Nɩkpɛ -ɔ yɩbhä a-a ɔ ˈkä Anɛtɩ zoku ˈwlu nʋ, zɛmövusɛ ɔ bhïloo dʋdʋ ˈwʋ sɛ. Ɔ lɛ nɩɩ: “Gwɩ -n -ɲɔ gwɩɛ n ˈkɔ naɲɩ -gömö sɛ a za. N ˈkpa ˈmö -këë, maa yɩˈɩɛ dɛ ghlɛ. N ˈsunɔ -mä, n ˈpɔ kɛ n ˈpɔ -gbisie, n ˈsulo n yoo nimï aˈbhë. Maa n lɛ ˈzʋa sɛˈɛ cuu, ɔ -wʋʋ -baka ˈmö tlʋnɩ dɔˈwʋ. Ŋanɔ a za, nˈn-ä sɛ n ˈkä ˈzʋ aˈbhë -yi.”

ˈN -sɩbhä a -lii -kamö ghlɩɩ, sɛ -n ˈkäa ɔ zʋ ˈnɩ?

N yi -naɲɩ ˈwʋ ˈnɛɛnɩ aˈbhë -kë, sabʋsɛ n -kä dɛ mö dɔˈwʋ -wʋ, -lizoku bhɛnɩ yɩ -kamö ghlɩ. “ˈSaa ˈkaɲɩɛ ˈzɩgblɛ ghlɩɩ, aˈbhï a ˈniɛ -yi.”—Zaakö 4:⁠14.

Anɛtɩ a sɛ, ˈdumöwʋyuë -mumuë, nɩkpa a -muë -waa -yi kuë -ɔɔzʋkälii ˈwlu nʋ ˈwë. -Mumuë aˈbhë, waɲɩ a -yiyiɲɔ ɛ -käˈɛ ˈwa -kosu yɔwʋ a -nɔɔ mɔɔ zʋä -sɩbhä. Natali -kä ˈylʋbö kʋgbä ˈn ˈwa ˈligbëa yɔwʋ a ɲɛgbayu -bhlʋ yoo -ɔɔzʋkälii ˈwlu nʋ. Ɔ lɛ nɩɩ: “Ŋänɩ n ŋänɩ a-a teɲii ˈn yɩ -bhöö a-a zʋ ˈwʋ zaa nˈn-ä nɩkpɛ aˈbhë ˈdɩ ˈɲɛ ˈlɩlɩlɩ.”

ˈSaa ghlɩɛ Anɛtɩ, ɔ dɔˈwʋ ɔˈbhë mɔɔ kää yɩ gbʋ. Ɔ lɛ nɩɩ: “ˈSaa ghlɩ a-a -lɛ a sabʋ ˈla ˈmö n pää ˈkwädlɩ dlɩ ˈwʋ ˈyize. N -kä -lɛ glɩɩ sɛˈɛ n nʋä nɩɩ, -n -ɲɔ -käa sasɛ gwɩ, ɔ ˈnaa -käa -ɔɔzʋkälii ˈwlu nʋ. Ɔ paa -baka ˈwë, ŋanɔ a za nˈn-ä -lu, maa zɩˈɛ a dɔˈwʋ n pä dlɩ nɩɩ n käa -bhlɛ n ˈkä ˈkli ˈyize.”

Natali, ɔɲɩ ɔ zʋˈɛ ɔbhlɩ gbʋ -gömö. Sɛˈɛ ɔ nʋä: “Nˈn-ä -kä n ˈkäa teɲii naɲɩ dlɩ ˈtɛɛnɩ. Na -lowluwa ɲɩaɲɩ a-a ˈdɩ nɩɩ, n -ɲɛ na -daayuŋlʋyu ˈsɔ -kä -mä ˈpɩwʋ kɛ ˈbhlinɩ dɔˈwʋ -wʋ -a nɩ tɩ yɔwʋ ˈbhööbhönɩ. Maa n ˈnʋa ˈyukwli -pʋnɩ. Zaa na dɔˈwʋ na a, -aa yɔwʋ a ɲɛgbayu -kaa -ɔɔzʋkälii ˈwlu nʋ, -amöö tɛliɛ sɛ. ˈSaa ghlɩɛ kälɩ a-a teɲii na -lowluwa yɔwʋ, -amö kää ˈŋlɩ ˈn wa -wʋ a-a saˈa teɲii yɔlɔ dɔˈwʋ. Wɛlɩ ˈla aˈbhë mii kälɩɛ teɲii yɔwʋ.”

