiri dɔrɔn o ko la su bɛɛ kɔnɔna na. Wa ne y’a miiri ko walasa ka nin ko in bali ne tun ka kan ka fɛn wɛrɛw kɛ ka tɛmɛn ne ka kɛlen kan. Nka muru bɔlen kɔ, ne barika bɛɛ banna siran bolo. Ne ma se ka foyi kɛ bilen, nka ne b’a fɔ n’kɔnɔ ko ne tun ka kan ka ko wɛrɛ kɛ.”

Natalie fana bɛ a yɛrɛ jalaki kosɛbɛ. A y’a fɔ ko: “Ne tun mankan ka da n’yɛrɛ la kojugu. Ne bangebagaw tun b’a fɛ ne ni ne balimamusow ka tulonkɛ kɛ ɲɔgɔn fɛ kɛnɛma nka ne ma u kan minɛ. O de y’a to ne y’a miiri ko ne ye cogo di n’sigiɲɔgɔn ma o ka ko jugu kɛ ne la. Min kɛra, o ye nɔba bila ne somɔgɔw la wa ne bɛ a miiri ko o ko bɛɛ ye ne de nɔ ye. O de bɛ ka ne degun kosɛbɛ.”

Ni i fana bɛ miiri iko Annette ni Natalie cogo, kana ɲinɛ ko, ko min kɛra o tun tɛ ko ye i tun sɔnnen don min ma. Mɔgɔ dɔw tɛ o ko kɛ kogɛlen ye, u kɛtɔ ka a fɔ ko cɛw bɛ ten de wa ko ni u binna musomanin min kan ko o ye o de nɔ ye. Nka binkanni mankan ka kɛ mɔgɔ si la. Ni o wale jugumanba sugu kɛra i la, o tɛ i nɔ ye!

Tiɲɛ don ka a fɔ ko “o tɛ i nɔ ye” o fɔli ka nɔgɔn ni ka da o la ye. Binkanni kɛra minnu na, olu dɔw bɛ taa a fɛ ka ko kɛlen to u yɛrɛ kɔnɔ, ani u bɛ tɔɔrɔ yɛrɛ jalakili hakilina bolo ani hakilina jugu wɛrɛw. Nka ka i makun, jɔni bɛ nafa sɔrɔ o la​​—⁠e wa walima mɔgɔ min binna i kan? I ka kan ka fɛɛrɛ wɛrɛ tigɛ o ko kama.

Bibulu b’a fɔ an ye ko mɔgɔ tilennen Job ka degun kɔnɔna na, a y’a fɔ ko: “Ne dusu kasilen na kuma.” (Job 10:⁠1) Ni i ye a ladege o bɛna fisaya i ma. Ka o kuma fɔ mɔgɔ ye i dalen bɛ min na, o bɛ se ka i dɛmɛ dɔɔnin dɔɔnin walasa tiɲɛ ye min ye i ka binkanni ko la i ka sɔn o ma, ani ka i dusu saalo i ka dusukasi ko la.

Annette ye o sɛmɛntiya. A ye a fɔ ko: “Ne y’a ɲɛfɔ n’teri sɛbɛ dɔ ye, o ye dusudon ne kɔnɔ kosɛbɛ ne ka taa a ɲɛfɔ diinɛ maakɔrɔ fila ye. O kɛli ɲɛna. U nana ne fɛ yen siɲɛ caman ani u ye kuma fɔ ne ye ne mago tun b’a la ka min mɛn tigitigi ni o tun ye ko​​—⁠o ko tun tɛ ne nɔ ye. Nin ko in na, fɛn foyi tɛ ne nɔ ye.”

Natalie ye a ta ɲɛfɔ a bangebagaw de ye. A ye a fɔ ko: “U ye ne kɔkɔrɔdon. U ye dusudon ne kɔnɔ ne ka kuma o ko kan wa u ye ne dɛmɛ ka dɔ bɔ ne ka dusukasi la ani ka dɔ bɔ ne ka diminya la.”

