ຄຳຖາມທີ 8
ຂ້ອຍຄວນຮູ້ຫຍັງແດ່ກ່ຽວກັບການທຳຮ້າຍທາງເພດ?
ເຈົ້າ ຄິດແນວໃດ?
ກ່ອນທີ່ແອນເນັດຈະຮູ້ຕົວ ຄົນຮ້າຍກໍຊຸກລາວລົງພື້ນ. ແອນເນັດເລົ່າວ່າ: “ຂ້ອຍສູ້ສຸດຂີດ ແລະພະຍາຍາມຮ້ອງ ແຕ່ກໍບໍ່ມີສຽງອອກມາ. ຂ້ອຍທັງຍູ້ ທັງເຕະທັງຕີ ແລະທັງຂູດລາວ ແລ້ວກໍຮູ້ສຶກວ່າຕົວເອງຖືກແທງ. ຈາກນັ້ນໂຕຂ້ອຍກໍລ່ອຍລົງ.”
ຖ້າເຈົ້າຕົກຢູ່ໃນສະຖານະການແບບນັ້ນ ເຈົ້າຈະໂຕ້ຕອບແນວໃດ?
ຢຸດແລະຄິດ!
ເຖິງວ່າເຈົ້າໄດ້ລະວັງຕົວແລ້ວເມື່ອອອກໄປທາງນອກໃນຕອນກາງຄືນ ແຕ່ສິ່ງບໍ່ດີກໍອາດເກີດຂຶ້ນໄດ້. ຄຳພີໄບເບິນບອກວ່າ: ‘ຄົນແລ່ນໄວບໍ່ໄດ້ຊະນະການແຂ່ງຂັນສະເໝີໄປ . . . ແລະຄົນມີຄວາມຮູ້ອາດບໍ່ປະສົບຜົນສຳເລັດກໍໄດ້ ເພາະເຫດການທີ່ບໍ່ໄດ້ຄາດຄິດອາດເກີດຂຶ້ນກັບພວກເຂົາທຸກຄົນໃນເວລາທີ່ຄາດບໍ່ເຖິງ.”—ຜູ້ເທສະໜາປ່າວປະກາດ 9:11
ໜຸ່ມສາວບາງຄົນ ເຊັ່ນ: ແອນເນັດ ຖືກຄົນທີ່ບໍ່ຮູ້ຈັກທຳຮ້າຍຮ່າງກາຍ. ແຕ່ບາງຄົນກໍຖືກເພື່ອນບ້ານຫຼືແມ່ນແຕ່ຖືກຄົນໃນຄອບຄົວທຳຮ້າຍ. ນາຕາລີເຊິ່ງອາຍຸ 10 ປີໄດ້ຖືກຊາຍໜຸ່ມທີ່ຢູ່ຂ້າງບ້ານທຳຮ້າຍທາງເພດ. ລາວເລົ່າວ່າ: “ຕອນທຳອິດຂ້ອຍຢ້ານແລະອາຍຫຼາຍຈົນບໍ່ກ້າບອກໃຜ.”
ບໍ່ແມ່ນຄວາມຜິດຂອງເຈົ້າ
ແອນເນັດຍັງຕ້ອງຕໍ່ສູ້ກັບຄວາມຮູ້ສຶກຜິດກ່ຽວກັບເລື່ອງທີ່ເກີດຂຶ້ນ. ລາວເວົ້າວ່າ: “ເລື່ອງນັ້ນຍັງວົນວຽນຢູ່ໃນສະໝອງຂ້ອຍ. ຂ້ອຍຄິດວ່າໜ້າຈະອອກແຮງສູ້ຫຼາຍກວ່ານັ້ນ. ແຕ່ທີ່ຈິງແລ້ວ ເມື່ອຖືກແທງຂ້ອຍກໍເໜັງບໍ່ໄດ້ເລີຍເພາະຢ້ານ. ຂ້ອຍຄິດວ່າຄວນຈະເຮັດຫຼາຍກວ່ານັ້ນ ເຖິງວ່າເຮັດຫຍັງບໍ່ໄດ້ກໍຕາມ.”
