Annette tsipɨkaretimá keane menutsanakekai kwieepa mikahɨatsíe. Annette paine: «Kenemɨtitɨrɨkaɨye nepuyukuhɨpakai, nemɨtahiwakekaitsíe neukaʼuyɨwekaxɨa. Nepeikuhɨpakai, nepikuketsinakai, nepikuhutsunakai metá nepikuxutsinakai... nawaxakɨ mɨnetiukwinitɨatsíe ké nepɨtiuhayewaxɨ. Yamɨtiuyuritsíe nepeuyuyehɨa».

¿ʼEkɨ kepetiuyuriwekai xɨka mɨpaɨ peranuyemienike?

Tseepá peyuʼɨɨwiyatɨ pemɨkuyeika, xɨka tɨkaarikɨ peʼayeyeikani haxa pepɨranuyeyeiwé. Yuútsi Niukíeya paine: «Kwinié memayɨwawe xeikɨ́a mekwateʼaʼiʼiwa [...] tsiere memɨtehetiʼenietɨkɨka xeikɨ́a ʼaixɨ mepɨkateheukutéi, kepaitsɨ́ meyunaitɨ haxa mepɨteʼanuyekɨniwawe yamekatehaʼeriwakaku» (Eclesiastés 9:11).

Annette pɨkaʼimaatekai keane menutsanaxɨ. Heiwakɨa tá mɨpaɨ mepɨwakuyuruwa mewamaatetɨ metá wamaremá. Noelia 10 wiitaari pexeiyakai xewitɨ ʼauriena kiekame menutsanaxɨtsíe. Mɨkɨ paine: «Kwinié nepɨreumaakai metá nepeuyutewiyakai ʼayumieme xeime mɨpaɨ neukatihɨawimɨkɨkai».

Annette ʼakuxi yuheetsíe pɨtiuhɨpa kemɨranuyetɨakɨ. Mɨkɨ paine: «Nepɨkaratɨmaiyawe ʼaana tɨkaarikɨ kenemɨranuyetɨa netinekuhɨawetɨ ʼaixɨ matsi neheimá netiniunuanike. Tseepá nemeuneyehɨa nawaxakɨ mɨnetsiʼutsetsíe kuxi nepɨtikuʼeriwa ʼaixɨ matsi neheimá netiniunuanike».

Noelia tsiere ʼakuxi yuheetsíe rahɨpatɨ paine: «Kari nexaɨtá neyɨweme nepɨʼeriekai, tapaapama xeikɨ́a mepɨtatsipitɨakai teyuhuutatɨ temanuyekɨɨné temɨtiwaikakɨ, ne tá yanepɨkatikatɨ́a. ʼAyumieme yapauka pɨnetiukwinitɨa taʼaurié kiekame. Nekɨmana nenuiwari waɨkawa mepɨteʼukaʼeni. ʼAyumieme mɨkɨ matsi waɨká pɨnetiukaʼenitɨwa».

Xɨka Annette nutsɨ Noelia hepaɨ petiʼamaiká, keane memanutsanarɨwa yamepɨteʼanuyekɨká waɨriyarika mepitɨarietɨ. Hiipatɨ meteyukuhɨawe kenaame haxa kaʼane, meputiyuane kenaame memɨnanaimarie meʼuyuʼeiri. Mɨkɨ tá pɨkatiyuri, ʼaixɨ pɨkaʼane xewitɨ manutsanarɨwani. Xɨka ʼekɨ mɨpaɨ petiunanaimarieni ¡ʼaheetsíe peukatiuhɨpani!

Pɨkayɨwe tá yapauka mɨtiuʼerieni kenaame ʼaheetsíe raatɨ́a. Hiipatɨ memɨnanaimarie yamepɨkaʼutiyuane kememɨteʼanuyekɨ metá yuheetsíe xeikɨ́a mepɨteʼahɨpa metá ʼaixɨ rí memɨteʼuʼerieni meukayɨwawe. ¿Xɨka yapekaʼutayɨní petiʼapareewieni nutsɨ keane mɨʼatsiʼunanaima? ¿Matsi ʼaixɨ katiʼane pareewiya pemɨtawauní?

Yuútsi Niukíeya paine kenaame xewitɨ ʼukí Job titewatɨ ʼuyeikakai, kwinié mɨtiukaʼeniwakaitsíe puutayɨ́: «¡Niukikɨ yanepɨtayɨní títakɨ nemɨtiukaʼeniwa!» (Job 10:1). ʼEkɨ tsiere mɨpaɨ pepɨtiuyuriwe. Xɨka keane ʼaixɨ pemɨtixeiya haamatɨa petiutixaata metsiʼupareewiwe pemɨranutaxeiyaxɨanikɨ metá mɨkɨ ʼaixɨ merakaʼeritɨatɨyaní.