Anɛtɩ -ɲɛ Natali ˈsɔ a sa -sɩbhä -n -kä dlɩ pää, yɩbhlɩnɩ sɛ nɩɩ, nɩkpɛ a –mɔ wa nʋä -ɔɔzʋkälii ˈwluu ɔˈbhë mɔɔ ˈnɩɛ ˈwʋ ŋlu -sɩbhä a -lii ˈkɔ ghlɩ. Tɩˈɛ -na a -sɩbhä dlɩ ˈpämö. Nɩkpa -mumuë a dɔˈwʋ ɛˈɛ -bhö daˈa wɛlɩ ˈkädɩ. Wa dɔˈwʋ ɲɩbhɛlɩyuëa -wa zʋä -sɩbhä kä zugo. ˈN wa nʋˈɛ nɩɩ, ŋlʋyuëa aˈbhï mʋa ˈyɩbhɩɛ. ˈLɩlɩlɩ a dɔˈwʋ, ŋlʋyu ˈnɩɛ bhɛnɩ ɔ ˈkä nɩɩ, wa nɩ nɔɔ -ɔɔzʋkälii ˈwlu nʋ. ˈN wa -kamö saˈa a -lizoku ˈkädɩ ˈwlu nʋʋ, -nmö ˈnɩɛ gbʋ -kä!

Miɛ aˈbhlɩ, kïbhëa -a nʋä “-nmö ˈnɩɛ gbʋ -kä,” a ˈmözɛlɩzɛlɛ ˈnɩɛ ˈmö ˈtɛɛ. Maa -n ˈka dlɩ ˈwʋ -kä a dɔˈwʋ, ˈmö yɩ ˈtɛɛ teɲii. -Mumuë, ˈsaa ghïluë a za, waɲɩ wa ˈsunɩɛ gbʋ ˈn wa dlɩpasa ˈnɩɛ -kpö ˈwʋ -wʋ. Maa -n -kä wɛlɩɩ ˈla ˈmlɩ ˈpää, -mɔ yɩ nʋ bhä -li a -lii ˈwlu ˈnɩ? -Ɔ -nʋmöä -lizoku ˈwlu mɔ bhä ˈnɩɩ, maa -nmö bhä -a? -N -kä sɛ -mämaa zʋä, yɩ kä na -li a -lii ˈmö.

Biblë lɛ nɩɩ, Zɔɔbö -ɔ -lɛ a-a nɩkpɛ a -mɔ -wʋä -kpö ˈwʋ, ɔ ˈkää teɲii ˈklɩ ˈyɩ dɔˈwʋ -wʋ, sɛˈɛ ɔ nʋ a-a: “-Mä ˈna ˈklɩyɩyɛ -ɛɛ -sɩbhä a sɛ -wʋ ˈmö, n yi bhïla!” (Job 10:1) -N -kä -sɩbhä ˈzʋmö yɩ -yimö -li a -lii ˈwlu nʋ. -Lu -kämö ghlɩɩ, -n -kä wʋ wɛlɩ nɩkpɛɛ -n ˈtɛɛnɩɛ dlɩ ˈɲɛɛ, yɩ -yimö kwänɩ -n yi dlɩ ˈwʋ ˈtɛmanɩ ˈn -naˈa dlɩpäsazokwëa -tɩmöa ˈwlu mänanɩ.

