Chakutalilaho, likumbi limwe Annette vamumbilile hamavu nakumupika. Ambile ngwenyi: “Ngwatetumukile, oloze lizu kalyapwile nakwivwakanako. Ngwapinjile, nakumuveta jimbanda, nakumupala vyala, oloze angutuvile poko. Kaha najingolo jangukumine.”

Kachi wapwile yove, kachi walingile ngachilihi?

Numba tuhu unaliwahisa kanawa, oloze vyuma vyavipi vinahase kusoloka, chikumanyi hakutambuka ufuku. Mbimbiliya ngwayo: “Vaka-mbushi kaveshi kutapa vakwavo lwola lwosena mukulahako, . . . vaka-chinyingi nawa kaveshi kufukila lwola lwosenako. Mwomwo lwola navyuma vyakwiza mukukasumuna vyeji kuvawananga vosena.”—Muka-kwambulula 9:11.

Vakweze vamwe veji kuvapikanga kuvatu vaze kavejivako, ngana muze chapwile kuli Annette. Oloze veka veji kuvapikanga kuvatu vaze vatachikiza, chipwe vene kuli vausoko. Natalie vamupikile kuli mukweze umwe uze valihachile nenyi omu apwile namyaka yakusemuka 13. Ambile ngwenyi: “Ngwevwile woma nasonyi, kaha kangwasakile kulwezako mutu numba umweko.”

Annette achili lika nakwivwa kupihya havyuma vyasolokele. Ambile ngwenyi: “Ngweji kushinganyekanga lika havyuma vangulingile ufuku uze. Ngweji kushinganyekanga ngwami kachi pamo ngwapinjile chikuma nakumuhonesa. Oloze omu angulemekele, ngwevwile namuvifuhwa keke. Kangwapwile nangolo jakulinga chuma numba chimweko, chipwe ngocho ngwatelele kulingaho chuma chimwe.”

Natalie naikiye eji kulihananga mulongo havyuma vyasolokele. Ambile ngwenyi: “Kachi kangwafwelelele chikuma mutu kanako. Visemi vatulwezelenga ngwavo twatela kupwanga hamwe nandumbwami nge tuli nakuhemena haweluka. Ngocho kuhona kwivwa chikiko chalingishile uze mutu angupike. Vyuma vyasolokele vyevwishile tanga yami kupihya, kaha ngweji kulihananga mulonga. Ngweji kwivwanga kupihya chikuma.”

Nge unakwivwanga kupihya ngana mwaAnnette naNatalie, kaha tachikiza ngwove mutu uze vanapiki keshi ikiye eji kulisakwilanga chuma kanako. Vatu vamwe veji kwambanga ngwavo chapwa chakutamo malunga kupika mapwevo, kaha nawa ngwavo mapwevo veji kulingisanga malunga vavapike. Oloze omwo keshi mukikoko. Shikaho, nge vakupikaho lyehi, kanda ulihana mulongako.

Chapwa chachachi kwamba ngwetu, “kanda ulihana mulongako,” oloze chapwa chachikalu kwitavila mazu kana nge yove vanapiki. Vatu vamwe veji kuvizanga chikuma nakuhomba hakwanuka omu vavapikile kunyima, kaha kaveshi kwambululako. Jino vyuma muka munganyala nge muhona kulwezako vakwenu? Shikaho, chapwa chamwaza kwambulula nge vanakupiki.

Mbimbiliya yatulweza ngwayo omu Yopa apwile muukalu, ambile ngwenyi: “Nanguhanjika mwomwo yakulyonyinga chamumuchima wami.” (Yopa 10:1) Nayove unahase kunganyala nge mulwezako vakwenu. Nge mulwezako mutu umwe wafwelela, nahase kukukafwa nakukujikijisa mangana wivwenga kumuchima hwo.

