Antes realiza si Annette si cosa ta pasa, ya buta ya con ele el hombre na tierra. “Ya pricura yo hace todo para imbisti con ele,” ya habla si Annette. “Ya pricura yo grita pero nuay voz ta sale. Ya rimpuja yo con ele, ya patea, ya bombia y yan cambras. Ya sinti ya lang yo ya lansia conmigo y nuay mas yo cosa ya puede hace.”

Si sucede este contigo, cosa tu hace?

Maskin pa preparao tu​—siguro alerto tu mientras ta camina apuera denoche—​posible siempre tiene mal cosas sucede. “No sabe ganeh ustedes si cosa ay pasa mañana,” ya habla el Biblia.​—Santiago 4:14.

Cuanto maga jovenes igual con Annette ya queda victima del maga gente que no conoce sila. Mientras el otro, conoce sila o familia pa gane. Diez año lang si Natalie cuando ya molestia con ele el un teenager que vecinos diila. “Ya tiene gayot yo miedo y ya tiene huya poreso del primero nuay yo con quien ya avisa,” ya habla le.

Ta sinti siempre culpable si Annette na cosa ya sucede. “Pirmi yo ta pensa si cosa ya sucede aquel noche,” ya habla le. “Ta sinti yo que era tiene pa yo cosa ya hace para imbisti con ele. Pero el deverasan, despues conmigo lansia, ya tiene gayot yo miedo. Nuay mas yo cosa ya puede hace pero ta sinti yo que debe tiene yo cosa ya hace.”

Ya sinti tambien si Natalie que culpable le. “Gendeh era yo debe sobra man confianza,” ya habla le. “Ya habla diamon mayores que si juga kame apuera, junto kame de mio hermana pirmi pero nuay yo creé. Poreso ta sinti yo que ya dale yo oportunidad con el diamon vecinos para hace quel conmigo. Afectao el diamon familia na cosa ya sucede y ta pensa yo que de mio quel culpa. Yan dificil gayot yo enfrenta con ese.”

Si igual tu ta sinti con Annette o Natalie, pone na pensamiento que gendeh querrer del victima el cosa con ele ya pasa. El cuanto ta pensa que gendeh se serioso y querrer pa gane del maga victima el cosa kanila ya pasa. Pero gendeh debe man rape maskin con quien. Si ya queda tu victima de este clase de crimen, gendeh se de tuyu culpa!

Siempre, facil lang habla que “gendeh se de tuyu culpa” pero dificil creé con ese. El otro nuay con quien ya avisa poreso ta sinti sila culpable y tiene negativo emocion. Pero quien beneficia si gendeh tu avisa​—etu o el quien yan rape contigo? Tiene mas buen opcion para contigo.

El Biblia ta habla que cuando ya experiencia grabe problema si Job, ya habla le: “Hay habla yo de mio grabe sufrimiento!” (Job 10:1) Puede tambien tu beneficia si hace tu se. Si man cuento tu con el un persona que ta confia tu, puede se ayuda para man recover tu na cosa ya sucede y sinti tu alivio.

Ese el cosa ya hace si Annette. Ya habla le: “Yan cuento yo con el de mio amiga y ya habla le conmigo que man cuento con el maga anciano na congregacion. Alegre yo cay ya hace yo con ese. Manada beses sila yan cuento conmigo y ya habla conmigo el cosa yo necesita oi​—que gendeh de mio culpa el cosa ya sucede. Nuay yo culpa.”

Yan cuento si Natalie con el de suyu mayores si cosa ya sucede. “Ya suporta sila conmigo,” ya habla le. “Ya habla sila conmigo que man cuento acerca si cosa ya sucede y ya puede quel ayuda para gendeh yo queda sobra de triste y rabiao.”

Ya puede tambien ayuda con Natalie el rezo. “Ya puede ayuda conmigo el rezo,” ya habla le, “especialmente na maga tiempo que ta sinti yo que nuay yo con quien puede man cuento. Na rezo, ta puede yo habla si cosa yo quierre habla. Ya queda yo calmao y tiene paz na pensamiento.”

Puede tambien tu experiencia que tiene “tiempo para cura.” (Eclesiastes 3:3) Cuida con el de tuyu cuerpo, evita pensa negativo y pirmi pensa maga cosas bueno. Descanza si necesita. Y mas pa na todo, confia con Dios Jehova quien dale contigo comforta.​—2 Corinto 1:3, 4.

Si un mujer tu y tan pressure contigo hace el un cosa que gendeh bueno, nuay cosa malo si habla tu, “No se hace!” o “No agarra conmigo!” No tiene miedo que deja contigo el de tuyu novio. Gendeh tu necesita ansina clase de novio! Mas bueno el un hombre quien sabe respeta contigo y de tuyu maga principio.

“Cuando highschool yo, ta hala el maga hombre con el strap del de mio bra atras y tan cuento bastos​—igual como man enjoy gayot yo si man sex yo kanila.”​—Coretta.

Para contigo, el cosa ba ta hace maga hombre

1. Broma?

2. Flirting?

3. Sexual harassment?

“Na bus, un hombre el ya habla cosa-cosa bastos y ya agarra conmigo. Ya pega yo de suyu mano y ya manda con ele sale. Ya mira le conmigo dol aquel yo loca.”​—Candice.

Para contigo, cosa ta hace este hombre con Candice?

1. Broma?

2. Flirting?

3. Sexual harrassment?

“Del ya pasa año, un hombre el pirmi conmigo ta habla que quierre le conmigo y quierre le man date kame maskin pa gendeh yo ta acepta de suyu invitacion. Tiene vez, ta agarra le de mio brazo. Ya habla yo con ele que no mas quel hace pero ta continua siempre le. Y despues, cuando ta amarra yo de mio sapatos, ya pega le de mio buli.”​—Bethany.

Na de tuyu opinion, el accion de este hombre:

1. Broma?

2. Flirting?

3. Sexual harassment?

El justo contestacion na este tres situacion amo el C.

Porque otro el sexual harassment na flirting o broma?

El sexual harassment ta continua maskin pa ta habla el victima que no mas quel hace. El persona quien ta hace con ese ta abusa con otro.

Serioso el sexual harassment. Puede este resulta na sexual violencia.