Annette mɨpaɨ tiuyurieka ʼaixɨ pɨrakaʼerietɨya. Paine: «Nehamika haamatɨa netiutixaataka pɨnetsiʼuwaɨritɨa ʼuukitsi memɨyumaate nemɨtiwatixaatɨanikɨ. Nepeuyutemaawie yanemɨtiuyurikɨ. Mɨixa mepɨneteʼutixaatɨa yeme tita nemɨreuyehɨakái menetekuhɨawetɨ: ʼAkɨma pɨkatiuyɨ́ ʼaheetsíe peukatiuhɨpani».

Noelia yupaapama pɨtiwarutixaatɨa kemɨranuyetɨ́a. Mɨkɨ paine: «Waɨkawa mepɨnetsiʼupareewi, mepɨnetsiʼuʼeni yɨɨkɨ mekaneteʼeritɨatɨ ʼayumieme netaɨtá paitɨ ʼaixɨ nepɨrakaʼerietɨya metá nepɨkahaʼá rí tsiere nepɨkayuheiwerie».

Tsiere nenewierika pikanɨtɨatɨya. Puutayɨ́: «Yuútsi naime nemɨtiutaxaatɨatsíe pɨnetsiʼupareewi, kepaitsɨ́ nepɨkayɨwekai xeime nemɨtitaxaatɨani. Nemuyutinenewiwatsíe kenemɨreuʼerie naime Yuútsi nepɨtiutixaxaatɨwa, mɨkɨkɨ yeme ʼaixɨ nepɨreuʼerie».

ʼEkɨ tsiere pepɨretimaiwé kenaame «tuukaari pɨxuawe mɨtiuʼuatɨanikɨ» (Eclesiastés 3:3). Keneyuʼɨɨwiyani pemɨkareukuyenikɨ metá ʼaixɨ pemɨtiyukuhɨawenikɨ tsiere keneukaʼuxipiweni. Matsi waɨká metsipareewieni xɨka Yuútsi Jehová mɨtiuyukanɨtɨwatsíe peʼuyupareewieni (2 Corintios 1:3, 4).

Xɨka ʼatuxeri ʼahaamatɨa huimɨkɨni pekaʼukamaatɨ tineutahɨawi: «Mɨpaɨ peukayɨaneni» nutsɨ, «peukanetsikumaɨwani». Mɨpaɨ ketineuyuri tseepá mɨʼatiuhayewaxɨ. Xɨka metsiʼuhayewa metsinaakeʼerietɨ pɨkayɨanekai. ʼEkɨ kwinié pepɨrayaʼaxé, pepeuyehɨwá pɨɨtá xeime ʼaixɨ metixeiyame metá metipitɨakame tita pemɨrayexeiya.

«13 nutsɨ 14 nemexeiyakaitsíe, teemari nehaamatɨa memayetekai heiwa nebrasier mepɨnetsikuhapaniriwakai menetekuhɨawetɨ: Paatsɨ́ witsipepɨrakaʼerietɨyaní xɨka nehaamatɨa peʼukahuní» (Coretta).

¿Peraine kenaame ʼikɨ teemari:

1. Mewaikatɨwetɨ meyɨakai?

2. Meheinaakeʼerietɨ meyɨakai?

3. Haamatɨana mehikutɨ meyɨakai?

«Camiontsíe xewitɨ temaikɨ haxa netiyehɨawetɨ pɨnetsiʼumayɨa. Yapauka kwinié nepɨtihutsu mɨnetsihayewakɨ. Haxa mɨkatiuyurieni hepaɨ pɨnerexexeiyakai» (Candice).

¿Peraine kenaame ʼikɨ temaikɨ:

1. Waikanekai?

2. Heinaakeʼerietɨ yɨanekai?

3. Haamatɨana huimɨtɨ yɨanekai?

«Xewitɨ temaikɨ pɨkatihayewamɨkɨkai netikuhɨawetɨ kenaame neʼinaakekai metá kenaame netuxeri heuyeimɨkɨkai, tseepá waikɨ nemɨtikuhɨawekai. Heiwakɨa nemamatsíe pɨkawiwierekai tseepá yanemɨkareunakeʼeriekai, pɨkatihayewamɨkɨkai. Heiwa nexapatuxi ʼaixɨ netikuhɨayakaku, nekɨtsapa pɨnetsiʼanamayɨa» (Bethany).

¿Peraine kenaame ʼikɨ temaikɨ:

1. Waikanekai?

2. Heinaakeʼerietɨ yɨanekai?

3. Haamatɨana huimɨtɨ yɨanekai?

Mɨkɨ ʼiwaurikatetsíe ʼeiyarika pɨhɨɨkɨ C.

¿Titayari yaxeikɨ́a karanuyɨtɨká ʼeena tihaikatɨ mɨraxaxaatsiwa?

Waɨriyarika mɨpitɨarieka xeime matɨa mɨkahunikɨ haxa pɨmayá. Keane mɨnanaimarie tseepá haxa mɨtiʼeritɨa mɨtikuhɨawe keʼihayewa mɨkɨ yaxeikɨ́a pɨtiyurieneni.

ʼAixɨ pɨkaʼane mɨnanaimarieka: Mɨpaɨ ranuyemietɨ panutsanariewe.