Delili fana ye Natalie dusu saalo. A y’a fɔ ko: “Ka kuma Ala fɛ o ye ne dɛmɛ, kɛrɛnkɛrɛnnenya la waati minnu na a tun man nɔgɔ ne bolo ka o ko ɲɛfɔ Hadamaden ye. Ni ne bɛ delili kɛ, ne bɛ se ka n’kɔnɔko bɛɛ fɔ. O bɛ ne lafiya kosɛbɛ ani ka ne mada.”

I fana bɛna a jateminɛ ko “kɛnɛyali tuma” bɛ yen. (Waajulikɛla 3:⁠3) I janto i ka kɛnɛyali la farikolo ta fan fɛ ani dusukun ta fan fɛ. Waati ta ka i lafiya kosɛbɛ. Min ka fisa ni a bɛɛ ye, o ye ka i jigi da dusu saaloli bɛɛ tigi Jehova Ala kan.​​—⁠2 Kɔrɛntekaw 1:​3, 4.

Ni i ye npogotiginin ye ani ni u bɛ i jagoya i ka ko kolon kɛ, baasi foyi tɛ a la k’a fɔ ka gɛlɛya ko: “Kana nin kɛ!” walima, k’a fɔ ko: “I bolo bɔ ne kan!” Kana siran ka o fɔ ka a sababu kɛ ko i tɛ a fɛ ka bɔnɛ i teri la. Ni a ye i bila o kama, o kɔrɔ ko teri ɲuman tun tɛ! O la, i mago bɛ cɛ ɲuman de la min bɛ i farikolo ni i taabolow bonya.

“Lakɔliso la, cɛmisɛnninw tun bɛ ne ka sutiyɛn sama ne kɔ donnen ani u tun bɛ kuma fɔ ne ma minnu bɛ mɔgɔ lamaloya i n’a fɔ​​—⁠ko ne bɛna lafiya kosɛbɛ ni ne sɔnna ka cɛnimusoya kɛ u fɛ.”​​—⁠Coretta.

I ka miiri la, o cɛmisɛnnin ninnu tun bɛ

1. Tulonkɛ de la wa?

2. Sunguruntigɛ de la wa?

3. A kɔ walasa ka cɛnimusoya kɛ ni a ye wa?

“Busi kɔnɔna na, cɛmisɛnnin dɔ ye kuma kolon fɔ ne ma ani ka ne minɛ. Ne ye a bolo gosi ka bɔ ne la ani ka a fɔ a ye ko a ka taa ka bɔ yen. A ye ne filɛ iko fatɔ.”​​—⁠Candice.

I ka miiri la, o cɛmisɛnnin in tun bɛ

1. Tulonkɛ de la wa?

2. Sunguruntigɛ de la wa?

3. A kɔ walasa ka cɛnimusoya kɛ ni a ye wa?

“Salon, hali k’a sɔrɔ ne tun tɛ ka sɔn, cɛmisɛnnin dɔ tun bɛ a fɔ ne ye tuma bɛɛ ko a bɛ ne fɛ ani k’a b’a fɛ an ka to ka bɔ ɲɔgɔn fɛ. Tuma dɔw la, a tun bɛ maga maga ne bolo la. Ne ye a fɔ ko a ka o dabila, nka a ma sɔn. Don dɔ la, tuma min na ne birilen bɛ ka n’ka samara don, a ye a bolo da ne bobara kan.”​​—⁠Bethany.

I ka miiri la, o cɛmisɛnnin in tun bɛ

1. Tulonkɛ de la wa?

2. Sunguruntigɛ de la wa?

3. A kɔ walasa ka cɛnimusoya kɛ ni a ye wa?

Ninnu saba bɛɛ jaabi ɲuman ye C de ye.

Ka bila mɔgɔ kɔ walasa ka cɛnimusoya kɛ ni a ye, mun na danfara bɛ o ni sunguruntigɛ ni tulonkɛ cɛ?

Ka bila mɔgɔ kɔ walasa ka cɛnimusoya kɛ, o bɛ fɛn kelen de kan. O tigilamɔgɔ bɛ taa a fɛ ka o fɛn ɲini hali ni a fɔra ko a ka o dabila.

Ka bila mɔgɔ kɔ, o tɛ tulonkɛ ko ye. O de bɛ se ka na ni binkanni ye cɛnimusoya ta fan fɛ.