TLAJTOLTILISTLI 8
¿Tlenon noneki nikmatis itech mitschiualtiskej teuan xmoteka?
¿TLENON TIKCHIUASKIA?
Annette xokimat kenon akin okinajnauilti okitlajkal ipan tlajli niman xkimatiya tlenon panotoya. “Melak onikyejyeko niknokixtilis, kijtoua Annette. Onikyejyeko nitetsajtsilis manechpaleuikan, san ika, xoniuel. Onikmapeuj, oniktejteliksak, onikmajmaili niman onikuajuason... niman ijkuak onechtsopini ika cuchillo xok ouel itlaj onikchiuj”.
¿Tlenon tikchiuaskia tla ijkon mopan panoskia?
XMOTELTI NIMAN XTLANEMILI
Maski kuajli timotlajpiyas, ken ijkuak tikisas ika yeuajli, uelis mopan nochiuas tlen xkuajli. Biblia kijtoua ika kemantika “akin melak kuajli notlalouaj xnochipa uelij tetlanij, [...] nion akin kipiyaj tlaixmatilistli xnochipa kuajli onkisaj; pampa san kemanon niman ijkuak xtlaj nochia nochimej itlaj inpan panoua” (Eclesiastés 9:11).
Itech tlen opanok Annette, xkixmatiya akin okinajnauilti. Kemantika, ijkin uelis mitschiuilis akin mitsixmatstok noso se mochanejkauj. Noelia san 10 xiuitl kipiaya ijkuak se telpochtli akin chantiya nisiuj okinajnauilti. “Melak ninomojtiaya niman nipijpinauiya, kijtoua Noelia, ika yejon, xakaj onikijli ijkuak kemach ijkon nopan onochiuj”.
TEJUA XTIKPIYA TLAJTLAKOJLI
Annette ok notlajtlakoltia itech tlen opanok. Yejua kijtoua: “Ijkuak nikilmiki tlen opanok ipan yejon yeuajli, niknemilia ika ueliskia nikchiuaskia okse itlaj. Yemelak ika xouel itlaj onikchiuj ijkuak onechtsopini, san ika, ok niknemilia ika ueliskia okse itlaj nikchiuaskia”.
Noelia noijki notlajtlakoltia itech tlen opanok. “Xninemiskia kiyauak san noselti, kijtoua, notajuan san techkauiliayaj matitauiltikan kiyauak tla nokniuj siuatl nouan nemiya, san ika, xonikintlakamat. Kuakon, akin onechnajnauilti xouijtika okitak nexchiuilis tlen xkuajli. Nochanejkauan melak otlajyouijkej niman nikmati ika nejua nikpiya tlajtlakojli. Yejon tlen melak nechyolkokoua”.
Tla timomachilia ijkon ken Annette niman Noelia, maka xkilkaua ika ijkuak yakaj kinajnauiltiaj nochiua maski akin ijkon kichiuiliaj xkineki. Sekimej xsajnoye kinmojkatlachialtia ijkuak yakaj kinajnauiltiaj pampa kijtouaj ika akin ijkon okichiuilijkej san yejua okinotejtemouili. San ika, xakaj kinamiki ipan manochiua yejuin tlen melak xkuajli. Tla tejua yomitsnajnauiltijkej, kuajli xmatsto ika xtejua tikpiya tlajtlakojli.
Tikijtoskej yejuin xouijtika, san ika, ouijtika tikneltokas. Sekimej xkiteijliaj tlen inpan yonochiuj niman san yejuamej kixnamikisnekij itech tlen opanokej niman tlanemililtin xkuakualtin. San ika ¿akinon kipaleuiya tla xtikijtoua? ¿Tejua noso akin omitschiuili tlen xkuajli? ¿Xtiknemilia ika kuajli yeskia tla tiktejtemoua akinon mitspaleuis?
XTEIJLI TLEN OPANOK
Biblia techtomilia ika ipan yejuin tlaltikpaktli kampa melak onka miyek tlajyouilistli, se tlakatl yolmelaujki itoka Job okijto: “¡Nitlajtos itech tlen melak nechajmana!” (Job 10:1). Kanaj mitspaleuis ijkon tikchiuas ken yejua. Tla tikijlia yakaj, mitspaleuis xseli tlen opanok niman kuajli xmomachili.
Kanaj tlen tikmachilia ipan moyojlo melak yetik, noneki yakaj mamitspaleui. ¿Tleka xtitlajtoua iuan yakaj akin uelis mitspaleuis?
