Cɛɛ dɔ benna Annette kan k’a ta k’a fili duguma. O tuma na le Annette y’a lɔn o tigi tun b’a fɛ ka min kɛ a la. Annette ko: “N’ ye n’ seko bɛɛ kɛ k’a ɲini ka n’ yɛrɛ bɔ a bolo. N’ tun b’a fɛ ka kule, nka n’ kaan tun tɛ bɔra. N’ y’a tigi ɲɔndi, k’a tan, k’a bugɔ ni bolokuru ye ani k’a siɲɛ. O tuma lo la a ye n’ sɔgɔ ni muru ye. N’ fari bɛɛ fagara.”

N’i tun be Annette nɔɔ na, i tun bena mun lo kɛ do?

N’i be bɔ sufɛ, n’a sɔrɔ i labɛnnin lo ani i b’i yɛrɛ kɔrɔsi kosɔbɛ. O n’a ta bɛɛ, koo jugu be se k’i sɔrɔ. Bibulu b’a fɔ ko: “Mɔgɔ minw seen ka teli, a ma kɛ ko ɲɔgɔndanboli be diya olu dama na. . . . Boɲa te la lɔnnikɛla kan. Sabu, barinako be se k’u bɛɛ sɔrɔ.”—Waajulikɛla 9:11.

I n’a fɔ Annette, sunguru dɔw tɛ mɔgɔ minw lɔn, o tigiw lo be ben u kan ka la n’u ye. Nka, dɔ wɛrɛw lɔnbagaw wala u somɔgɔ dɔw yɛrɛ lo be ben u kan. Natalie tun be ni saan tan dɔrɔn ye, tuma min na a sigiɲɔgɔn dɔ benna a kan. O tigi tun ye kanbele lo ye. Natalie y’a fɔ ko: “Ne siranna kosɔbɛ ani n’ maloyara fɔɔ n’ tun t’a fɛ k’o fɔ mɔgɔ si ye.”

Koo min kɛra Annette la, a bele b’a yɛrɛ jalaki o kosɔn. A y’a fɔ ko: “Min ye n’ sɔrɔ o loon sufɛ, n’ tora ka miiri o la. N’ b’a miiri ko n’ tun ka ɲi ka n’ seko bɛɛ kɛ walisa a ka n’ to yen. Nka, a ye n’ sɔgɔ ni muru ye tuma min na, n’ fari bɛɛ fagara siranya bolo. N’ tun tɛ se ka foyi kɛ tugun. Nka, ne fɛ n’ tun ka kan ka koo wɛrɛ kɛ.”

Natalie fana b’a yɛrɛ jalaki ko: “N’ tun man ɲi ka la n’ yɛrɛ la kojugu. N’ bangebagaw tun y’a fɔ ne ni n’ dɔgɔmuso ye ko n’an be tulon kɛra kɛnɛma, an ka to ɲɔgɔn fɛ. Nka, ne ma mɛnni kɛ u fɛ. O kama, ne b’a miiri ko ne lo ye sababu di an sigiɲɔgɔn ma a ka koo jugu kɛ n’ na. Min ye n’ sɔrɔ o ye n’ somɔgɔw dusu kasi kosɔbɛ. Ne b’a miiri k’o dusukasi ye ne nɔɔ lo ye. O miiriya yɛrɛ lo be n’ tɔɔrɔla kojugu.”

N’i be ni Annette ni Natalie ka miiriya ɲɔgɔn ye, a to i hakili la ko a ma kɛ komi i sɔnna o koo ka kɛ i la. Dɔw b’o koo ta tulonko ye. U b’a fɔ ko kanbelew nɔɔ tɛ, nka u benna sunguru minw kan, olu ɲiniko lo. Nka tiɲɛn na, mɔgɔ si man kan n’o ye. N’u y’o kojuguba ɲɔgɔn kɛ i la, i k’a lɔn ko ele nɔɔ tɛ!

K’a kalan ko “ele nɔɔ tɛ,” o ka nɔgɔ. Nka tiɲɛn na, a man nɔgɔ ka la o la. Koo minw kɛra u la, dɔw b’o to u kɔnɔ, u t’o fɔ mɔgɔ si ye. O kama, u b’u yɛrɛ jalaki kojugu ani u be ni miiriya tilenbaliw ye u yɛrɛ koo la. N’i ma foyi fɔ, o be jɔn lo mako ɲɛ do? Ele wala mɔgɔ min benna i kan? A ka fisa i ka fɛɛrɛ wɛrɛ ɲini.

Bibulu b’a fɔ ko tuma min na cɛɛ tilennin Zɔbu dusu kasira kosɔbɛ, a y’a fɔ ko: “Ne bena n ka dusukasikuma fɔ.” (Zɔbu 10:1). N’i ye Zɔbu ladegi, o bena i nafa. N’i kumana i teri sɔbɛ dɔ fɛ, a bena i dɛmɛ ka sɔn a ma ko u y’i waajibiya le ka cɛnimusoko kɛ. O bena i dɛmɛ fana ka see sɔrɔ i ka dusukasi kan.

