Ainküsü saaʼin Ana sujutünüin achiki mmoluʼumüin nutuma wanee wayuu. Anuu sünüiki: «Eejiraasiaajeʼe taya nümaa, tooʼulaküin taʼawaatüin, isaka shia tachiki. Tojuta achikichi nia, tasheʼetüin, tejiruʼutüin otta taʼyaatüin nia. Nüsotoko taya süka wanee rüi. Isaka tachiki takuwaʼipa süchikijee tia».

¿Kasajeʼe paainjaka sülatüle pümüin tia?

Eesü süpüla sülatüin pümüin tia jaʼitasü paaʼinmajüin pukuwaʼipa. Jamüsüjaʼa pujuʼittüle saʼwai, eesü sülatüle kasa mojusü pümüin, jaʼitasü eejüin maʼin paaʼin. Saashin tü Wiwüliakat eeshii makanajüinre na kawatirashiikana otta mojukuʼipatshii na kekiikana maʼin. «Süka jamüin, alatalaʼa müsü kasa mojusü sümüin wayuu süpüshuaʼa» (Eclesiastés 9:11, TNM).

Nnojoishi shiʼraajüin Ana chi ataüjaakai shia. Eeshii na ataüjaanakana nutuma wanee napüshi jee niale wanee neʼraajüin. Jamüsüjaʼa Natalia, polooiwa suuyase nütaüjaain shia wanee jimaʼai kepiashi süʼütpaʼa. Anuu sünüiki: «Mmotshaatasü sümaa japülin taya, yüütiraasü neʼe taya paala».

Mojuyülia saaʼin Ana sutuma tü alatakat sümüin, süchajaala saaʼin sümüin. «Sotowaisü taaʼin tü alatakat tamüin, eesüjeʼe tü kasa taainjakat süpüla nnojoluin tataüjaanüin. Mayaapejeʼe isain tachiki takuwaʼipa süchikijee tasotunüin süka rüi, jülüjayülia taaʼin eein süpüla eejiraain taya wanaa sümaa tia», müsü sünüiki.

Akaʼaya Natalia, mojuyülia saaʼin sutuma süchajaalain saashin tü alatakat sümüin. Anuu sünüiki: «Nnojoluinjatia kasain alatüin tamüin taaʼinruʼu. Shia nachekaka achiki tapüleerua tashi otta tei tojuʼitawalin sümaa tü tawalakat, nnojotsü jaa müin taya namüin. Nütaüjaain taya chia wayuukai süka tojuʼitawalin tamüiwaʼa. Mojushaatasü maʼin naaʼin na kasayuukana tanain sünainjee tia. Taya kasitka saaʼin tamüin müinjanain naya. Mojushaatasü maʼin taaʼin sutuma».

Mojule paaʼin maʼaka saaʼin Ana otta Natalia, soteesü paaʼin nnojoluin püchajaalain pütaüjaanüin. «Aleʼeya wayuu maaʼulu», «süchajaala sooʼomüin», eeshii na wayuu makana süka nnojoluin kasajatüin namüin tia. Mojushaatasü maʼin sülatüle tia sümüin wanee wayuu. Pütaüjaanüle, pütüjaa saaʼu nnojoluin püsirüin tia.

Nnojotsü antapünaain suluʼu nekii na wayuukana nnojoluin nasirüin tü alatakat namüin. Eeshii na yüütiraakana sümaa tia, «tachajaala», müshii neʼe otta jülüjasü naaʼin kasa mojusü sutuma nataüjaanüin. ¿Jaraiche anashiika amüin yüütüin neʼe pia? ¿Anashiisüche pümüin? ¿Niataapa anashiin amüin chia ataüjaakai pia? Shia anaka aluʼu puchuntüle kaaliinwaa.

Anuu nünüiki Job soʼu niʼrüin müliaa saashin tü Wiwüliakat: «¡Aashajaweechi taya sümaa mojuin maʼin taaʼin!» (Job 10:1, TNM). Eesü anashijeerüle pümüin paaʼinrüle tü naainjakat Job. Aneerü paaʼin otta nnojoleerü püsirüin saaʼin pümüin tü alatakat pümüin püküjüle shia sümüin wanee wayuu aleewaka amaa pia.

Shia saainjaka Ana tia, anakalaka saaʼin sutuma. Anuu sünüiki: «Taküjüin tü alatakat tamüin sümüin wanee taʼaleewain, «anasü püküjüle shia namüin na laülaashiikana» sümaka tamüin. Anasü taaʼin süka taküjüin shia namüin. Kojuyatua naashajaain tamaa. Naküjaka tamüin nnojoluin tasirüin tü alatakat tamüin».