ນາຕາລີກໍຕ້ອງຕໍ່ສູ້ກັບຄວາມຮູ້ສຶກຜິດຄືກັນ. ລາວເວົ້າວ່າ: “ຂ້ອຍບໍ່ຄວນເຊື່ອຄົນງ່າຍ. ພໍ່ແມ່ໄດ້ສັ່ງໄວ້ວ່າ ຖ້າຈະອອກໄປຫຼິ້ນຢູ່ນອກກໍໃຫ້ໄປກັບນ້ອງສາວ ແຕ່ຂ້ອຍກໍບໍ່ຟັງ. ຂ້ອຍຈຶ່ງຮູ້ສຶກວ່າໄດ້ເປີດໂອກາດໃຫ້ຄົນຂ້າງບ້ານມາທຳຮ້າຍຕົວເອງ. ສິ່ງທີ່ເກີດຂຶ້ນເຮັດໃຫ້ຄົນໃນຄອບຄົວເສຍໃຈຫຼາຍ ແລະຂ້ອຍຮູ້ສຶກວ່າເປັນຕົ້ນເຫດໃນເລື່ອງນີ້ ເຊິ່ງມັນສຽບແທງຂ້ອຍຫຼາຍທີ່ສຸດ.”
ຖ້າເຈົ້າຮູ້ສຶກຄ້າຍຄືກັບແອນເນັດແລະນາຕາລີ ຂໍໃຫ້ຈື່ໄວ້ວ່າຄົນທີ່ຖືກຂົ່ມຂືນບໍ່ໄດ້ຍິນຍອມ. ບາງຄົນອາດເຮັດໃຫ້ເລື່ອງນີ້ເບິ່ງຄືວ່າບໍ່ຮ້າຍແຮງໂດຍໂທດຄົນທີ່ຖືກຂົ່ມຂືນວ່າເປັນຕົ້ນເຫດ ຫຼືແກ້ຕົວໃຫ້ຜູ້ຊາຍວ່າເປັນເລື່ອງທຳມະດາຂອງຜູ້ຊາຍ. ແຕ່ທີ່ຈິງແລ້ວ ບໍ່ຄວນມີໃຜຖືກຂົ່ມຂືນ. ຖ້າເຈົ້າຕົກເປັນເຫຍື່ອຂອງການກະທຳທີ່ໂຫດຮ້າຍແບບນີ້ ນັ້ນບໍ່ແມ່ນຄວາມຜິດຂອງເຈົ້າ!
ເປັນເລື່ອງງ່າຍທີ່ຈະອ່ານຄຳເວົ້າທີ່ວ່າ “ນັ້ນບໍ່ແມ່ນຄວາມຜິດຂອງເຈົ້າ” ແຕ່ຈະເຊື່ອແບບນັ້ນກໍຄົງຍາກຫຼາຍ. ບາງຄົນບໍ່ຍອມບອກໃຜໃນເລື່ອງທີ່ເກີດຂຶ້ນແລະປ່ອຍໃຫ້ຄວາມຮູ້ສຶກຜິດແລະຄວາມຮູ້ສຶກອື່ນໆທີ່ບໍ່ດີຄອບງຳຕົວເອງ. ແຕ່ຖ້າເຈົ້າມິດງຽບຢູ່ ນັ້ນຈະຊ່ວຍເຈົ້າຫຼືຄົນທີ່ທຳຮ້າຍເຈົ້າ? ດັ່ງນັ້ນ ຂໍໃຫ້ເຈົ້າເວົ້າອອກມາ.
ເລົ່າເລື່ອງທີ່ເກີດຂຶ້ນ
ຄຳພີໄບເບິນບອກວ່າ: ເມື່ອໂຢບຜູ້ຊອບທຳເຈິກັບຄວາມທຸກໜັກ ລາວເວົ້າວ່າ: ‘ຂ້ອຍຈະລະບາຍຄວາມທຸກອອກມາ!’ (ໂຢບ 10:1, ລ.ມ.) ອາດເປັນສິ່ງທີ່ດີທີ່ຈະເຮັດແບບໂຢບ ເພາະການເລົ່າເລື່ອງທີ່ເກີດຂຶ້ນກັບຄົນທີ່ໄວ້ໃຈໄດ້ຈະຊ່ວຍເຈົ້າໃຫ້ຮັບມືໄດ້ແລະຮູ້ສຶກດີຂຶ້ນ.