Annette y’a kɔrɔsi k’o ye tiɲɛn ye. A y’a fɔ ko: “Ne kumana ni n’ teri sɔbɛ dɔ ye ani a ye n’ jija ko n’ k’o fɔ diinan mɔgɔkɔrɔ fila ye n’ ka kafo kɔnɔ. N’ sera k’o kɛ, o diyara n’ ye. U ye baro kɛ ni n’ ye siɲɛ caaman o koo la. U y’a fɔ n’ ye ko, min kɛra, n’ nɔɔ tɛ ani ko n’ man ɲi ka n’ yɛrɛ jalaki koo si la. N’ tun b’a fɛ k’o lo mɛn.”

Koo min kɛra Natalie la, a y’o fɔ a wolobagaw ye. A ko: “U ye n’ dɛmɛ ani u ye n’ jija ka kuma o koo la. O lo y’a to n’ diminin tɛ kojugu ani n’ dusu kasinin tɛ i ko fɔlɔ la.”

Delili fana ye Natalie dusu saalo. A y’a fɔ ko: “Delili ye n’ dɛmɛ, sanko tuma minw na a tun ka gwɛlɛ n’ ma ka n’ kɔnɔkow fɔ n’ mɔgɔɲɔgɔn dɔ ye. Ni n’ be delili kɛra, n’ be se ka n’ kɔnɔko bɛɛ fɔ Ala ye. Delili be ne lafiya ani ka n’ hakili sigi.”

Ele fana be se k’a ye ko “kɛnɛyali tuma” be yen (Waajulikɛla 3:3, ABM). I janto i ka kɛnɛyako la ani kana a to miiriya juguw ka see sɔrɔ i kan. Lafiɲɛ ka ɲɛ ani min yɛrɛ kɔrɔtanin lo, i jigi la Jehova kan ale min ye dususalo bɛɛ tigi Ala ye.—2 Korɛntikaw 1:3, 4.

N’i ye sunguru ye ani i tericɛ b’i lasunna ka kakalayako kɛ, kojugu tɛ ka lɔ kelen kan ani k’a fɔ ko: “A dabila!” wala “I bolo bɔ n’ kan!” Kana siran k’o kɛ sabu i t’a fɛ aw ka teriya ka sa. N’a ye aw ka teriya sa o kosɔn, o kɔrɔ ko a tun tɛ teri sɔbɛ ye! I ka kan ni cɛɛ wɛrɛ ye min ka fisa n’ale ye: cɛɛ min bena bonya la i kan ani n’i ko i tɛ min kɛ, a be sɔn o ma.

Coretta ko: “Kolɛzi la, kanbelew be n’ ka sutiɲɛn kɔfɛla sama ani u be kuma nɔgɔninw fɔ n’ ma. U b’a fɔ ko ni ne lara n’u ye, n’ tɛna nimisa o la.”

E ka miiriya la,

1. Tulon lo wa?

2. Sungurutigɛ lo wa?

3. U b’a lasunna ka la n’a ye wa?

Candice ko: “Mobili kɔnɔ, kanbele dɔ y’a daminɛ ka kuma kolon fɔ n’ ma ani ka n’ minɛ. N’ y’a bolo sama ka bɔ n’ kan ani n’ y’a fɔ a ye ko a ka taga ka bɔ n’ kɔrɔ. A ye n’ filɛ i n’a fɔ n’ ye fatɔ ye!”

E ka miiriya la,

1. Tulon lo wa?

2. Sungurutigɛ lo wa?

3. A b’a lasunna ka la n’a ye wa?

Bethany ko: “Salon, kanbele dɔ tora k’a fɔ n’ ye ko n’ koo ka di ale ye ani ko n’ ka kɛ a ka sunguru ye hali k’a sɔrɔ n’ tun tɛ sɔnna. Tuma dɔw la, a tun be n’ bolo mɔmɔ. N’ y’a fɔ ko a k’a dabila, nka a bele tun b’a la. Loon dɔ, n’ tun be n’ ka sanbara juru sirila, a ye n’ jukunan bugɔ n’a bolo ye.”

E ka miiriya la,

1. Tulon lo wa?

2. Sungurutigɛ lo wa?

3. A b’a lasunna ka la n’a ye wa?

O koo saba nunu na, jaabili ɲuman ye yɔrɔ sabananw lo ye.

Ka mɔgɔ lasun ka la n’a ye, mun na o ni sungurutigɛ ni tulon tɛ kelen ye?

U be min lasunna ka la n’a ye, o tigi sɔnnin tɛ. Hali n’a ko u k’a dabila, u bele be to k’a niin tɔɔrɔ.

Tulonko tɛ sabu a laban, u be se k’a tigi waajibiya ka la n’a ye.