Sanggah lape ibotoh si Annette aha na sihol masa, idabuhkon ma ia. Ia mangkatahon, “Dob ai, husuba ma manlawan.” “Husuba marsurak, tapi lang kaluar sorangku. Huonjar, hutendang, hutenju janah huraok do ia. Tapi, sanggah huahapkon ahu hona pisou, lang boi be ahu maraha pe.”

Anggo sonai na masa bamu, aha na ibahen ho?

Age pe domma marjaga-jaga ho, sontohni sanggah kaluar rumah borngin, tapi na masambor boi do masa. “Seng bani halak na lingkat hape hamonangan maradu”, nini Bibel, “seng halak na pandei gabe harosuh; tapi haganupan sidea tunduk do bani panorang ampa na masa”.​—Parambilan 9:11.

Songon si Annette, bahat do na maposo diserang halak na so itanda. Na leganni diserang halak na itanda songon hade-hadeni. Ai ma na masa bani si Natalie. Sanggah marumur sapuluh tahun, dong sada garama tetanggani na menyerang ia secara seksual. Ia mangkatahon, “Halani ai, mabiar tumang anjaha maila do ahu janah lang hupatugah bani ise pe.”

Pusok ope uhur ni si Annette mardingat na masa ai. Ia mangkatahon, “Sai hudingat do ai tiap borngin. Aturanni boi do hulawan ia anggo lobih koras ahu marusaha. Tapi, dob itusuk ahu, gabe galek ma ahu halani biarhu. Lang boi be ahu maraha, tapi pangahaphu namin boi do.”

Sonai homa pangahap ni si Natalie. Ia mangkatahon, “Namin, ulang urah porsaya ahu bani sasada halak. Domma ihatahon namatorasku, anggo marguro-guro hu darat, maningon rap do ahu pakon kakakku. Tapi, seng hutangar. Huahap halani ai ma garama ai menyerang ahu. On parohkon bahat hasunsahan bani kaluargangku, ahu pe pusok tumang do uhurhu halani ai. Siboratan ma on bangku.”

Anggo dos do pangahapmu songon si Annette pakon si Natalie, maningon botohonmu do, lang dong na marosuh diperkosa. Dong piga-piga halak mangahap, on lang masalah na serius, somal do dalahi sonai. Dong homa na mangkatahon na ipancing anak boru ai do ia. Aha pe pandapot ni halak, lang suman sasada halak iperkosa. Anggo ho diperkosa, lang salahmu ai!

Tongon, urahan do mangkatahon, “lang salahmu ai”. Tapi mahol do mangkaporsayai ai. Adong do halak na lang ra patugahkon aha na dob masa, janah ipaturutni do lalab pusok uhurni. Tapi anggo lalab ho sip, ise ma na sonang—ho atap si pemerkosa ai? Jadi, pingkirhon ma aha do na sihol bahenonmu.

Bibel patugahkon banta, sanggah marsitaronon si Job, nini ma, “Marsahap ibagas hapaeton ni tonduyhu.” (Job 10:1) Anggo ra do ho patugahkon ai, tontu adong do gunani. Patugah ma ai bani halak na boi iporsayai ho, ase tonang pangahapmu janah lang be pusok uhurmu.

Pangahap ni si Annette tongon do ai. Ia mangkatahon, “Husaritahon ma ai bani hasomanku. Ia mangojur ahu patugahkon ai bani dua sintua i kuria. Untung ma hubahen sonai. Dua sintua ai piga-piga hali marsahapi pakon ahu. Sidea mambere ojur-ojur na topat—lang hasalahanku ai. Tongon lang salahku ai.”

Si Natalie pe marsarita do bani namatorasni. Ia mangkatahon, “Iurupi sidea do ahu. Iojur do homa ase hupatugah ganup na masa ai. Jadi, lang be pusok uhurhu atap pe mansalahkon diri.”

Tarapoh do homa uhur ni si Natalie anggo martonggo. Ia mangkatahon, “Marsahap bani Naibata mambahen ahu tarapoh. Sanggah lang boi ahu curhat bani na legan, hupatugah ma ai ganupan bani Naibata ibagas tonggo. Dob ai, damei ma pangahaphu.”

Tontu satuju do ho, adong do “panorang manambari”. (Parambilan 3:3) Jaga ma hasehaton ampa pingkiranmu. Sungkup modom. Anjaha marondos ma bani Jahowa, Naibata sipangapoh in.​—2 Korint 1:3, 4.

Anggo iarahkon pacarmu ho mambahen na lang suman, torang ma hatahon, “Ulang bahen sonai!” atap “Padaoh tanganmu on!” Ulang mabiar ho itadingkon halani ai. Anggo putus do hanima halani ai, berarti lang sosok ia gabe pacarmu! Patut do dapotmu dalahi na sidearan na mangkargai ho pakon prinsipmu.

“Sanggah SMP ahu, gati do tali BH-ku itarik-tarik dalahi-dalahi na i sikkolahku janah mangkatahon hata na lang sopan—songon, sodap do anggo ‘main’ pakon sidea.”​—Coretta.

Pandapot mu, na maraha do dalahi-dalahi ai?

1. Marguro-guro do?

2. Manggoda do?

3. Mambahen pelecehan seksual do?

“I angkot, dong sada dalahi na mangkatahon na lang suman janah manjolom-jolomi ahu. Mintor hupastaphon ma tanganni anjaha husuruh ia pindah. Itorihni, songon na podouan dassa ahu.”​—Candice.

Pandapotmu, na maraha do dalahi ai hu si Candice?

1. Marguro-guro do?

2. Manggoda do?

3. Mambahen pelecehan seksual do?

“Tahun na lewat, dong sada dalahi sai mangkatahon rosuh mangidah ahu, janah mangarahon ahu pacaran. Sai hutolak do. Sipata, ijolomni do tanganku. Huhatahon do, ‘Ulang!’ tapi lalab do ibahen. Sanggah mangikat tali sipatu ahu, ipokpokni ma ihurhu.”​—Bethany.

Pandapotmu, na maraha do dalahi ai?

1. Marguro-guro do?

2. Manggoda do?

3. Mambahen pelecehan seksual do?

Tolu sungkun-sungkun ai, balosni ganup ai ma C.

Aha do leganni pelecehan seksual hun marguro-guro atap manggoda?

Pitah sapihak do na mangkarosuhkon pelecehan seksual. Hassi pe domma ilarang, tapi lalab do inunut.

Serius do pelecehan seksual ai. Boi do ai gabe kekerasan seksual.