Daar a ye, rao n ta n yõk a Aline n lubi. A Aline bãnga rao wã sẽn da rat n maane. Ad a sẽn yeele: “M mao m pãng fãa n na n fãasg m meng n pa tõog ye. M kelmame la m koɛɛgã ra pa yit ye. M da vɩgdame, n tãoodẽ la m pãbd-a ne m pãng fãa. La a wa n kõsa mam ne sʋʋga. M da pa le tõe n maan baa fʋɩ.”

Yel-kãnga buud sã n paam foo, f na n maana wãna?

Baa fo sã n mi f sẽn tõe n maanega, n gũusd sõma f sã n kẽnd yʋngo, yel-be-kãngã tõe n paam-f lame. Biiblã yetame tɩ “ka sẽn zoet-b tʋʋll n tõogd zoeese . . . la ka b rãmb nins sẽn tar bãngrã n paamd lohorem ye; bala wakat la yel-lingdem paamda bãmb fãa.”—Koɛɛg soaba 9:11, MN.

Wa a Aline, kom-bɩɩs kẽer la b maan pãng n kẽ ne. Kẽer yaa neb b sẽn mi, sãnda pʋd n yaa b zakã ned n maan-b pãng n kẽ ne-ba. A Natali sẽn wa n zems yʋʋm piiga, b yak sẽn yaa bi-bɩɩg n modg-a n kẽ ne-a. A yeelame tɩ rabeemã la yãndã yĩnga, a ra pa rat n togs ned ye.

A Aline tagsdame tɩ bũmb ning sẽn maanã yaa yẽ yelle. A yeelame: “M tagsda bũmb ning sẽn maan baraar yʋngã yell wakat fãa. M yeta m meng tɩ m da segd n maoome n paas t’a ra paam n yõg-m ye. La a sẽn kõs maam ne sʋʋgã, m gĩina fãa maagame. Yaa sɩd tɩ m da pa le tõe n maan baa fʋɩ. La m yamẽ, m da segd n maoome n paase.”

A Natali me ningda a meng taale. A yeelame: “M roagdbã ra yeela maam ne m kẽema tɩ d sã wa be yɩng n deemdẽ, bɩ d ra zãag taab ye. La m sẽn da kõ-m meng sɩd tɩ loogã, m pa kelg ye. Dẽnd yaa maam n maan la tõnd yakã sẽn paam n yõg-ma. Yellã namsa m zakã rãmb wʋsgo. Mam yamẽ, woto fãa yaa mam yelle. Rẽ n namsd maam n tɩ yɩɩda.”

Fo me sã n tagsda wa a Aline la a Natali, bãng tɩ b sã n yõg neda, yaa pãng la b maan-a. Pa tũ ne a raab ye. Neb kẽer pa rɩk yõgbã wa yell ye. B pʋd n yetame tɩ rap nins sẽn maan rẽ wã pa wẽnga, la tɩ b sẽn yõg-b rãmbã meng sẽn da rat la rẽ. La b pa segd n maan ned pãng n kẽ ne-a ye. Ned sã n zoe n maana foo pãng n kẽ ne-fo, pa fo yell ye.

Yɩl n tõog n sak n deeg tɩ bũmb ning sẽn maanã pa fo yell pa nana ye. Neb kẽer pa tol n dat n sak n deeg tɩ pa bãmb yelle, n ningd b mens taale, tɩ namsd-b wʋsgo. La sɩd-sɩdã, f sã n sĩnd n pa togse, ãnd la manegda? Foo bɩ, bɩ sẽn yõg-a foo wã? Yɩta sõma tɩ f bao yellã tɩɩm.

Biiblã yeelame tɩ yɛlã sẽn wa n loog nin-tɩrg a Zoobã, a yeelame yaa: “Mam na n basa m yam n gom m toogã yelle.” (Zoob 10:1) Fo me sã n maan wa a Zoobe, na n sõng-f lame. Bao ned f sẽn kɩs sɩd ne, n togs-a yellã. Rẽ, bilf-bilfã f na n tõog n maoo ne yellã, n da le ningd f meng taal ye.

