Nuta ə gbea Annette pili ə too nɔi ɓa, yɛ təɠa pa ɲaakaai yii di kaa bɔ di gɛ la. Annette kaa kɛi ma : “ Ŋi mɛni kəlee kɛ yii yaan ɲee ho lɔ. Ŋi bili, ŋi toma, kəlaa nwóó ho kulɔ, ŋi duwɔ, ŋi gwənin, ŋi dan. Naalowai kpɔlɔɔ ɓə ə mɔ́ la a ɓowa. Hwaŋa lɔpee ta ho kea lɛɛ ɲə́i. ”

Akɛ kɛ a yɛ́, lə ɓə ə́ li gɛ ?

Ə ma kɛ yaa ə́ kpɔɔ kpɛtɛ, kpini a pɛlɛ ya kɛi li kɛɛnaa ta yɛ́ ɓo gili-gili, mɛnii ə́ kili ho kɛ ma a pɛli həlii yɛ́. “ Nui maahulaa gilɛ həɠəi, ya lɔ hwəi a gilɛ həɠɛɛ dɔlɔ hɔlɔɓo. Kili mɛni kwɛli nua lɔ hwəi da maawiɛ hɔlɔɓo. Maahɔlɔɓo, mɛni ɲaanɛɛ da ŋaanwanaa a həli nu kəlee ɓa,” a lowai yii di kili ho la ma (Kilimaa mun 9:11).

Yɛ pələi lɔ Annette nwɛi ə kɛ la, muhəɠəninɛ taɠaa kaa laa, nui a mɛni huwui tii kɛ a diɛ, hwa kɛ a di kɔlɔnmun. Kəlaa daɠaa di wɛi a kɛ a di kɔlɔnmun, awala kɛtii di yəi bɛlɛnmun da. Natalie kaa a kwəlan bou lokolo. Nui too mɛi, ə kɛ lɔ di yəi bɛlɛ laaləi kwɛlɛ. Natalie kaa kɛi ma : “ Ɓɛlowai mɛnii tii ə tɛɛ la a ninɛ, və́ mo nuta ɓa, maahɔlɔɓo ŋi kɛi ɲɔu kpɔ kɛnɛ, gɛ́ nwumɛ. ”

Annette kaa lɔ nii ma yɛ gbɔɔ hɔn ɉəɠə mɛnii tii hu. Gaa kɛi ma : “ Mɛnii tɛɛ gbinii tii hu, gáá lɔ nii ma gɛ́ gíliŋahiɛ ma. Gáá kɛi ma maanɛɛ kɛ ŋi váŋá həɠə kpɔ kɛnɛ, ŋi bili. Ɓɛlowai ə mɔ́ la a mowa, ŋi ɲɔu kpɔ kɛnɛ. Və́ pɛli mɛni lɔpee ta kɛi, kəlaa gáá kɛi ma maanɛɛ kɛ ŋi mɛni ta kɛ. ”

Natalie yaa kpɛli gaa gbɔɔ hɔn ɉəɠəi. Gaa kɛi ma : “ Maahonɛɛli kɛ və́ laa gbɔ́ɔ́ la kɛnɛ. Ŋɔ́ nua di kɛ bɔ ɲáá kwa nəɠə nɛɛnu ku lɛɛ ku kee pɔ kuɔ pə́lə́ kɛ ɲɛnɛɛ, kəlaa ŋi kulɔ di woo mu. Gáá kɛi ma ɲáá ɓə gɛ nui tii yɛ nɔnwɔ lɔ máá. Mɛnii tii ə hee ɲə́i bɛlɛn nua hu kpɔ kɛnɛ, ə lɛɛ gáá kɛi ma ɲáá ɓə gɛ yili kəlee yɛ həli diɛ. Gaa heei ɉú kpɔ kɛnɛ. ”

Akɛ ə́ kaa ə́ kpɔɔ hɔn ɉəɠəi yɛ Natalie, awala kɛtii Annette, gbaɠala kaa, yɛ́ ma hó kɛ hwaa li ma. Nu taɠaa da kɛ ɉəɠəi a hwiikpɛɛ mɛni. Da kɛ kɛi ma bələ ɓə hinaa kaa la, ə lɛɛ da too nɛɛnon da mɛi, akɛtii ə gwɛli. Kəlaa nuta lɔpee ho laa yii maanɛɛ diɛ too mɛi. Akɛ da aa laa yɛ́, ə́ hɔn və li !

