Mwanarume wakajipa Annette wakamuwisira pasi acito atozvibata kuti icinyi ciri kuitika. Annette anoti: “Ndakaeja zvese zvandaikwanisa kuti ndiphojomoke. Ndakaeja kukhuwa, asi izwi rangu arizivi kubuda. Ndakamundunda, kumuthaura, kukandira zvibhakera no kushuna. Ndakazozwa cipanga cecindibaya. Ndakamuka kupera simba.”

Kudari nowainga pa mugariro wakadari, waizoitenyi?

Pikija wakanasiririka—kana kufamba wakangwarira no usiku—zvakashata zvingaitika. Bhaibheri rinoti: “Mujaho aubudiriri ngo ndava yo kukasikira kugogoma; ruzinji vandhu vanoziva avaiti vakuru: Bzakanaka no bzakaxata abzikheti mundhu.”—Mucumaeri 9:11.

ocidoko vamweni, inga ndi Annette, vanojiphwa ngo vandhu vovacikazivi. Vamweni vanojiphwa ngo vandhu vavanoziva pikija vopaukama kamare. Paainga no gumi ro makore basi o kubahwa, Natalie wakajiphwa ngo mujaha wo pacigarisano pake. Iyena anoti: “Ndakathya maningi no kupseruka zvokuti pakutanga andina wandakabvunja.”

Annette acindori kuhwisana no mazwiro o kuzviha mwoyo ngo pamusoro po zvakaitika. Iyena anoti: “Zvinondoramba zvecindovia mu musoromu zvakaitika pa usiku hwondhohwo. Ndinovona kuti ndaidikana kuhwa maningi. Cokwadi nga ici, pakupera kubhinyiwa, ndaigara ndecindokaruka basi ngo kuthya. Apana candicakwanisazve kuita, asi ndinozwa inga kuti ndaidikana kuita ciri cese.”

Natalie ari kuhwisanavo no mazwiro o kujipumbha. Iyena anoti: “Andicaidikanepi kujithemba maningi. Vabari vangu vainga vakadira mutemo wokuti inini no munukuna wangu taidikana kufamba tese patinonga tecitamba kunja, asi andizivi kuzwira. Ndinozwa inga kuti ndakapa mukana mujaha wo pacigarisano kuti andihwajise. Zvakaitikaro zvakapsasa mbhuri yangu, zve ndinondojizwa ndino ndava ngo kuvahwajisa. Izvi ngo zvinonditambuja.”

Kudari mazwiro ako akafanana no a Annette kana Natalie, ramba weciceukija kuti mundhu wakajiphwa andiepi wakaita kuzvida. Vandhu vamweni vanotora shwiro iyi voirerusa, veciipembeja ngo kuti ngo zvinondoita vafana kana wakajiphwaro wakazviregerera. Asi apana na umwe anofanera kujiphwa. Kudari wakambojiphwa inga uku kunosuruvaja, audikani kujipa ndava!

Zvokadi kamare, kuverenga masoko okuti “audikani kujipa ndava” zvakareruka; kuzvitendera zvingavavo zvimweni kamare. Vamweni vanoviga mazwiro avo mumwoyo mavo o zvakaitika zve vanotambujwa ngo kuzviha mwoyo no mazwiro amweni acikabesi. Asi ndiani acabesereka ngo kunyarara kwako—iwewe kana wakakujipaya? Zviri nane kurangarira njira imweni yokuhwisana no mugariro uu.

Bhaibheri rinotibvunja kuti pa mukuvo wo matambujiko ake, mururami Jobe wakati: “Ndinozovereketa bziri mu hana yangu.” (Jobe 10:1) Ungabesereka ngo kuita zvakafanana. Kubhuya no mundhu waunogonda, ngo kufamba ko nguva kungakubesera kurarama no zvakakuitikira zve kukubesera kuwanazve kumusijirika mu mazwiro okuhwajihwa.

