Mẹhe jlo na zanhẹ Annette ko zìn in dai whẹpo e do wá yọ́n nuhe to jijọ. E dọmọ: “N’wà nuhe go n’pé lẹpo nado de e sọn ji e. N’tẹnpọn nado dawhá, ṣigba e ma pà mi. N’sisẹ́ ẹ, linú in, bo hẹ̀nadu i. Ṣigba whenue n’doayi e go dọ ohí biọlanmẹna mi, huhlọn ṣie lẹpo yì.”

Eyin hiẹ wẹ tin to ninọmẹ mọnkọtọn mẹ, etẹwẹ a na wà?

Dile etlẹ yindọ a sọgan wleawu—vlavo gbọn aṣejininọ to whenue a jlo na gbọn gblolo de mẹ to zánmẹ dali—nuylankan lẹ sọgan gbẹ́ jọ. Biblu dọmọ: “E ma yin awuyatọ lẹ wẹ nọ duto wezundido ji to whepoponu . . . mọjanwẹ e ma yin mẹhe tindo oyọnẹn lẹ wẹ nọ tindo kọdetọn dagbe to whepoponu, na yemẹpo ji wẹ ojlẹ po kosọ po nọ wá.”—Yẹwhehodọtọ 9:11.

Taidi Annette, jọja delẹ nọ yin zinzanhẹ gánnugánnu gbọn mẹhe yé ma yọnẹn dali. Mẹdevo lẹ nọ yin zinzanhẹ gbọn mẹyọnmẹ kavi etlẹ yin hagbẹ whẹndo tọn de dali. To whenue Natalie tindo owhe ao poun, e yin zinzanhẹ gánnugánnu gbọn jọja de he nọ nọ̀ owhe etọn pá dali. E dọmọ: “Obu di mi bọ winyan hù mi sọmọ bọ n’ma dọna mẹde to tintan whenu.”

Annette gbẹ́ to owhẹ̀ do ede gando nuhe jọ go. E dọmọ: “N’gbẹ́ nọ to nuhe jọ to ozán enẹ mẹ flin mapote. N’nọ mọdọ n’dona ko dogán humọ. Amọ́, to whenue e sọnú mi, ahun ṣie gbàdo. N’gbọjọ pete, ṣigba n’mọdọ n’dona ko wà nususu humọ.”

Natalie lọsu to ahidi hẹ numọtolanmẹ whẹhuhu tọn. E dọmọ: “N’ma dona ko deji domọ. Mẹjitọ ṣie lẹ ko dosẹ́n na yẹn po nọviyọnnu ṣie po nado nọ daihun dopọ to kọho, amọ́ n’ma setonu. Enẹwutu, n’mọdọ yẹnlọsu wẹ zọ́n bọ dẹpẹ lọ do wadanu do go e. Nuhe jọ lọ yinuwado whẹndo ṣie ji, bọ n’mọdọ yẹn wẹ hẹn tukla enẹ lẹpo wá. N’nọ to enẹ lẹnpọn mapote.”

Eyin a tindo numọtolanmẹ Annette kavi Natalie tọn nkọ, yọnẹn dọ e ma yin ojlo towe wẹ zọ́n. Mẹdelẹ nọ yí nukunpẹvi do pọ́n whẹho lọ bo nọ dín whẹjijọ dọ nude ma ylan to e mẹ dọ dẹpẹ lẹ ni yinuwa domọ kavi dọ mẹhe yin zinzanhẹ lọ lọsu wẹ zọ́n. Ṣigba, mẹdepope ma jẹna zanhẹmẹ gánnugánnu. Eyin a jiya walọ kanyinylan tọn mọnkọtọn, e ma yin owhẹ̀ towe!

Na nugbo tọn, nado hia dọ “e ma yin owhẹ̀ towe” bọawu taun; ṣigba e nọ vẹawu nado yí i sè. Mẹdelẹ nọ hẹn nuhe jọ lọ do ayiha mẹ majomajo bo nọ to owhẹ̀ do yede bosọ nọ tindo numọtolanmẹ agọ̀ devo lẹ. Ṣigba, mẹnu wẹ abọẹninọ nọ hẹn ale wá na hugan—hiẹ kavi danuwatọ lọ? E na yọ́n dọ a ni lẹnnupọndo afọdide devo ji.

Biblu dọ dọ to whenue dawe nugbonọ lọ Jobu jẹflumẹ pete, e dọmọ: “Yẹn na dọho to ayimajai sinsinyẹn ṣie mẹ!” (Jobu 10:1) Hiẹ lọsu sọgan mọaleyi sọn mọwiwà mẹ. Hodidọ hẹ omẹ dejidego de sọgan gọalọna we nado tindo pọndohlan dagbe gando nuhe jọ lọ go bosọ de awufiẹsa towe pò.