Teɲa li, “ ə́ hɔn və li ”, gɛ laa nɛɛi ə́ mo tii, kəlaa gɛ laa walaai ə́ laa na. Nu taɠaa da mɛni tii hee di kwəi kpɔ kɛnɛ, diɛ di kpɔɔ hɔn ɉəɠə, ə lɛɛ diɛ kiliŋahiɛ ɲɔnwɔɔ takpɛliɠaa hee di kwəi. Kəlaa ya ə́ mɛi haa gbɛɛ ɓə ɉu mɔnɔ mɛɛi ? Yɛ́, ɓaa nui too ə́ mɛi ? Maanɛɛ ə́ tɛɛ a kpaalə takpɛli.

Zɔbə ə kɛ a nu haŋaa ta. Biblə kaa kɛi ma, ə gwəi mɛni hukulɔ ɓɛlowai ə kɛ la mɛni wala-wala ta hu. Ə mo yɛ ma ‘ ho kea pai naa pilɛi ŋɔ woolaa ɓa, yɛ ma gaa lɔ pai kɛi ŋɔ liikələngwəi mɛniɠaa ɓoi ’ (Zɔbə 10:1). Zɔbə pɔɔkɔɔn. Yili kaa pai kpɔnmaa tɛɛ ə́ pɔ. Ya mo nuta ɓa yii ə́ laa na, ə́ kaa pai gaa yɛ́ ma mɛnii tii a laa nua diɛ, yɛ́ lea giliŋahiɛ ɲɔnwɔɔɠaa tii diɛ a bɛlɛɛ-pɛlɛɛ, ə lɛɛ ə́ lii ə laa.

Annette aa yili kaa a teɲa. Gaa kɛi ma “ Ŋi nwóó hukulɔ mə́lanmun nɛlɛɛ ta ɓa. Ə váŋalɔ yɛ máá ŋi ɉukulɔ kalaɉon veelɛ ɓa galangbɔn ɉu. Mɛni lɛlɛɛ katii ŋi gɛ. Di hwaa bɔ́ gee mɛi tama. Ə lɛɛ yii ŋi kɛ bɔ gɛ́ mɛn, ya ɓə di kɛi mo máá. Di mo máá diɛ ma ɉɔ́n və li. A teɲa mɛni lɔpee ta ho kɛ a ɉɔ́n. ”

Natalie ə nwoo hukulɔ ŋɔ nua diɛ. Gaa kɛi ma : “ Di kpɔnmaa tɛɛ bɔ́. Di váŋalɔ yii yaan mɛnii tɛɛ ŋi ɉukulɔ. Yili ə kpɔnmaa tɛɛ bɔ́ ŋɔ́ liihɛlɛn da ŋɔ́ liikələngwəi ta ə kulɔ ma. ”

Yálá hwɛliɛ ə Natalie hwaŋalɔ nwɔnɔ. Gaa kɛi ma, “ Hwaai ŋi kɛi mo Yálá pɔ, yili ə kɛi kpɔnmaa tɛɛ bɔ́. Gəlee ə ma kɛ, ɓɛlowai və́ kɛi pɛli nwoo hukulɔi la nuta ɓa. Ŋa kɛi Yálá hwɛli, ŋa pɛli gwə́i woo kəlee ɓoi ma. Yili a liilaa kɛnɛ tɛɛ bɔ́, ɉú hwa pu máá. ”

Maanɛɛ nwɔnɔ ə́ ɲaakaa yɛ́ ma “ pala hali kɛ yələ ” kaa ma (Kilimaa mun 3:3). Ə́ kpɔɔ hon a nɛlɛɛ ə́ wɔ kɔlɔipono mɛni hu, da ə́ kiliŋahiɛ pələ. Kɛ ə́ hwiitɔɔi a neelee. Gəlee ə ma kɛ, tinɛn Zehova pɔ pələ, yai a “ hwaŋalɔ ” Yálá (Kɔlɛntə veelɛnaa 1:3, 4).