Annette wakazvivona zviri zvokadi. Iyena anoti: “Ndakabhuya no shamwari yopamwoyo, zve iyena wakandivangisa kuti ndibhuye no vakuru vaviri vo mu ungano yangu. Zvakava zvakanaka ngo kuita kudaro. Vakabhuya neni mukuvo muzinji zve vakandibvunja kamare zvandainga ndecida kuti ndizwe—zvakaitikaro asipi ndava yangu. Apana na cimwe co zvakaitikaro yainga ndava yangu.”

Natalie wakabhuya no vabari vake ngo pamusoro po kujiphwa. Iyena anoti: “Ivona vakandibesera. Vakandivangisa kuti ndibhuye ngo pamusoro po shwiroyo, zve izvi zvakandibesera kuciripi kuti ndijizwire pena no kunyangajwa ngo mukati.”

Natalie wakavonazve zvecibesera kuita mukumbiro. Iyena anoti: “Kubhuya na Mwari kwakandibesera, maningi-ningi pa mukuvo jia pondaizwa kuti andidi kubhuya no mundhu umweni. Pandinoita mukumbiro, ndinokwanisa kuvereketa ndakasujunuka. Izvi zvinondipa runyararo no kugajana.”

Unokwanisavo kufumbhura kuti pano “mukuvo wo kurapa.” (Mucumaeri 3:3) Jingwaririrei wega munyama no mu mazwiro. Nasa kuzorora ushoni. Kupinda zvese, zvidirei kuna Mwari wo unyarajo hwese, Jehovha.—2 VaKorinto 1:3, 4.

 Kudari uri musikana zve uri kuvangirijwa kuti uite zviito zvicizivi kucena, apana cakashata ngo kunanga wakavanga kuti: “Andizvidi zvounoitaro,” kana “Ucandibata wazvizwa!” Ucadothya kuti ungazorambhwa ngo mujaha wako. Kudari akakuramba ngo ndava yo shwiro iyi, wainga acizivi kukufanera! Iwewe unofanera mwanarume anoreremeja muviri wako no zvinokutungamirira.

“Pa Ensino medhiyo, majaha aikweva kurupeti yangu ngo sure vecinanga kuti mu njira yokudenga mushekenyera inga kuti: manera ondaizodakajihwa ndikavata navo.”—Coretta.

Unorangarira kuti majaha ao ainga

1. Ecitamba hao na Coretta?

2. Ecimubvunjirira ngo mazano?

3. Ecithyisijira Coretta pa vatano?

“Mu majhibhomba, umwe mujaha wakatanga zviro zvinonyangajisa pomwe no kundibata. Ndakataka nyara yake ndomubvunja kuti aibvise. Wakandisota inga kuti andiripi ushoni mu musoro.”—Candice.

Unorangarira kuti mujaha uu wainga eciitenyi na Candice?

1. Waitamba nae?

2. Waimubvunjirira?

3. Waimuthyisijira pa vatano?

“Gore rakapera, wakaramba acindibvunja kuti waindida ngo kudaro waida kuti timbopasiari tese, pikija nguva jese ndairamba. Nguva jimweni, waipuruzira mukono wangu. Ndakamubvunja kuti aregere, asi aazivi kuzvizwa. Perapo, pandainga ndecisunga sapato jangu, wakataka sure kwangu.”—Bethany.

Mukuvona kwako, mujaha uu wainga:

1. Acitamba nae?

2. Acimubvunjirira?

3. Acimuthyisijira pa vatano?

Mupinguro wakanaka ku mativi ese ngo wo 3.

Icinyi cinoita kuti kuthyisijira pa vatano kusiane no kubvunjirira ngo mazano kana kutamba?

Kushupha pa vatano i kuda kudakajihwa ko umwe basi. Zvinoenderera mberi pikija ari kuthyisijihwaro akabvunja mushuphi kuti andizvidi.

Kuthyisijihwa i ciro cikuru maningi. Kungatungamirira pa kujipa.