APEQQUT 8
Kinguaassiuutitigut atornerluineq pillugu suut ilisimasariaqarpakka?
ILLIT QANOQ ILIUSSAGALUARPIT?
Naasunnguup sassussisiminit uppisinneqarami aatsaat susoqarnera paasivaa. Ima oqaluttuarpoq: “Sapinngisannik peersinniarsaraara. Nilliariaraluarama nipissaqanngilanga. Ajappara, isimmippara, tilluppara qitsuarlugulu. Taamaalisorlu savimmik kapineqarnera malugisinnaalerpara. Aqullaavippunga.”
Illit taamatut misigisaqartuuguit qanoq qisuariassavit?
UNILLUTIT EQQARSARIT!
Immaqa sillimagaluartutit – soorlu unnukkut silami pisutsillutit mianersoraluartutit – ajortumik pisoqarsinnaavoq. Biibilimi allassimavoq: “Ilissi inuunissi aqagu qanoq innissaanik [ilisimasaqanngilasi].” – Jaaku 4:14.
Inuusuttut ilaat, soorlu Naasunnguup misigisaatut, nalusaminnit atornerlunneqarsimapput. Allat nalunngisaminnit allaalluunniit ilaquttaminnit atornerlunneqarsimapput. Kimmernaq quliinnarnik ukioqarluni inuusuttuaqqamit ungasinngisaminni najugaqartumit kinguaassiuutitigut atornerlunneqarpoq. Ima oqarpoq: “Ersingaarama kanngusungaaramalu aallaqqaammut allanut oqaluttuanngilanga.”
ILLIT PISUUNNGILATIT
Naasunnguaq pisumut suli imminut pisuutittarpoq. Ima oqaluttuarpoq: “Unnuk taanna pisoq eqqarsaatigeqattaartarpara. Misigivunga sakkortunerusumik akiuussimasussaagaluarlunga. Kisianni kapitikkama ersingaarama soriarsinnaajunnaarpunga. Iliuuseqarsinnaajunnaarpunga, misigivungali iliuuseqarnerusussaagaluarlunga.”
Kimmernaq aamma imminut pisuutittarpoq. Ima oqaluttuarpoq: “Taama tatiginnitsigisussaanngikkaluarpunga. Angajoqqaatta oqarfigisarpaatigut qatanngutigalu silami aneeraangatta immitsinnut qimattassanngitsugut, kisianni naalanngilakka. Taamaattumik misigivunga sanilerput uannik innarliinissamut periarfissillugu. Pisoq ilaquttannut sunniuteqarpoq, misigivungalu anniangaarnerannut akisussaallunga. Tamanna naalliuutiginerpaavara.”
Illit Naasunnguatut Kimmernatulluunniit misigiguit pingaarnertut eqqaamassavat inuk pinngitsaalineqarluni atornerlunneqartoq piumassutsiminik atornerlunneqarneq ajormat. Inuit ilaasa nukappiaqqat taamatut pissusilersornerisa pissusissamisoornerarneratigut imaluunniit pinngitsaalineqarlutik atornerlunneqartut namminneq pisuunerarnerisigut pisoq soqutaannginnerartarpaat. Kinaluunniilli taamatut pineqartussaanngilaq. Taama amiilaarnartigisumik pineqarsimaguit illit pisuunngilatit!
Soorunami ima oqarneq ajornanngilaq: “Illit pisuunngilatit.” Tamatumali upperinissaa ajornartorujussuusinnaavoq. Ilaasa misigissutsitik allanut oqaatiginagit imminut pisuutinnertik allanilluunniit nikallornartunik misigisaqarnertik naalliuutigisarpaat. Kisianni nipangersimaannarnerit kia iluaqutiginerpaassavaa – illit imaluunniit atornerluisup? Periarfissaq alla eqqarsaatigigukku ilinnut pitsaanerussaaq.
OQALUTTUARIT
Biibilimi allassimavoq Jobi naapertuilluartoq artorsarnerpaaffimmini ima oqartoq: ‘Isumatsassimaninni oqalussaanga.’ (Jobi 10:1) Aamma illit tatigisannik oqaloqateqarnerit ingerlariaqqinnissannut misigissutsillu erloqinartut naammagalugit atornissaannut iluaqutigisinnaavat.