 Akɛ ə́ kaa a nɛɛnon, ə lɛɛ nuta aa wəleen ə́ pulu, yɛ ə maaliɓi tuwɔ kɛ a yɛ́, ya pɛli kɛi ma “ Hó gɛ tii a ɲáá ! ” awala kɛtii yɛ́ ma “ Ə́ yee həɠə míí ! ” Hó ɲɔu ka yaa ka wɔ nɛɛlaa kala mɛni ɓa. Akɛ ma ka wɔ nɛɛlaa ə kala, yili hwialaɓoɔi ! Nu maawiaa ɓə maanɛɛ ə́ ɉəɠə a ə́ hilɛ, nui a ə́ kɔlɔ maawiɛ da ə́ wɔ Yála mɛni.

“ Ku kɛi nakwəlitaai, hilɛleaɠaa di kɛi ŋɔ sətiɛn hon búlú pələ diɛ ɲala. Di kɛi yɛlɛ máá, diɛ kɛ ma : Akɛ ya hwaa ma gwa laa ə́ kwəi kaa pai nɛɛi ” (Coretta).

Ə́ wɔ kili ɓa mɛnii tii kaa a :

1. Yolakulaa ?

2. Ɲɛikwɛli ?

3. Toomɛi kɛ mɛni kɔwɔtɔɔ pələ ?

“ Ku kɛ mɔbili hu, hulɔnon da ə woo ɲɔnŋaa ɓo máá, ə lɛɛ ə ɉón. Ŋi ɲee pili, gɛ́ ma ə kpəla ma. Ə gáá yɛ da kɛi kɛ ma ŋaa ɓowo ” (Candice).

Ə́ wɔ kili ɓa mɛnii tii ɉulɔnon tii ə gɛ a Candice, gaa a :

1. Yolakulaa ?

2. Ɲɛikwɛli ?

3. Toomɛi kɛ mɛni kɔwɔtɔɔ pələ ?

“ Gwəlan ŋɛi tɛɛ, hulɔnon da ə kɛi lɔ kɛ máá ə́ wɛli kaa máá, ə lɛɛ ə kɛ bɔ kwa yaa kuɔ kulɔ, pələi ma ŋi kɛi lənə la ma. Ə kɛi ɲéé hon yɛ pələ kɛ la. Ə kɛ a holo ta ŋi lɛɛ ŋɔ́ kɔlɔi laayilii, ə gɛ́lɛ ŋulɔn ma ” (Bethany).

Ə́ wɔ kili ɓa mɛnii tii ɉulɔnon tii ə gɛ, gaa a :

1. Yolakulaa ?

2. Ɲɛikwɛli ?

3. Toomɛi kɛ mɛni kɔwɔtɔɔ pələ ?

Gɛɛmaalən ɉaaɓai ŋɛi mukulaa lɛlɛɛ ɓaa 3 naa.

Lə ɓə a toomɛi kɛ mɛni kɔwɔtɔɔ pələ, da yolakulaa, ə lɛɛ Ɲɛikwɛli, di kulɔ nowai kɛ ?

Toomɛi kɛ mɛni kɔwɔtɔɔ pələ nwɛi a həɠə nu tɔnɔ pɔ. Ə́ ma kɛ ma ə kpəla ma, a kɛ lɔ ma yɛ gɛ.

Toomɛi kɛ mɛni kɔwɔtɔɔ pələ ho ɓaa a pə́lə́. A pɛli ŋaakpɛɛi a toomɛi kɛɛ.