Annette ijkon okichiuj niman okipaleui. Yejua kijtoua: “Onitlajto iuan akin ninouika niman onechyolchikauj manikimijli omemej tokniuan akin tlayekanaj ipan tlanechikojli. Nechyolpaktia ika ijkon onikchiuj. Miyekpa nouan otlajtokej niman onechijlikej tlen niknekiya nikakis: ika nejua xnikpiaya tlajtlakojli”.
Noelia okimijli itajuan tlen opanok. “Melak onechpaleuijkej, kijtoua. Noijki, onechyolchikaujkej manitlajto itech tlen opanok, niman yejon melak onechpaleui maka sajnoye manikualani niman maninajmanto”.
Noijki melak okiyolseui ika okichiuj teoyotl. Yejua kijtoua: “Melak onechpaleui ika onikchiuili teoyotl toTajtsin, ijkuak nikmatiya ika xakaj uelis iuan nitlajtos itech yejuin. Ijkuak nikchiua teoyotl, ueli nikijlia toTajtsin nochi tlen nikmachilia niman yejon melak nechyolseuiya”.
Tejua noijki uelis tikitas ika ajsis tonajli “ijkuak pajtilos” (Eclesiastés 3:3). Melak xmotlajpiya, xmoseui ken noneki. San ika, itlaj tlen melak noneki tikchiuas: xtejtemo Jehová, toTajtsin akin techmaka yolseuilistli (2 Corintios 1:3, 4).
¿IUELIS TIKISTINEMIS IUAN YAKAJ?
Tla tisiuatl niman akin iuan tikistinemi mitschiualtia xchiua itlaj tlen xkuajli, xmelaujkanankili: “¡Maka ijkon xchiua!” noso “¡Xkimejkuani momauan!”. Xkijli, niman maka mamitsmojti tla mitskauas. Tla mitskaua, kijtosneki ika xmitstlajsojtlaya. Tejua noneki tikpiyas yakaj akin mamitstlakaita niman makitlakaita tlen tejua tikneltoka.
¿KICHIUALTISNEKIJ TEUAN MANOTEKA?
“Ijkuak nikpiaya 13 noso 14 xiuitl, akin inuan ninomachtiaya, nokuitlapan nechtilaniliayaj nobrasier niman nechijliayaj tlen tsokuiltik, kijtouayaj: ‘Tikitas kenon melak tikuelitas ijkuak nouan timotekas’” (Coretta).
¿Tikijtoskia ika yejuin telpokamej san...
-
... kikamanaluijtoyaj?
-
... kijlitoyaj ika kuelitaj?
-
... kichiualtijtoyaj inuan manoteka?
“Ijkuak niaya ipan autobús se telpochtli opeuj nechijlia tlen xkuajli niman opeuj nechkijkitskia. Onikmatetlatsini niman onikijli manejkuajni. Onechitak ken tla yonikpolo notlamachilis” (Candice).
¿Tikijtoskia ika yejuin telpochtli san...
-
... kikamanaluijtoya?
-
... kijlitoya ika kuelita?
-
... kichiualtijtoya iuan manoteka?
“Se telpochtli nochi xiuitl nechijlitoya ika nechuelita niman ika kinekiya nouan kistinemis. Nejua nochipa nikijliaya ika xnikneki. Kemantika, kikitskiaya noma. Nejua nikijliaya ika maka ijkon makichiua, san ika, yejua xkikajkauaya. Se tonajli, ijkuak nikinsalojtoya nozapatos, onechtsintetlatsini” (Bethany).
¿Tikijtoskia ika yejuin telpochtli san...
-
... kikamanaluijtoya?
-
... kijlitoya ika kuelita?
-
... kichiualtijtoya iuan manoteka?
Itech yeyi tlajtoltilistin kuajli tla otiktlapejpeni tlen ika 3.
Mitschiualtiskej teuan xmoteka, ¿san noijki ken mitsijliskej mitsuelitaj noso mitskamanaluiskej?
Mitschiualtiskej teuan xmoteka, kichiua ika se maka kuajli manomachili. Yejuin xnoteltia maski akin kichiualtiaj yokiteijli maka sa makipajsolokan.
Yejuin melak ueyi tlauejli pampa uelis se kinajnauiltiskej.
^ párr. 4 Maski tlen nikan noijtoua melak kinpaleuiya ichpokamej, noijki kinpaleuiya telpokamej.
