Henohu Annette kanda yeluki chuma chamwekeneña wakasumukili anamuhololi dehi heseki kudi muntu wamulukukili. Wahosheli nindi, “Nesekeli nañovu jejima nami nimukañeshi. Nesekeli nami nitaalumoki, ilaña nakuminini dakonashana. Namushinjikili, namweteli chibaka, namweteli ikofi nawa namupalatili. Aha dihantapiliyi mpoku. Natiyili nimumafwaha keki.”

Neyi yeyi wadiña muniku kukala, wadi kwila ñahi?

Yuma yatama yinateli kumwekana hela chakwila wunadiloñeshi hadaha kuhitila mukwikala wasoñama neyi wunakwenda nawufuku. Bayibolu yahosha nawu, ‘akwalufuchi hidiwu ashiyañamu akwawuku, hela kudya, akwamaana hidiwu akumonañaku, muloña mpinji nakululakana chayilulakenaña tuhu wejima wawu.’—Mukwakutañisha 9:11.

Kufwana Annette, atwansi amakwawu ayikaamaña chakukanjikija kudi muntu abula kwilukawu. Amakwawu ayilukukaña kudi antu adilukawu nawu hela antaña jawu. Hadiñayi nayaaka 10 yakuvwalika, Natalie amukaamini chakukanjikija kudi kampululu wadiña ntuñi nawu. Wahosheli nindi, “Hatachi nadiña nawoma nawa natiyileña nsonyi chakwila hinalejelihu muntu niwumuku”.

Annette wuchidi kudinka muloña hayuma yamwekeni. Wahosheli nindi, “Nihanu nichidi kwanuka chikupu yuma yamwekeni hawuna wufuku. Nichidi kutoñojoka nami kachi nazatili nañovu kulonda nimukañeshi ona iyala. Chikuma chacheni chidi chakwila nawu, chantapiliyi mpoku, natiyili woma nankashi. Hinatwesheli kwila chumaku, ilaña natoñojokaña nami kachi nelilihu chuma chimu.”

Natalie niyena wuchidi kudinka muloña. Wahosheli nindi, “Hinateleleli kusweja kumukuhwelelaku. Anvwali jami atwinkeli lushimbi lwakwila nawu ami namuhelami twatela kwikalaña hamu neyi tunakuhema hanji, ilaña natiyilili wanyi. Dichi natoñojokaña nami yami nakojejeli añili chatama kudi muntu wamuchituñilu. Chuma chamwekeni chaneñesheli chisaka chami nawa natoñojokaña nami yami nakojejeli iku kukala. Nakabakanaña nankashi nayitoñojoka yeniyi.”

Neyi watiyaña neyi chatiyañayi Annette hela Natalie, watela kwiluka neyi muntu anakaamiwu chakukanjikija yena hidiyi wakeñaku. Antu amakwawu amonaña iyi nsañu nawu yapela, nakuleyela mukuhosha nawu chidi hohu chiwahi atwansi awamayala kwila mwenimu, hela nawu ona muntu anakaamiwu chakukanjikija wadikeñela yomweni. Ilaña kwosi muntu watelela kumukaama chakukanjikijaku. Neyi yeyi akaaminiwu muniyi njila, eyi wudi namuloña wanyi!

Hela chochu, chapela kutaña mazu akwila nawu “eyi wudi namuloña wanyi,” ilaña kukuhwelela awa mazu kwakala. Antu amakwawu atwalekañahu kutoñojoka hayuma yamwekeni nawa akabakanaña nayitoñojoka yakudinka nyiloña niyitoñojoka yikwawu yatama. Hinyi watelela kumwenahu, eyi tahindi wakukaamini? Yeyi wudi nawuswa wakufuukula mwakwilila.

Bayibolu yatulejaña nawu hampinji yaswejeliyi kwakama, Yoba muntu waloña wahosheli nindi: “Nukuhosha munamoni muchima wami kulula.” (Yoba 10:1) Wunateli kuhetelamu neyi wila mwomumu. Kulejaku muntu iwakuhwelela kunateli kukukwasha kwiluka yuma yamwekeni nawa kukukukwasha kubula kutoñojoka nankashi.