ຄວາມຮູ້ສຶກຂອງເຈົ້າອາດໜັກເກີນກວ່າທີ່ເຈົ້າຈະຮັບໄດ້. ເຈົ້າໜ້າຈະຂໍໃຫ້ຄົນອື່ນຊ່ວຍໂດຍເລົ່າໃຫ້ລາວຟັງ
ແອນເນັດເຫັນວ່າເປັນແບບນັ້ນແທ້. ລາວບອກວ່າ: “ຂ້ອຍເລົ່າໃຫ້ໝູ່ສະໜິດຄົນໜຶ່ງຟັງ ແລະລາວບອກຂ້ອຍໃຫ້ໄປເລົ່າໃຫ້ຜູ້ເຖົ້າແກ່ສອງຄົນໃນປະຊາຄົມຟັງ. ຂ້ອຍດີໃຈທີ່ໄດ້ເຮັດເຊັ່ນນັ້ນ. ຜູ້ເຖົ້າແກ່ລົມກັບຂ້ອຍຫຼາຍເທື່ອ ແລະເວົ້າໃນສິ່ງທີ່ຊ່ວຍຂ້ອຍໄດ້ຫຼາຍ ນັ້ນຄື: ເຫດການທີ່ເກີດຂຶ້ນບໍ່ແມ່ນຄວາມຜິດຂອງຂ້ອຍ. ຂ້ອຍບໍ່ໄດ້ເຮັດຫຍັງຜິດເລີຍ.”
ນາຕາລີເລົ່າໃຫ້ພໍ່ແມ່ຟັງໃນສິ່ງທີ່ເກີດຂຶ້ນ. ລາວບອກວ່າ: “ພໍ່ແມ່ໃຫ້ກຳລັງໃຈຂ້ອຍແລະບອກຂ້ອຍໃຫ້ເວົ້າອອກມາ ການເຮັດແບບນັ້ນຊ່ວຍຂ້ອຍບໍ່ໃຫ້ເກັບຄວາມໂສກເສົ້າແລະຄວາມຄຽດໄວ້ໃນໃຈ.”
ການອະທິດຖານກໍຊ່ວຍປອບໂຍນນາຕາລີເຊັ່ນກັນ. ລາວບອກວ່າ: “ການລົມກັບພະເຈົ້າຊ່ວຍຂ້ອຍໄດ້ ໂດຍສະເພາະຕອນທີ່ຮູ້ສຶກວ່າເລົ່າໃຫ້ຄົນອື່ນຟັງບໍ່ໄດ້. ເມື່ອອະທິດຖານ ຂ້ອຍສາມາດລະບາຍອອກມາຢ່າງເຕັມທີ. ຫຼັງຈາກນັ້ນ ຂ້ອຍກໍຮູ້ສຶກສະຫງົບໃຈ.”
ເຈົ້າເອງກໍຈະໄດ້ຮັບການ “ປິ່ນປົວໃຫ້ດີ.” (ຜູ້ເທສະໜາປ່າວປະກາດ 3:3, ທ.ປ.) ໃຫ້ເບິ່ງແຍງສຸຂະພາບທາງກາຍແລະທາງໃຈ ແລະພັກຜ່ອນໃຫ້ພຽງພໍ. ສິ່ງສຳຄັນທີ່ສຸດຄື ໃຫ້ໄວ້ວາງໃຈພະເຢໂຫວາພະເຈົ້າແຫ່ງການປອບໂຍນ.—2 ໂກລິນໂທ 1:3, 4
ຖ້າເຈົ້າໃຫຍ່ພໍທີ່ຈະມີແຟນ
ຖ້າເຈົ້າເປັນຜູ້ຍິງແລະຖືກແຟນລວນລາມ ເຈົ້າຄວນເວົ້າຢ່າງໜັກແໜ້ນວ່າ: “ຢ່າເຮັດ!” ຫຼື “ເອົາມືອອກແມະ!” ບໍ່ຕ້ອງຢ້ານວ່າຈະເສຍແຟນຈົນບໍ່ກ້າເວົ້າ. ຖ້າລາວຂໍເລີກຍ້ອນເຈົ້າເວົ້າແບບນີ້ ລາວກໍບໍ່ມີຄ່າພໍທີ່ເຈົ້າຈະຄົບນຳ. ເຈົ້າເໝາະສົມກັບຜູ້ຊາຍດີໆທີ່ຍອມຮັບຫຼັກການຂອງເຈົ້າແລະບໍ່ລ່ວງເກີນເຈົ້າ.