Immaqa misigissutsitit kisimiillutit artorpatit. Soormi allamik oqaloqateqarnikkut ikiorneqaruit?
Naasunnguup tamanna misigaa. Ima oqaluttuarpoq: “Ikinngutigilluagara oqaloqatigaara, kajumissaarpaangalu utoqqaanertanik oqaloqateqaqqullunga. Qujanartumik taamaaliorpunga. Arlaleriarlutik oqaloqatigaannga pisariaqartitarpiannillu paasitittarlunga – pisumut uanga pisuunngilluinnartunga.”
Kimmernap atornerlunneqarnini pillugu angajoqqaani oqaloqatigai. Ima oqarpoq: “Tapersersorpaannga. Oqaluttuaqqullunga kajumissaarpaannga, taamaaliorneralu qamuuna nikallungavallaannginnissamut kamappallaannginnissamullu iluaqutigaara.”
Kimmernap qinusarnini aamma tuppallersaatigaa. Ima oqaluttuarpoq: “Guutip oqaluuttarnera iluaqutigisarpara, pingaartumik inummik allamik oqaloqateqarsinnaanngitsutut misigigaangama. Qinugaangama isertuarnanga oqalussinnaasarpunga. Tamanna qamuuna eqqississutigisarpara.”
Aamma illit iluaallakkiartorsinnaavutit. (Oqaluussisartup oqaasii 3:3) Timikkut misigissutsikkullu imminut paarilluartarit. Sinilluartarit. Pingaarnertullu, Jehova Guuti tuppallersaajuartoq tatigiuk. – 2 Korinthimiut 1:3, 4.
PEERAQARSINNAALERSIMAGUIT
Arnaaguit inuusuttoq eqqunngitsuliornissamullu tatineqaruit ima aalajangersimarpalullutit oqarsinnaavutit: “Tassa!” imaluunniit “Taamatut attornanga!” Angutaativit annaanissaata ernumassutiginera tunuarsimaassutigeqinagu. Tamanna pillugu qimappatit iluatigeqinagu! Ilinnut pitsaanerpaassaaq timinnik najoqqutassianillu malitannik ataqqinnittumik angutivimmik aappartaaruit.
NIKANARSAGAALLUNI TIINGAFFIGINEQARNEQ PILLUGU NALORSITSAARUT
“Atuarfimmi nukappiaqqat iviangequtiga tunukkut nusuppaat nikassaarpaluttumillu – soorlu atoqatigigukkit iluaallannissannik – oqaaseqarlutik.” – Coretta.
Isumaqarpit nukappiaqqat:
-
Qinngasaaraat?
-
Qaninniarfigigaat?
-
Nikanarsarlugu tiingaffigigaat?
“Bussimi nukappiaqqap atoqatigiinnermut tunngasunik oqarfigalungalu attorpaanga. Assaatigut patippara peeqqullugulu. Eqqumiigerpasillunga qiviarpaanga.” – Candice.
Nukappiaqqap Candice suaa?
-
Qinngasaarpaa?
-
Qaninniarfigaa?
-
Nikanarsarlugu tiingaffigaa?
“Siorna nukappiaqqap arlaleriarluni nuannarinerarlunga arnaatigilerniarsaraanga, itigarteqattaarparali. Ilaannikkut talikkut attulaartarpaanga. Nangartartaraluarlugu uninneq ajorpoq. Taamaalluni nulukkut patippaanga.” – Bethany.
Isumaqarpit nukappiaqqap:
-
Qinngasaaraa?
-
Qaninniarfigigaa?
-
Nikanarsarlugu tiingaffigigaa?
Taakkununnga tamanut akissut eqqortoq tassaavoq C.
Nikanarsaalluni tiingaffiginninneq qaninniarnermit qinngasaarinermilluunniit qanoq allaanerua?
Nikanarsaalluni tiingasoq nangartarneqaraluarluni kisimi iliuuseqartarpoq.
Nikanarsaaneq kinguaassiuutitigut atornerluinermik kinguneqarsinnaammat unitsinneqartariaqarpoq.