Anɛtɩ lɛ nɩɩ -tiawɛlɩɛ. Ɔ lɛ nɩɩ: “N ˈɲɛ a-a na -tiabheyi ˈsaa ghlɩɩɛ a ˈdɩ, n ɔ -yiiɛ ˈdɩ ˈɲɛ nɩɩ n nɩ ˈɲɛ -aˈa lagɔzɩkpa ˈmö a ˈyukugänɩwa ˈsɔ ˈdɩ. Sɛ n zʋä päla a-a ˈmäna ˈmö ˈteɲii. Wa -ɲɛ -amö bhïla ˈwʋ -bɛ ˈwʋ ˈn wa -yiɛ ˈdɩmözʋwɛlɩ a -nɩ a -nɩɩ ˈɲɛ. -Yɩ nʋä nɩɩ -lizoku -yɩ ghlɩɛ a dɔˈwʋ -amö ˈnɩɛ gbʋ -kä.”

Natalii ˈɲɛ a-a ɔ -lowluwaa -lizokuu -yɩ ghïloo a ˈdɩ. Ɔ lɛ nɩɩ: “Wa kwänɩ a-a -tiamö. ˈDɩ wa ɲɩ a-a nɩɩ, n nɩ bhïla yɩ wɛlɩɩ, mii kwänɩˈɛ ˈn ˈmäna yiɛ ˈtikïyie ˈwʋ dlɩ zɛmö yi ˈn nˈn-ä ˈklɛ kula.”

Bhibhebhibhiuu ˈtɛmanɩˈɛ ˈgämö Natali dlɩ ˈwʋ. Ɔ lɛ nɩɩ: “N ˈkää Lagɔ bhibhee ˈsaa ghlɩɛ a dɔˈwʋ, yɩ kwänɩɩ teɲii. Ɛˈɛ -bhö ɲɩasɛ, maa -lɛ a ˈtɛɲɩ ˈmö nˈn-ä a-a bhɛnɩ n ˈkä käbönɩkpɛ ˈdɩ ˈɲɛ ˈlɩlɩlɩ. N ˈkää Lagɔ bhibhee, na ˈmlɩ a wɛlɩ ˈwuë ˈmö n ˈɲɔɔ. Mii kwänɩɛ ˈn na dlɩ zɛmö yiɛ -pɛpɛ plɛ ˈtɩɩ.

-N yiˈɛ -naa sɛ yɩbhlɩmanɩ nɩɩ, “göpögöpötɛɲɩ -bhölɩ.” (Ecclésiaste 3:3) ˈZʋnɩ -naɲɩ ˈyli ˈn ˈpä -li a -lii a ˈyize dlɩ ˈwʋ. ˈLibhï ˈtɛɲɩ ˈwʋ -n ˈkä ɲɛpɛ. ˈN yɩ ˈwuë ˈmö a dɔˈwʋ ˈtɛɛnɩ Zoova dlɩ mɔɔ -lɛ Lagɔ -ɔ pää ˈkwädlɩ nɩkpa swɩ ɲɛmʋ ˈmö. —2 Kɔlɛɛtɩ 1:3, 4.

-N -kä ˈdumöwʋyu glɩnɩɩ, wa -kamö -mä -ɔɔzʋkälii ˈmö ˈsunɩɩ, -n -kä nɩɩ “tɩ saˈa ˈzʋ!” -n -käˈɛ “tɩɩ kɛ zɩ!” nʋʋ, tɩ dlɩ ˈpä nɩɩ -lizokuu -n nʋä. Tɩ nɩɩ, ɔ -tɩmöa -gömö panɩ zaa, -n ˈna ˈkɔ ˈmö zlɔmanɩ. Ɔ -kamö yɩ za -gömö panɩɩ, miɛ nɩɩ, ɔˈɔɔ nɩkpɛ a -nɩkpɛ glɩnɩ! Nɩkpɛ -ɔ -zʋä ˈpäpägböö -n kää dlɩ ˈwʋ -ɲɛ -naɲɩgäsɛ ˈsɔ ˈklʋkpamö mɔ -lɛ nɩkpɛ a -nɩkpɛ.

Kɔlɛta lɛ nɩɩ: “Dɛɛ n -wʋ a-a kolɛzɩ, na -suku ˈmö a ɲɩbhɛlɩyuëa, ˈna sutɩɛ n -suä ˈmö, ˈmö wa jliɛ -mä na -gömö ˈn wa nʋä nɩɩ, n -ɲʋa -kä -ɔɔzʋkälii nʋʋ, yɩ yii -li a -lii ˈwlu nʋ.”