ຄຳຖາມທົດສອບເລື່ອງການລວນລາມ
“ຕອນຮຽນຢູ່ມັດທະຍົມຕອນຕົ້ນ ພວກຜູ້ຊາຍມັກດຶງສາຍເສື້ອຊ້ອນຂ້ອຍແລະເວົ້າແບບເສຍຫາຍວ່າ: ຖ້ານອນນຳເຂົາເຈົ້າ ຂ້ອຍຈະມີຄວາມສຸກຈົນບໍ່ມີວັນລືມເລີຍ.”—ຄໍເຣຕ້າ
ເຈົ້າຄິດວ່າຜູ້ຊາຍພວກນີ້ເຮັດຫຍັງ?
-
ກ ຢອກຫຼິ້ນ?
-
ຂ ຈີບ?
-
ຄ ລວນລາມ?
“ຕອນນັ່ງໃນລົດເມ ຜູ້ຊາຍຄົນໜຶ່ງເລີ່ມເວົ້າຫຍາບຄາຍແລະຈັບບາຍຂ້ອຍ. ຂ້ອຍປັດມືລາວອອກແລະບອກໃຫ້ລາວຫຍັບໄປໄກໆ. ລາວເບິ່ງໜ້າຂ້ອຍຄືກັບວ່າຂ້ອຍເປັນຜີບ້າ.”—ແຄນດີສ
ເຈົ້າຄິດວ່າຜູ້ຊາຍຄົນນີ້ກຳລັງເຮັດຫຍັງຕໍ່ແຄນດີສ?
-
ກ ຢອກຫຼິ້ນ?
-
ຂ ຈີບ?
-
ຄ ລວນລາມ?
“ປີກາຍນີ້ ຜູ້ຊາຍຄົນໜຶ່ງບອກຂ້ອຍທຸກໆມື້ວ່າລາວມັກຂ້ອຍແລະຢາກເປັນແຟນກັບຂ້ອຍ ເຖິງວ່າຂ້ອຍປະຕິເສດລາວຕະຫຼອດ. ບາງຄັ້ງລາວລູບແຂນຂ້ອຍ ຂ້ອຍຈະບອກລາວວ່າຢ່າເຮັດ ແຕ່ລາວກໍຍັງເຮັດ. ມີເທື່ອໜຶ່ງທີ່ຂ້ອຍກຳລັງມັດສາຍເກີບ ລາວກໍຍ່າງມາຕີກົ້ນຂ້ອຍ.”—ເບທານີ
ເຈົ້າຄິດວ່າຜູ້ຊາຍຄົນນີ້ເຮັດຫຍັງຕໍ່ເບທານີ?
-
ກ ຢອກຫຼິ້ນ?
-
ຂ ຈີບ?
-
ຄ ລວນລາມ?
ໃນສາມຄຳຖາມນີ້ຂໍ້ ຄ ເປັນຄຳຕອບທີ່ຖືກຕ້ອງ.
ການລວນລາມແຕກຕ່າງແນວໃດຈາກການຈີບແລະການຢອກຫຼິ້ນ?
ການລວນລາມເປັນການກະທຳຂອງຝ່າຍດຽວ. ເຖິງວ່າເຈົ້າໄດ້ບອກຄົນນັ້ນໃຫ້ເຊົາເຮັດ ແຕ່ລາວກໍບໍ່ເຊົາ.
ການລວນລາມເປັນເລື່ອງທີ່ຮ້າຍແຮງເຊິ່ງອາດນຳໄປສູ່ການທຳຮ້າຍທາງເພດ.