Annette mọdọ nugbo wẹ enẹ. E dọmọ: “N’dọho hẹ họntọn ṣie yọnnu vivẹ́ de, bọ e na tuli mi nado dọho hẹ mẹho agun tọn awe to agun ṣie mẹ. E vivi na mi dọ n’wàmọ. Yé sinai hẹ mi whlasusu bosọ miọnhomẹna mi—dọ nuhe jọ lọ ma yin owhẹ̀ ṣie. Nudepope ma yin owhẹ̀ ṣie.”

Natalie dọho hẹ mẹjitọ etọn lẹ gando nujijọ lọ go. E dọmọ: “Yé nọgodona mi. Yé na tuli mi nado dọho tọ́n, podọ ehe gọalọna mi ma nado blawu kavi to adidu do homẹ.”

Natalie sọ yin homẹmiọnna gbọn odẹ̀ dali. E dọmọ: “Hodidọ na Jiwheyẹwhe gọalọna mi, titengbe to ojlẹ he mẹ e ma jlo mi nado dọho hẹ mẹdepope lẹ mẹ. To whenue n’to dẹ̀ho, n’nọ dọho po awuvivo po. Ehe nọ na mi jijọho ahun mẹ tọn.”

Hiẹ lọsu sọgan mọdọ “ojlẹ de nado hẹnazọ̀ngbọ” tin. (Yẹwhehodọtọ 3:3) Nọ penukundo dewe go to agbasa-liho podọ to numọtolanmẹ-liho. Nọ gbọjẹ ganji. Podọ hú popolẹpo, nọ ganjẹ Jehovah, Jiwheyẹwhe homẹmimiọn lẹpo tọn go.—2 Kọlintinu lẹ 1:3, 4.

Eyin yọnnu wẹ a yin bọ yè to kọgbidina we nado zan walọ gblewa tọn de, e na yọ́n dọ a ni yí nujikudo do dọ, “Gbọ!” kavi “Dealọ towe sọn go e!” Ma dibu dọ họntọn sunnu emitọn na jo emi do blo. Eyin e jo we do na whẹho enẹ wutu, be e ma jẹna we! Sunnu he jẹna we wẹ a dona mọ, yèdọ mẹhe nọ na sisi agbasa po nunọwhinnusẹ́n towe lẹ po.

“To wehọmẹ, dẹpẹ lẹ nọ dọ̀n anọ́bẹ́ ṣie bo nọ zan hogbe gblewa tọn lẹ—taidi eyin n’zanhẹ we, onú towe na yọ́n dogọ.”—Coretta.

Be a lẹndọ dẹpẹ enẹlẹ to

1. Ohó dín in poun wẹ ya?

2. Aihun gblewa tọn dà hẹ ẹ wẹ ya?

3. Kọgbidina ẹn nado tindo zanhẹmẹ wẹ ya?

“To ahihun de mẹ, dẹpẹ de jẹ ohó gblewa tọn lẹ dọna mi bosọ jẹ alọsado go e ji. N’gbà alọ na ẹn bosọ dọna ẹn nado sẹ̀. E pọ́n mi taidi mẹhe hùn tadu nkọ.”—Candice.

Etẹwẹ a lẹndọ dẹpẹ ehe to wiwà na Candice?

1. Ohó dín in poun wẹ ya?

2. Aihun gblewa tọn dà hẹ ẹ wẹ ya?

3. Kọgbidina ẹn nado tindo zanhẹmẹ wẹ ya?

“To owhe he wayi mẹ, dẹpẹ de to didọna mi mapote dọ emi yiwanna mi bo jlo na tọ́n hẹ mi, dile etlẹ yindọ n’to gbigbẹ́ mapote. To whedelẹnu, e nọ gbò awà ṣie fán. N’nọ dọna ẹn dọ ni gbọ, amọ́ e ma nọ sè. To gbèdopo he n’to afọpakàn ṣie blá, e hò gogo na mi.”—Bethany.

To linlẹn towe mẹ, be dẹpẹ ehe to:

1. Ohó dín in poun wẹ ya?

2. Aihun gblewa tọn dà hẹ ẹ wẹ ya?

3. Kọgbidina ẹn nado tindo zanhẹmẹ wẹ ya?

Gblọndo he sọgbe lọ wẹ C.

Etẹwẹ nọ hẹn kọgbidinamẹ zanhẹmẹ tọn gbọnvona aihun gblewa tọn po ohó dindin po?

Mẹhe yè to kọgbidina lọ ma nọ kẹalọyi. Kọgbidinamẹtọ lọ sọ nọ zindonukọn eyin mẹlọ ma tlẹ jlo.

E sọgan dekọtọn do zanhẹmẹ gánnugánnu mẹ.