Chumichi chamukwashili Annette. Wahosheli nindi: “Nalejelimu ibwambu dami nawa wanlejeli nindi natela kulejamu aeluda akwaKristu amuchipompelu chami. Inakutiya kuwaha muloña dichinelili. Ahanjekeli nanami kakavulu nawa anlejeli mazu anshikili hamuchima nawu ami nadiña namuloña wanyi nachuma chamwekeni. Kwosi chuma chinatamishili.”

Natalie walejelimu anvwali jindi chuma chamwekeni. Wahosheli nindi, “Ankwashili chikupu. Anlejeli nawu tuhanjeki haniyi nsañu, nawa kwila mwenimu kwankwashili kubula kwikala nachineñi nikwenda nachikela.”

Kulomba kwamukundejeli cheñi Natalie. Wahosheli nindi, “Kuhosha naNzambi kwankwashili nankashi, sweje-e hampinji yinatiyili nami hinukutwesha kulejamu muntu niwumuku. Neyi inakulomba, nekalaña wakasunuka kuhosha yuma yidi kumuchima. Kwankwashaña kwikala mukuwunda nawa kwamwena.”

Nineyi wunateli kwiluka neyi kwekala “mpinji yakuuka.” (Mukwakutañisha 3:3) Dihembi eyi aweni kumujimba nimuyitoñojoka. Ikalaku nampinji yeneni yakunooka. Nankashi dinu, watela kushindamena hadi Nzambi wakukundeja, Yehova.—2 Akorinda 1:3, 4.

Neyi wudi kansi wamumbanda nawa anakukukanjikija kudiñija muyilwilu yatama, chikutama wanyi neyi wukuhosha nezu dañovu neyi “Nleki!” hela, “Kunkwata nehi!” Bayi wutiya woma neyi hadaha wukudihela nakajila keyiku. Neyi wukumanisha wubwambu wenu hamuloña waniyi nsañu, dikwila nawu nashikilimu wanyi! Watelela kwikala neyala walumbuluka, muntu walemesha mujimba ninshimbi jeyi.

“Hinadiña kushikola kutachikila mugiledi 5-8, atwansi awamayala adiña nakunkoka mubura nakuhosha mazu atama adi neyi chinnateli kutiya neyi nidikaama nawu.”—Coretta.

Wunakutoñojoka neyi ana atwansi awamayala adiña

1. Nakumusensekesha?

2. Nakumukenkamina?

3. Nakumusañumuna kulonda yatiyi wuvumbi?

“Mubasi, kansi weyala watachikili kunhosha mazu atama nikunkwatujola. Napakwili chikasa chindi nakumuleja yaswini kwakulehi nanami. Wantalili neyi kwiji nadiña wazaluka.”—Candice.

Chumanyi chiwunakutoñojoka chelileñayi iwu kansi weyala kudi Candice?

1. Wadiña nakumusensekesha?

2. Wadiña nakumukenkamina?

3. Wadiña nakumusañumuna kulonda yatiyi wuvumbi?

“Chaaka chinamani, kansi weyala watwalekelihu kunleja nindi wankeña nawa wakeñeleña niikali kajila kindi hela chakwila namukaanineña mpinji yejima. Mpinji jikwawu, wanhemesheleña hachikasa. Namukanisheliña, ilaña walekeleña wanyi. Kuhiñahu, hampinji yinakasileña nyiya yahansapatu yami, wañeteli kumahanda.”—Bethany.

Kwesekeja nachiwunakutoñojoka, iwu kansi weyala wadiña:

1. Nakumusensekesha?

2. Nakumukenkamina?

3. Nakumusañumuna kulonda yatiyi wuvumbi?

Ñakwilu yaloña kunawa malwihu asatu hi C.

Chumanyi chinaleteshi chilwilu chakumusañumuna kulonda yatiyi wuvumbi chambuki nayilwilu yidi neyi kumusensekesha hela kumukenkamina?

Chilwilu chakusañumuna muntu kulonda yatiyi wuvumbi chakundama kukabadi kamu hohu. Chatwalekañahu hela chakwila muntu anakusañumunawu nakaani.

Chilwilu chakusañumuna muntu yatiyi wuvumbi chatama nankashi. Chatwalaña mukwila wuvumbi chakukanjikija.