Rempet-rempet aku idakepna janah idampeskenna nina Serli. ”Serko aku tapi la lit soraku si ndarat, kuusahaken ngelawansa, kutukuli ia , kupekpeki, kusorong janah kucakari ia. I bas paksa e me aku ngejapken dagingku tertebak piso. Lemas kal aku, janah lanai kueteh kai pe.”

Adi kam i bas situasi e, uga reaksindu?

Amin gia kam enggo erban persikapen—banci saja enggo metenget kam sanga ndarat I bas rumah nari paksa berngi—tapi hal si la mehuli banci saja terjadi. ”I bas perlumban labo lalap si meter kiam si menang”, nina Pustaka, ”bage pe labo kalak si mbages pemetehna si terberita. Tapi kerina nge kalak banci kena sial.”—Pengerana 9:11.

Piga-piga anak muda, bagi Serli, iserang kalak si la itandai. Si debanna ka iserang tetanggana ntah pe anggota keluargana. Enda me si terjadi man Natalia paksa umurna sepuluh tahun, sanga ia ianiaya sekalak anak perana si deher rumahna secara seksual. ”Seh kal aku melana ras mbiar, jadi tangtangna la aku nggit cerita man ise pe” nina Natalia.

Serli terus denga erjuang ngelawan perasan ersalah. ”Lalap denga kuinget kejadin i bas berngi e”, nina. ”Arusna tergegehen aku ngelawan ia sanga si ndai. Tapi kenca aku tertebak, mis lanai kai pe kueteh perban biarna. Lanai banci aku erkai pe, tapi ukurku ngataken arusna ngasup denga aku ngelawan ia.”

Natalia pe terus erjuang ngelawan perasan ersalah. ”Arusna min la mis aku tek man kerina kalak”, nina. ”Orang tuaku ngataken maka adi sangana kam main-main deher rumah ula tading-tadingken kakandu, tapi la kubegiken. Erkiteken si e, emaka lit kesempaten tetanggaku nerang aku. Kejadin e erban keluargaku rate mesui, salah kal kuakap bangku. Eme si erbahan latih ukurku.”

Adi kam nggejapken kai si igejapken Serli ras Natalia, sadarilah maka kalak si iperkosa e labo nggit ngelakokenca. Lit ka si ngeremehken masalah enda, alu ngataken, ”gelarna pe dilaki janah si korban nge si mancing-mancingsa”. Tapi la lit sekalak pe si pantas iperkosa. Adi kam si jadi korban pemerkosan labo kam si salah!

Tentu saja, ngoge pernyataan ”labo kam si salah” enda menukah; si mesera eme kap tek adi kam memang labo salah. Piga-piga salah iakapna bana janah ngenanami perasan negatif perban la nggit nuriken kejadin e. Tapi ise si paling iuntungken adi kam sinik saja—kam ntah si pemerkosa? Guna kepentingenndu, perlu iukurindu pilihen si deban.

Pustaka mpebetehken man banta sanga melala masalah Jop, ia nuriken, ”kubelasken ateku ukurku si ngilas i bas pusuhku!” (Jop 10:1) Kam banci ndatken manfaat si seri alu ngelakoken hal si bali bagi Jop. Adi kam ngerana man kalak si banci itekindu, kam banci reh tenangna janah bebas arah tekanen emosi.

Serli nggejapken payo kal ayat e. Nina Serli, ”Ngerana aku ras sekalak teman meriahku, janah ia nuruh aku ngerana ras dua pertua si lit i bas runggun. Untunglah kuikuti katana. Pertua e ncakapken masalahku piga-piga kali janah mereken kata-kata pergegeh, nina man bangku—’Enda labo salahndu. Tuhu-tuhu labo salahndu’.”

Enda me si igejapken Natalia kenca ia ngerana ras orang tuana. ”Kalak enda nampati aku”, nina Natalia. ”Orang tuaku nuruh aku nuriken masalahku, hasilna lanai latih ukurku.”

Natalia pe terhibur sanga ia ertoto. ”Ngerana man Dibata nampati aku kal”, nina, ”khususna sanga aku lanai ngasup nuriken isi pusuhku man kalak si deban. Sanga aku ertoto, aku banci bebas ngerana. Aku pe nggejapken ketenangen ras kedamen.”

Kam pe banci nggejapken maka tuhu lit ’waktu pepalemken’. (Pengerana 3:3) Perdiateken kesehaten fisik ras emosindu. Cukuplah istirahat. Janah si pentingna andalken Dibata Jahwe sumbul kerina pengapul.—2 Korinti 1:3, 4.

Adi kam sekalak singuda-nguda si igoda guna ngelakoken perbahanen si la mehuli, labo salah adi ikatakenndu, ”Ula kam macam-macam!” ntah pe, ”Ula aku kuit-kuitndu!” Ula kam mbiar ngerawaisa amin gia ia rondongndu. Adi gara-gara e kam putuskenna, ia labo pantas jadi rondongndu! Kam metunggung ndatken dilaki si mehuli, dilaki si ngergai kam bage pe pendirin moralndu.

”Sanga aku sekolah, lit anak dilaki si meriah akapna narik-narik tali bh-ku ras mbelasken kata kata si la sopan—misalna bagi, seh kal tabehna adi nggit erhubungen seks ras ia.”—Caca.

Menurutndu, dilaki e paksana:

1. Main-main?

2. Ngerayu?

3. Ngelecehken secara seksual?

”I bas motor, sekalak dilaki ngataken kata-kata si amoral man bangku ras kuit-kuitna aku. Kupekpek tanna ras ngataken ula aku kuit-kuitndu. Itatapna aku bagi natap kalak mehado.”—Sindi.

Menurutndu, kai si paksana ilakoken dilaki e man Sindi?

1. Main-main?

2. Ngerayu?

3. Ngelecehken secara seksual?

”Tahun si lewat, lit sekalak dilaki si rusur ngataken ngena atena aku ras sura-surana gelah kami ngerondong amin gia lalap kukataken aku la nggit. Maun-maun, ielus-elusna tanku. Kurawai ia, tapi la ibegikenna aku. Kenca e, sanga aku ngiket nali sepatuku, ipekpekna buta-butaku.”—Betani.

Menurut pendapatndu, kai si sangana ilakoken dilaki e:

1. Main-main?

2. Ngerayu?

3. Ngelecehken secara seksual?

Pilihen arah telu penungkunen i datas si benar eme C.

Kai si erban pelecehen seksual berbeda ras ngerayu bage pe main-main?

Pelecehen seksual inikmati sada pihak saja. Enda terus ilakokenna amin gia enggo ilarang.

Pelecehen seksual e serius. Janah e banci mengarah ku kekerasen seksual.