Omu mukiko alingile Annette. Ambile ngwenyi: “Ngwalwezeleko sepa lyami uze ngwazangile chikuma, kaha angulwezele nguyenga nakulweza vakulwane muchikungulwilo. Ngwalingile vene ngocho kaha vangukafwile. Vashimutwilile nayami mapapa kakavulu nakungukolezeza ngwavo kangwatelele kulihana mulongako mwomwo keshi yami ngwalisakwilile kulinga chuma kanako. Ngwevwile kumuchima hwo.”

Kaha nawa Natalie alwezele visemi jenyi. Ambile ngwenyi: “Vangutumbikile hamavu nakungukolezeza ngwavo kangwatelele kwivwa kupihya nakulihana mulongako, mwomwo kangwalisakwililile kulinga chuma kanako.”

Natalie nawa alombele kuli Kalunga, kahechi chamuvendejekele. Ambile ngwenyi: “Kulomba kuli Kalunga changukafwile, chikumanyi halwola luze ngwahombele. Omu ngweji kulombanga, ngweji kulombanga namuchima wosena nakufwelela ngwami Kalunga netavila kulomba chami.”

Nayove nawa unahase kutachikiza ngwove kwatwama lwola lwakulihehwa kumuchima. (Muka-kwambulula 3:3) Watela kulilama ove lyavene kumujimba namuvishinganyeka. Wananga lwola lwakunoka, oloze chachinenenyi pendamina hali Yehova uze apwa Kalunga muka-kuvendejeka chosena.—Wavaka-Kolinde 2, 1:3, 4.

Nge upwevo, kaha kuli mutu ali nakukushinjila ngwenyi mulisavale, watela kumika nakumulweza hatoma ngwove, “Ami kangwazanga chuma kanako!” chipwe ngwove, “Kangute, kanda kungukwatako!” Kanda kushinganyeka ngwove nge muhanjika ngocho kaha mumwivwisa kupihya nakuhona kulimbatako. Nge mwakana kukumbata mwomwo ngwenyi unakane kulisavala nenyi, kaha keshi mutu wamwenemweneko. Vandamina kulutwe nakukasoloka mutu wamwenemwene uze mwakakuvumbika nakukavangiza jindongi jaKalunga.

Coretta ambile ngwenyi: “Omu ngwapwile kushikola, vakweze vamalunga vahichilenga kunyima nakungukoka mukafunga mavele nakungwamba ngwavo ngunahase kwivwa kanawa nge nangulisavala navo.”

Unashinganyeka ngwove ava vakweze vamalunga vapwile

1. Nakuseseka tahi?

2. Nakumweseka kaha tahi?

3. Nakusaka kumupika tahi?

Candice ambile ngwenyi: “Omu twapwile musacha, mukweze umwe walunga aputukile kuhanjika mazu aseya nakungukwatakwata. Ngwamushinjikile nakumulweza angusosoloke. Evwile kupihya chikuma nakungutala mujila yayipi.”

Unashinganyeka ngwove ou mukweze apwile nakusaka kulinga ika kuli Candice?

1. Nakuseseka tahi?

2. Nakumweseka kaha tahi?

3. Nakusaka kumupika tahi?

Bethany ambile ngwenyi: “Mwakawali, mukweze umwe angulwezelenga ngwenyi anguzangile chikuma, kaha apwile nakusaka ngupwenga ngukajila kenyi. Oloze ami ngwakanyinenga. Shimbu jimwe akwachilenga nakulivoko lyami. Ngwamukanyishilenga, oloze ikiye kalitwaminyineko. Likumbi limwe omu ngwanongamine nakuvwala sapato, anguvetele hamatako.”

Uno unashinganyeka ngwove ou mukweze apwile:

1. Nakuseseka tahi?

2. Nakumweseka kaha tahi?

3. Nakusaka kumupika tahi?

Kukumbulula chakwoloka havihula vyosena vitatu shina C.

Uno kusaka kupika mutu chalihandununa ngachilihi nakweseka mutu chipwe kumusesekesa kaha?

Nge mutu mwasaka kukupika, keshi kulitwamina nge naumukanyisako. Eji kutwalangaho lika swi nomu mwakupika.

Mutu wakufwila kupika apwa wamupi chikuma mwomwo nahase nakujiha mutu