Mootutuxa Aneti aakakheliwa vacheyani ahisuwelaka echu eneereya. Owo ooloca: “Kaaheererya wiisaakiha. Kaaheererya okhuwela nyenya nwiya waakimalela. Kaamukakha, kimmana, kimuluma ni kimutiina. Mweelukuluku yeeyo kaahoona wiicela wa mwaalo okithorolaka. Ikuru soothene saakimalela.”

Waari mmukhalelo ntoko yoola, tiheeni waahaalaawe weera?

Naamwi ori oorehereya moorweela wa wiivareryela vaavaa oneecaawe ichu soonanara inanwerya okhumelela. Piipiliya oni: “Tahi yoleru awupasa onavotha mahiku othene. Tahi wi mahiku othene atxhu a miruku tanakhalano yolya, . . . orèriwa ni otakhaliwa, honamuthanla mutxhu.”—Eklesiyaste 9:11.

Amiravo akina ntoko Aneti anahipheliwa ti nakuru. Akina anahipheliwa ni musuweli aya naari mmusi. Vaavaa Nataliya aareiyeno iyaakha khumi sa oyariwa, mmiravo mmoha yoowo aari mwaacamani awe aamukhinyeererya opaka mararuwo. Nataliya ooloca: “Kaatepa wuuliheya muru ophiyerya wi nkaamulenle muchu mukina.”

Aneti nlelo onniisoona okhalano nthowa wa yeeyo emweerenle. Owo ooloca: “Kinnuupuwela yeeyo yeeren’ye nihiku nenle. Kinoona wi kaaphwanela owetha wi kiisaakihe. Kimanle ohipheliwa, kaasareya woova. Nkaawenrye weera echu ekina, nave kinuupuwela wi yookhala kaaphwanelaaka weera.”

Nataliya onniisoona tho okhalano nthowa. Owo oriye: “Nkaaphwanela wiiroromela. Asitiithi aka yaakileela wi kikhaleke ni murokora aka vaavaa nnathataahu, nyenya nkiiwelenle. Kinoona wi kaamvaha mwaacamani aka ekari ya okipahula. Yeeyo yeeren’ye yaavolowela emusi aka, nave kinoona wi kookhalano nthowa. Kinnahooxeya ni muupuwelo yoowo.”

Wakhala wi wookhalano moonelo woolikana ni wa Aneti ni wa Nataliya, wuupuwele wi muchu yoowo ohipheliwe harimuchuna. Achu akina annayeviha mwaha yoowo elocaka wi ti woophwanelela amiravo weerano yeeyo naari wi yaawo ahipheliwe yaamuchuna. Nyenya haavo onakhwela ohipheliwa. Waakhanle wi weyaano onnuukhuwa nthowa na ohipheliwa, weyaano hiwaano nthowa!

Eparipari wi ti wookhweya waalakhanya masu awi “weyaano hiwaano nthowa” nto weemererya masu yaala ti woovila. Akina annatitelela wuupuwela yeeyo yeeren’ye nave annahooxeya ni muupuwelo woonanara. Vano tiheeni onaphwanelaawe weera? Ti yaphaama oloca yawuukhula aa.

Piipiliya onnooniherya wi mmakacamiho awe, Yupu aaloca ariki: “Kinamulotxa sa winiwa waka murima.” (Yobi 10:1) Onahaala okhaviheryeya oloca seiyo inawuukhula ni okhala ootaphuwa.

Aneti ohoona wi ela ti yeeparipari. Owo oriye: “Kaaloca ni nthamwene aka, nave aakiceenyerya waaleela asitokweene mmulokoni, nave kaaheerano. Awo yaachekula ni miyaano yaakihakararya ekileelaka wi nkaano nthowa na yeeyo yeeren’ye. Chiryene nkaano nthowa mwa yeela.”

Nataliya aahaaleela asitiithi awe. Owo ooloca: “Awo yaakikhaviherya. Yaakiceenyerya oloca sa mwaha yoowo. Nave eyo yaakikhaviherya ohikhala a wuukhuwa mmurimani mwaka.”

Nataliya aaphwanya tho nikhaviheryo mu nivekelo. Owo oriye: “Oloca ni Muluku waakikhaviherya xaxaxa mweelukuluku yeeyo koonaaka wi nki kiwerye oloca ni muchu vyakala. Vaavaa kinavekelaaka, kinnaloca mootaphuwa. Eyo ennakikhaviherya okhalano murecele ni omaaleleya.”

Weyaano tho onahaala woona wi yookhalavo “elukuluku yopenusa.” (Eklesiyaste 3:3) Mukosoopeke mukhalelo anyu woomwiilini ni wa mmuupuwelo. Mwiichuuweke mwawaakhwanela. Nave opwaha soothene, mmuroromele Muluku a nihakararyo noothene, Yehova.—2 Korinto 1:3, 4.

Waari namwali, nave onnakhinyereryiwa onanariha meecelo aa, hiyaavo enahiiha okhooca moolipa ni oloca: “Nkinachunaru!” Ohoovelele okhooca woovaka omuyeleela mpwana aa. Wakhala wi oomaliha wuuryana wanyu nthowa na mwaha yoowo, enataphulela wi haarino osivela weeparipari! Weyaano onnaphwanela okhalano mulopwana oophwanelela, yoowo onacicimiha mwiili ni malakiheryo aa.

“Oxikola, amiravo yaanaphara estiyaaka ni oloca masu oohiphwanelela, elocaka wi okumi aka waahaala okhala phaama wakhala wi koopaka mararuwo ni yaawo.”—Koreta.

Onoona wi yeeyo amiravo ala yeera waari . . . 

1. Orocolo?

2. Mukhalelo wa opaceryiha ompwana?

3. Okhinyererya opaka mararuwo?

“Mu ekaaro, mmiravo mmoha aapacerya okipharela ntata alocaka ichu soohisuwanyeya. Kaamutatha kimuleela wi acharuwe okeerela. Aakiweha ntoko wi nkisuwenle echu.”—Kantise.

Onoona wi yeeyo mmiravo ola aamwerenleiye Kantise waari . . . 

1. Orocolo?

2. Mukhalelo wa opaceryiha ompwana?

3. Okhinyererya opaka mararuwo?

“Eyaakha evinre, mmiravo mmoha aanaloca wiiliwiili wi onnasiveliwa ni miyaano nave wi achuna weeca ni mi. Kaatitelela okhooca, nave ikwaha ikina aanakipharela ntata. Kaanamuleela wi acharuwe nave heemererya. Nihiku nikina vaavaa kamakaaka isapato saka, owo aarwa akiphara muyuununi.”—Petaniya.

Onuupuwela wi yeeyo mmiravo ola eereiye waari . . . 

1. Orocolo?

2. Mukhalelo wa opaceryiha ompwana?

3. Okhinyererya opaka mararuwo?

Naakhulo 3 ti noophwanelela wa makoho yaala mararu.

Ohiyana taani orivovo variyari va okhinyererya, opaceryiha ompwana ni orocolo?

Okhinyererya oneeriwa ni muchu mmoha. Nave onnatitelela naamwi yoowo onakhinyereryiwa akhoocaka.

Okhinyererya mwaha mutokweene. Onnakeriha mu ohipheliwa.