Mbere Annette amenya ũrĩa gũgwĩta, mwithũkĩri waawe aamũgwatĩre amũgera nthĩ. Ariuga: “Ndagererie kũthithia jonthe nkũũmba, gwitunyũkia. Ndagererie kuuga mbu ndaremwa. Ndamũgera, ndamũringanga na magũrũ na nkundi, na ndamũng’ara. Rĩu nĩrĩo ndaigĩrue amunta na gaciũ. Ndaaga inya buru.

Ũrĩngĩthithia atĩa ũntũ ta bũu bũgũkarĩkĩrĩte?

Kinya ũkethĩrwa withuranĩrĩte—mbuga gwĩta ũtukũ wimenyeerete—mantũ jamathũũku no jakarĩke. Bibiria yugaga: “Antu baria batangurutanaga ntangurutanone ti baria bari na rwiro . . . kana gwikiirwa kwithirwa ni kwa baria boome; indi-ri, gikuu na mutino bikinyagira bonthe.”—Mutumiiria 9:11.

Antũ bamwe babeethĩ ta Annette, bagwatagwa kĩa-inya nĩ muntũ batiijĩ. Bangĩ bathithagĩrua ũu nĩ muntũ bakũmenya kana kinya muntũ waao. Arĩ na mĩaka ĩkũmi akĩ, Natalie naagwatĩrwe kĩa-inya nĩ mũtaana wa nthĩ ya mĩaka 19, watũũraga akuĩ na kwaao. Natalie ariuga: “Rĩa mbere ndaakĩrĩre mono, ndacookerwa nĩ nthao, gũtĩwe ndeera.”

Mwanka nandĩ Annette no aigagua teka aatĩrie. Ariuga: “Nkaraga nkĩriikanaga rĩngĩ na rĩngĩ ũtukũ bũu. Mbonaga teka ndĩrĩngĩgeria na inya nkũrũki kenda atigana naani. Ũmma nĩ atĩ, ndathirĩre inya buru akũũmunta na gaciũ. Gũtĩ bũngĩ ndĩrĩngĩthithia nkũrũki, ĩndĩ ndĩrĩona nĩ ndabuĩri gũciũmia.”

Kinya Natalie narũjaga na kwigua arĩ na ĩatia. Ariuga: “Ntaabuĩri gwĩtĩkia antũ mono. Aciari baakwa nĩbeekĩte waatho atĩ, ũũni na mwarĩo-cia twabataraga gũcethaga oome tũrĩ amwe, ĩndĩ ntaigĩrue. Kwou mbonaga ka ndaere mũtũũri kaanya ga kũnthithĩria bũthũũku. Kĩrĩa gĩakarĩkĩre nĩgĩacumbũrĩre antũ ba nja, na mbonaga nĩni ndaatũmĩre baigua ũrũrũ bũũnene ũu. Bũu nĩbu ndũjaga nabu nkũrũki ya jonthe.”

Ũkethĩrwa ũkiigagua ta Annette kana Natalie, ĩtĩkia atĩ muntũ ũrĩa ũgwati kĩa-inya, tĩ kwenda kwawe. Antũ bamwe bageragia kũũthia mantũ, bakaigwatia no u ataana bathithagia, kana atĩ ũrĩa ũgwati kĩa-inya nĩwe ũrendaga. Ĩndĩ gũtĩwe ũbuĩri kũgwatwa kĩa-inya. Ũkeethĩrwa ũrathithĩrua ũthũũku ta bũu, tĩ kwenda gwaku!

Nĩ mma kũthooma biugo “tĩ kwenda gwaku,” nĩ ũntũ bũbũũthũ; ĩndĩ kũbwĩtĩkia no kwĩthĩrwe kuumi nkũrũki. Bamwe bakaraga bakĩthũgaanagĩria jarĩa jaakarĩkĩre, na bakathangĩka bakiigagua nĩbo baatĩrie, na gũcumbũka kũngĩ ta kũu. Ĩndĩ gũkira gũteethagia ũũ—nĩgwe kana nĩ ũrĩa wakũgwatĩre kĩa-inya? Kenda witeethia nũbuĩri kũthũgaanĩria ũntũ bũngĩ.

Bibiria ĩtwĩraga rĩrĩa ntomũrũme ũmwagĩru Ayubu aathangĩkagua mono nĩ mantũ jaawe, aaugĩre: ‘Nkaaria na ung’entu bwa nkoro yakwa.’ (Ayubu 10:1) No ũgunĩke wathithia ũu. Kwaria na muntũ ũgwĩtĩkia no gũgũteethie kũũmbana na ũrĩa ũkwigua, na gũgũteethie kuurũka kuumania na kwigua bũthũũku.