Süküjüin Natalia nümüin süshi otta shii tü alatakat sümüin. Anuu sünüiki: «Nnojotsü nayüülajüin taya. «Anasü püküjüle shia wamüin», müshii tamüin. Shiasaʼa sutuma tia, nnojotsü taya jashichikuʼu müin otta nnojotsü mojuin taaʼin».

Amülialaasü saaʼin sutuma suʼuraajüin. «Aawalaasü taaʼin sutuma toʼuraajüin nümüin Maleiwa, alatawaisü tia tamüin nnojorüle jaralüin taashajaweein amaa. Taküjawalin nümüin Jeʼwaa jamüin taaʼin. Shiasaʼa sutuma tia, jamaamasü taaʼin», müsü sünüiki.

Aneerü paaʼin mapa süchikijee tia (Eclesiastés 3:3). Jalia pia suulia ayuulii sutuma mojuin paaʼin otta anasü peemeraʼawaire. Nia puchunta maʼin amüin kaaliinwaa Jeʼwaa, chi atüjakai maʼin amüliajaa (2 Corinto 1:3, 4).

Nüpüleeruale paaʼin pümüraajüin süpüla paaʼinrüin kasa mojusü, anasü pümüle nümüin: «¡Jimata pia toulia!» jee «¡püsünneʼera pajapü toulia!». Nnojo puunjulajüin süchiki sutuma «nuuʼulaweerü taya» pümüin. Nuuʼulaale pia, maalinsat pia nüpüla. Nümaajeerü pia wanee wayuu kojutüka amüin pia otta anashiika amüin tü kasa anakat pümüin.

«Polooiwaʼa apünüinmüin jee polooiwaʼa pienchimüin touyase, natchuʼujawalin sukouchain tachirapalajana sümaa yarüttüin nanüiki tamüin na jimaʼaliikana. «Aneerü maʼin pümüin püinkaapa tamaa», eeshii namawaire», müsü Carla.

¿Jamüsü saaʼin pümüin tü naaʼinrakat naya jimaʼaliikana?

1. ¿Emeeʼerajaashiiche?

2. ¿Namüraajeeinche?

3. ¿Napüleerua aaʼinrü shiiʼiree süinkaain namaa?

«Eeshi wanee jimaʼai kasaʼireeshi tooʼomüin, yarüttüsü maʼin nünüiki tamüin sümaa nipennajüin taya. Taʼyaataka nia, «püsünnaa toulia», tamaka nümüin. Niirolooko taya, müsü saaʼin wayuu mamainnasü taya saaʼin nümüin», müsü Claudia.

¿Jamüsü saaʼin pümüin tü naaʼinrakat chia jimaʼaikai?

1. ¿Emeeʼerajaashiche?

2. ¿Nümüraajeeinche?

3. ¿Nüpüleerua aaʼinrü shiiʼiree süinkaain nümaa?

«Eejachi wanee jimaʼai, «müliashi taya piiʼiree, anashii wojuʼitüle», makuʼu müshi tamüin soʼutpünaa wanee juya. «Nnojo», maʼwaisü taya nümüin. Eesü nümülejüle tatüna. «Jimata pia», tama amüinchi, macheʼesai nia. Soʼu wanee kaʼi ejepülaasü taya süpüla tejittaain süülaja tasapaatse, nuʼwataka teinaluʼu», müsü Beatriz.

¿Jamüsü saaʼin pümüin tü naaʼinrakat chia jimaʼaikai?

1. ¿Emeeʼerajaashiche?

2. ¿Nümüraajeeinche?

3. ¿Nüpüleerua a aʼinrü shiiʼiree süinkaain nümaa?

Naya majayünnüükana, apüleeruaana aaʼinchii shiiʼiree nainkaain.

¿Wanaawasüche sümüraajüneein wanee wayuu sümaa shimeeʼerajaanüin amaa otta süpüleeruaanüin aaʼin shiiʼiree süinkaweein?

Nnojotsü anain saaʼin wanee wayuu süpüleeruaanüle aaʼin shiiʼiree süinkaanüin amaa. Macheʼesai chi mojulaashikai, jaʼitasü «jimata pia toulia», sümüin nümüin.

Nnojotsü shaittaain tia. Eesü süpüla sütaüjaanüin wanee wayuu sünainjee süpüleeruaanüin aaʼin.