A Aline wilgame tɩ rẽ sɩd sõng-a lame. A yeelame: “M tɩ togsa m zoa, t’a sagl maam tɩ m togs tigingã kãsem-dãmb a yiibu. M sũur yɩɩ noog m sẽn maan rẽ wã. B sõsa ne maam naoor wʋsgo, la b togs maam bũmb toor-toor sẽn kɩt tɩ m sak n deeg tɩ pa mam yell ye. M da pa tar taal baa-baa.”

A Natali yẽ togsa a roagdbã. A yeelame: “B yeela maam tɩ pa mam yell ye. B sagla maam tɩ m nong n sõsd rẽ yelle. Sõng-m lame tɩ m sũurã ra pa sãamd wʋsgo, tɩ m yamã me ra gãe bãane.”

Pʋʋsgã me belsa a Natali. A yeelame: “Sõnga maam, sẽn yɩɩd fãa m sã n wa tagsdẽ tɩ m pa na n tõog n togs neda. M sã n pʋʋse, m tõogd n pelga m pʋg n gome, tɩ ra sõngd-m tɩ m yamã gãand bãane.”

Bãng tɩ fo me tõe n paama f yellã tɩɩm. Biiblã yetame: “Tɩpg wakat me beeme.” (Koɛɛg soaba 3:3) Tagsd bõn-sõma yell tɩ sõng-fo. Bao sẽk wakat fãa n vʋʋsdẽ. La sẽn yɩɩd fãa, teeg a Zeova sẽn yaa belsg fãa Wẽnnaamã t’a na n sõng-f lame.—2 Korẽnt-rãmbã 1:3, 4.

Fo sã n yaa pʋg-sad tɩ ned pẽdgd foo n dat tɩ f maan sẽn pa sõma, bɩ f yeel-a vẽeneg tɩ “bas maam sɩɩ,” bɩ “ra sɩɩs maam ye. Yãk f nugã be.” Ra yɛɛs ye. Baa f pʋg-sadã bɩ f mise wã sã n bas foo rẽ yĩnga, bɩ f bãng t’a pa tog ne foo ye. Bao ned sẽn waoogd foo, la a nand fo sẽn yãk yam ningã.

A Coretta yeelame: “M sẽn da be kolɛɛsã, kom-dibli n da soosd n wat mam poorẽ wã n takd mam soutien wã, la b yet maam tɩ m sã n sak n kẽ ne bãmba, m sũur na n yɩɩ noogo.”

Fo tagsdame tɩ kom-bɩɩs kãensã sẽn maanã yaa:

1. Reem bɩ?

2. Roob bɩ?

3. B baood n na n kẽe ne-a bɩ?

A Candice yeelame: “Biisã pʋgẽ, bi-ribl n gom maam gom-yoodo, la a gãd maam. Mam penga a nugã la m yeel-a t’a serg la a bas maam. A ra getame tɩ mam yaa yalma.”

Fo tagsdame tɩ bi-ribl kãnga sẽn maanã yaa:

1. Reem bɩ?

2. Roob bɩ?

3. B baood n na n kẽe ne-a bɩ?

A Bethany yeelame: “Rɩẽ, bi-ribl n da yet maam tɩ yẽ nonga maam, la t’a ratame tɩ d yi ne taaba. La m da zãgsda wakat fãa. Wakat ninga, a saagda mam nugã. La baa m sẽn da yet-a t’a ra maanã, a ra pa kelgd ye. Daar a ye, m da sur n sẽbda m neooda wã, t’a ta n wẽ mam kɛgbã.”

Sã n yaa ne foo, bi-riblã sẽn maanã yaa:

1. Reem bɩ?

2. Roob bɩ?

3. B baood n na n kẽe ne-a bɩ?

Zĩis a tãabã fãa, yaa tãab-n-soabã la leoorã.

Bõe n kɩt tɩ pʋg-yõgr yaa toor ne roob bɩ reem?

B sã n yõg foo, tõe n yɩɩ toog tɩ f tõog n mao ne yel-kãnga. Togs neda, n kos sõngre