Annette naateetherue nĩ ũntũ bũu. Ariuga: “Ndaarĩrie na mũcoore wa akuĩ, na arambĩkĩra inya kwaria na akũrũ Akristũ ba kĩũthũrano gĩetũ. Kaaba ndaathithĩrie u. Nĩ twakarĩre nthĩ nabo magiita jang’anona na barambĩĩra bungwa bũrĩa ndabataraga kwigua—atĩ ũrĩa gwakarĩkĩre gũtaarĩ ĩatia rĩakwa. Bũtaarĩ wendi bwakwa kinya aniini.”

Natalie neerĩre aciari baawe ũrĩa gwakarĩkĩre. Ariuga: “Nĩbanteetherie. Bambĩkĩra inya kwarĩĩria ũntũ bũu, na nĩgwanteetherie ntĩgakare ndiithikĩĩrĩte na nthũũri nkorone.”

Natalie kinya naaborerue nĩ maromba. Ariuga: “Kwaria na Mũrungu nĩgwanteetherie, mono mono ĩgiitene ta rĩu ndaigagua ntĩũmba kwĩra muntũ. Rĩrĩa nkũromba nĩmpũmbaga kwaria jonthe jarĩa jarĩ nkorone. Nĩgũtũmaga mbigua ndĩna thĩĩrĩ na ũkiri.”

Kinya gwe ũkoona kũrĩ na “igita ria . . . kworia.” (Mutumiiria 3:3) Imenyeere kĩmwĩrĩ na ũrĩa ũkwigua. Urũka bwa kũng’ana. Na bwa gĩtũmi nkũrũki, ĩrĩgĩĩra Jehova Mũrungu wa kũboranĩria mantũne jonthe.—2 Akorintho 1:3, 4.

Kethĩra ũrĩ mwarĩ na nũgwatĩkwa ũthithia waganu, tĩ bũthũũku kuuga na ũcamba, “Tiga gwe!” kana, “Tiga kũngwata!” Ũkarega kuuga ũu tontũ nũgũkĩra mwendwa waaku agũtiga. Kethĩra agagũtiga tontũ bwa ũntũ bũu, atĩgũkũbuĩra! Ũrĩbatara ntomũrũme wengwa, ũgũtĩĩa mwĩrĩ jwaku na jarĩa wĩtĩkĩtie.

Coretta ariuga: “Tũrĩ cukuru, ataana barĩngĩkuucia cindiria yaakwa na bakaaria biugo bũtĩbui—atĩ no mbigue bwega mono kethĩra no menyane kĩmwĩrĩ nabo.”

Ũrĩthũgaania ataana bau ka

1. Baacethaga nawe?

2. Baamũthangaga?

3. Baamũthithagĩria na njĩra ya waganu?

Candice ariuga: “Tũrĩ mbacine, mũtaana ũmwe aambĩrĩĩrie gũntongatonga akĩmbĩraga mantũ ja kũmbagĩra nthoni. Ndamũringĩre njara na ndamwĩra eete. Aantegere ta ndaarĩ na nthũ.”

Ũrĩona atĩa, mũtaana ũu ka:

1. Aacethaga nawe?

2. Aamũthangaga?

3. Aamũthithagĩria na njĩra ya waganu?

Bethany ariuga: “Mwaka mũthiru, mũtaana ũmwe naambĩraga nampendete na nendaga twe acoore, kinya kethĩra nĩndaregaga. Rĩmwe na rĩmwe naangwataga njara, nkamũkania ĩndĩ atiigue. Ĩgiita rĩmwe nkĩogaga kĩratũ, aandingĩre nyuma.”

Ũrĩona atĩa, mũtaana ũu ka:

1. Aacethaga nawe?

2. Aamũthangaga?

3. Aamũthithagĩria na njĩra ya waganu?

Kĩrĩ jau jathatũ, ũntũ bũrĩa baathithagĩrua nĩ bwa C.

Gũceethera muntũ kana kũmũthanga, kwĩna mwanya jũrĩkũ na kũmũthithĩria na njĩra ya waganu?

Kĩrĩ njĩra ya waganu, nĩ ũmwe wĩthagĩrwa akĩthithĩria ũngĩ u. Gwĩtaga na mbere kinya rĩrĩa ũrĩa ũkũthithĩrua u akũmũkaania.

Kũthithĩrua waganu nĩ ũntũ bũũrito. No gũtongeerie kĩrĩ kũgwatwa kĩa-inya.