“Ruahlopi in a ka dawh i a ka thluk. Ka thazaang dihlak chuah in ka nam i ka kut kha a bengh. Awreng chuah in ka au ko nain ka aw a chuak lo. Ka nam, ka chuih, ka thongh, ka kheuh ko nain namte in a ka sawhhnik i ka cawl ngam ti lo” tiah Annette nih a ti.

Cubantuk thil sining na ton ahcun zeitindah na lehrulh lai?

Zan ah a leng chuah lioah i ralrin in a hlankan in i timhtuahcia hmanh­ah thil ṭhalo ton khawh a si. Baibal nih hitin a ti: ‘Tlik zuamnak ah hin khul a rangmi nih teinak an hmu zungzal lem lo. Mifim mi hi duhdim in an um zungzal lem lo. Vanchiatnak hi mi zei cung paohah a tlung ko.’​—Phungchimtu 9:11.

Mino cheukhat cu Annette bantukin mising pakhat i ningcang loin pehtlaihnak an tong. Cheukhat tu cu theihhngalhmi asiloah chungkhar mi pakhat i ningcang loin pehtlaihnak an tong. Natalie cu Kum 10 a si ah an innpa kum hra fai a simi pakhat i tlaihhremnak a tong. “Ka ṭih i ka ning a zah tuk caah ahohmanh ka chim ngam hna lo” tiah a ti.

Annette nih a cangmi thil ruangah keimah palhnak zong aa tel tiah a ruah. Hitin a ti: “Mah zan kha ka philh kho lo. Ruah loin ka um kho lo. Mah nakin fak deuh in rak nam ning law a ṭha lai tiah ka ruah. A taktak ti ah cun namte in a ka sawhhnik hnuah ka ṭih tuk caah ka cawl ngam ti lo. Zeihmanh ka tuah kho ti lo. Asinain pakhatkhat ka rak tuah awk a si.”

Natalie zong nih ka palh tiah a ruah peng rih. “Zumh kaa fawih tuk cu ta. Ka nu le ka pa nih innleng ah lente kaa celh tikah na unu he umṭi u tiah an ka ti. Asinain ka ngai lo. Mah mipa kha caanṭha ka pek bantuk a si. Mah thil sining ruangah ka chungkhar pawl an lung a fak tuk. Cuti an lung a fahmi cu keimah ruangah a si caah ka palh tuk. Mah ruangah ka ngaih a chia tuk.”

Annette le Natalie bantukin na intuar ve ahcun zeitindah na tuah lai? Tlaihhrem na si ahcun na duh lo buin a si ti kha i cinken. Cheukhat nih mah kha a sawhsawh men in an ruah i ‘pa pei a si cu cutin a tuah lai ta, nu pei umtu zia a thiam lo cu’ tiah an ti. A taktak ti ah cun ahohmanh tlaihhrem dingmi tiah an um lo. Nang zong cu bantuk tlaihhremnak na ton ahcun nangmah palh a si lo.

“Nangmah palh a si lo” tiah chim cu a fawi ko nain cohlan awk tu cu a har. Cheukhat cu lungretheihnak kha chim loin an um, palhnak ka ngei tiah an ruah peng i a ṭhalomi ruahnak zong an hung ngei. Asinain chim loin na um ahcun aho caah dah a ṭhat lai? Nangmah caah maw, aan tlaihhremtu caah dah? Nangmah caah ṭhatnak hmuh na duh ahcun chim loin um hlah.

Miding Job nih lungretheihnak fakpi in a ton lioah a intuarnak kong kha hitin a ti: “Ka phunzainak hi i suum hin loin ka chim ko lai. Lungfak hring­hran in ka chim ko lai.” (Job 10:1) Nang zong cutin na chim ahcun ṭhatnak na hmuh lai. Na zumhmi pakhat kha tlaihhrem na sinak kong na chimh a si ahcun na lungretheihnak a zor deuh lai.

Annette nih a intuarnak kha a chim caah a lungretheihnak a zor deuh. Hitin a chim: “Ka hawikom ṭha pakhat kha ka intuarnak kong ka chimh tik­ah Khrihfa upa pawl chim hna tiah ruahnak a ka cheuh. Cutin ka tuahmi cu ka caah a ṭha. Voihnih, voithum an ka leng i keimah palh a si lonak kong kha an ka chimh. Mah cu theih ka duh bikmi bia a si.”

Natalie zong a nu le a pa kha a chimh hna tikah a lungretheihnak a zor ve. Hitin a chim. “Ka nu le ka pa nih ka tonmi kong kha chim awkah tha an ka pek. Mah tikah ka ngaihchiatnak le ka thinhunnak a zor deuh.”

Natalie cu thlacamnak zongin hnemhnak a hmu. “Ahohmanh ka chimh ngam hna lo lioah Jehovah sinah thla ka cam. Mah tikah midang kha ka chimh ngam hna. Lungdaihnak ka hmu” tiah a ti.

Na ca zongah “damter caan” a herh. (Phungchimtu 3:3) Pumsalei he lungthinlei he na ngan a dam nakhnga i ralring. Mitkuh vuai tein it. A biapi bikmi cu hnemhnak taktak a kan petu Jehovah Pathian kha i bochan.​—2 Korin 1:3, 4.

A thiang lomi thil tuah awkah hnek na si ahcun “Ka ti hlah!” asiloah “Ka tawng hlah!” tiah hlangfang tein chim cu a ṭha bikmi a si. Na tlangvalpa nih aan kaltak ding kha ṭih hlah. Mah bantuk ruang men ah aan kaltak ahcun nangmah he aa phut lo caah a si. Na pum kha a sunsak i na phunglam a upatmi pasal ṭha lawng nangmah he a phumi a si.

“Sianglairuun ka kai lioah pa pawl nih ka hnulei in ka bawli kha an dawh i anmah he voikhat hrawng na kan ihpi ahcun a nuam tuk lai tiah bia ṭha lo an chim tawn.”​—Coretta.

Mah pa hna i an tuahsernak cu zeitindah na ruah?

1. Caponak.

2. Duhhle dawtnak.

3. Tlaihhrem duhnak.

“Sianginn mawṭaw cungah pa pakhat nih duhhle dawtnak bia hna a chim i a ka tlaih. A kut kha ka bengh i ka tlai hlah tiah ka ti. A hrutmi hei sining law cu bang in a ka zoh.”​—Candice.

Mah mipa nih candice kha zeidah a tuahmi a si tiah na ruah?

1. Caponak.

2. Duhhle dawtnak.

3. Tlaihhrem duhnak.

“A luanciami kum ah pa pakhat nih a ka duhnak kong, keimah he komh a duhnak kong kha atu le atu a ka chimh. Ka al zongah a duh lo. A caancaan ah ka kut kha a ka tlaih. Ka tlai hlah tiah ka ti zongah a duh lo. Ka kedan hri ka ṭem lioah ka ṭawk ah a ka bengh.”​—Bethany.

Mah mipa i a tuahsernak cu zeitindah na ruah?

1. Caponak.

2. Duhhle dawtnak.

3. Tlaihhrem duhnak.

Biahalnak pathum ningin a phi cu C a si.

Tlaihhrem duhnak cu duhhle dawtnak le caponak he zeitindah aa dan?

Tlaihhrem duhnak cu kapkhatlei lawngin tuahmi a si. Tuah hlah ti

zongah a ngah lo.

Mah cu biapi ah chiah dingmi a si. Tlaihhrem taktaknak hmanh a chuak kho.