-Na dɔˈwʋ, ˈsaa wa -wɔɔ bhä ˈwlu nʋ dɔˈwʋ ˈnɩ?

1. ˈBhli wa -ɲɔ bhli bhä -a?

2. Bhibhe dɔˈwʋ wa -wɔɔ bhä -a?

3. Wa -ɲɔɔ ˈkä -ɔɔzʋkälii nʋ a za wa -gägänɔ bhä -a?

Kadisɩ lɛ nɩɩ: “-Mä bisɩ ˈmö, ɲɩbhɛlʋyu -bhlʋ yiiɛ -ɔɔzʋkäwɛlɩ ˈɲɛ ˈn ɔ yiiɛ ˈwʋ gbulo. Ɔ zʋä -sɩbhä, n yiɛ na a ˈɔ kätɩkpa kɛ ˈpä ˈn n yiɛ nɩɩ ɔ nɩ ˈbhöö yɔwʋ. Ɔ yiiɛ ylɛ, ɔ dɔˈwʋ ˈwlumöö -wʋä ɲimo dɔˈwʋ.”

-Na dɔˈwʋ, ˈsaa wa -wɔɔ bhä ˈwlu nʋ dɔˈwʋ ˈnɩ?

1. ˈBhli wa -ɲɔ bhli bhä -a?

2. Bhibhe dɔˈwʋ wa -wɔɔ bhä -a?

3. Wa -ɲɔɔ ˈkä -ɔɔzʋkälii nʋ a za wa -gägänɔ bhä -a?

Betani lɛ nɩɩ: “ˈYlʋba -a ˈplɩɛ ˈmö, ɲɛgbayu -bhlʋ lɛ nɩɩ dlɩ yɔwʋ n nɛnɔɔ zaa, ɔ yɩbhä nɩɩ n nɩ ˈzʋ ɔ bheyi. N ˈɲɔ ˈdɩ nɩɩ, n ˈnaa ŋlu, maa ɔ -gänɩɩ -bhlɛ ˈkwädlɩ ˈyize. Zlɩ -mɛmɛ ˈmö, ˈna sɔ ˈmö ɔ ˈbhïbhlinɩɛ. N ˈɲɔ ˈdɩ nɩɩ, ɔ nɩ tɩ -sɩbhä ˈzʋ maa -sɩbhä ɔ zʋä ˈyize. ˈYlɩ -bhlʋ ˈmö, n -wʋ ˈna ˈsikplɩ ˈwlu gïganɩ dɔˈwʋ ˈn yiiɛ gwë yɔwʋ kɛ ˈpä.”

-Na dɔˈwʋ, ˈsaa wa -wɔɔ bhä ˈwlu nʋ dɔˈwʋ ˈnɩ?

1. ˈBhli wa -ɲɔ bhli bhä -a?

2. Bhibhe dɔˈwʋ wa -wɔɔ bhä -a?

3. Wa -ɲɔɔ ˈkä -ɔɔzʋkälii nʋ a za wa -gägänɔ bhä -a?

Nimïyɩbhäkïbhï ˈlɛ ta -kpɔ a zɛmösɛna -a -wʋä -kpö ˈwʋ ma -lɛ TANAA ma.

Wa -kä nɩkpɛ -gägänɩ -ɔɔzʋkälii a za ˈn wa ˈkɔɔ bhibhe, sɛɛ yɩˈɩ ɔ ˈwlʋnɩ ˈnɩ?

Nɩkpɛ -bhlʋ mɔɔ -gägänɩ -mɔmɔɔ ˈn ɔ ˈɲɔɔ -ɔɔzʋkälii a ˈdɩ. Wa yoo aˈbhë ˈdɩ ˈɲɛ nɩɩ ɔ nɩ ˈbhlenɩ oo, ɔˈɔ ˈnwi ˈmö.

Wa ˈkä nɩkpɛ ˈwʋ -gägänɩ -ɔɔzʋkalii a za, ɛˈɛ -bhö ˈbhlibhliwɛlɩ. Yɩ kä ˈŋli ˈn wa nʋä glasɛ -mumuë -ɔɔzʋkälii ˈwlu.