Annette niʼjįʼ ahoʼdiyoolghango índa, haalá hóótʼįįd jiniizı̨́ı̨́ʼ. Ńtʼééʼ ájíní: “Tsʼídá tʼáá awołí bee áshtʼı̨́įgo bił ahishgą́. Chʼééh dishwosh ndi, shiinééʼ ádin. Náhonishtał, náhonishtsʼin dóó nahjįʼ anáháshghą́ą́h, áádóó náníghaz. Ńtʼééʼ béésh léiʼ shaa eelgeedgo tʼáá ákǫ́ǫ́ naaʼíítłizh.”

Ni ákótʼéego nił hooʼaʼgoshąʼ, haa díínííł?

Tłʼéeʼgo yínááłgóó ádaa áhólyą́ą ndi, doo yáʼáshǫ́ǫ́góó ániʼdidoolníiłgo átʼé. Diyin Bizaad ání: “Dahayóii anaaʼgi łahda tʼáá bikʼeh hodidleeh”, índa “diné daʼiichįįhii łahda doo bichʼodahaʼníígóó yiiłtsą́, áko tʼáá ałtso bá bikʼíhwiilzhíísh áádóó bá ashja daʼaleʼ.”—Ecclesiastes 9:11.

Łaʼ ániid nidaakaígíí éí Annette nahalingo, doo yéédahósinígíí léiʼ hoł nidaazdéél. Łaʼ éí tʼáá bééhojísinígíí, hakʼéí da ákóhodoolíiłgo átʼé. Natalie éí índa 10 honááhaigo ashkii hwíighahgóó bighan léiʼ ákótʼéego hoł ninídéél. Áko kózhdíiniid: “Yéigo nísésdzííd dóó baa yániizı̨́ı̨́ʼ, biniinaa doo tʼáá ákǫ́ǫ́ baa hooshneʼ da.”

Annette ábiʼdilyaaígíí łahda tʼahdii yee ákʼíhátʼáah łeh. Áko ájíní: “tłʼéeʼgo éí áhóótʼįįd yę́ę baa nitsínáánískees łeh. Tsʼídá yéigo áshtʼı̨́įgo bił ahodeeshgą́ą́ł ńtʼééʼ náánísdzin łeh. Ákondi béésh shaa eelgeed bikéédóó nísésdzíidgo tʼóó shił áhásdįįd. Tʼáadoo óoshneʼí da ndi, tʼahdii baa shíniʼ.”

Natalie ałdóʼ áhóótʼįįdígíí tʼahdii yee akʼíhátʼááh. Áko ájíní: “doo ndi ákózhdoonííł da nisingo baʼiisíliʼ. Shimá dóó shizhéʼé éí díí yee nihá hoołʼaʼ, tłʼóoʼdi naohnéego éí tʼáá ánóhłahgo tʼéiyá doo. Ákondi, tʼáá shí doo bikʼeh hóółʼįįd da. Áko díí ashkii atíshijiilaaígíí, tʼáá shí doo áháshchįįhgóó biniinaa ákódzaa nisin. Éí áhóótʼįįdígíí éí shighan hazʼą́ągi yéigo yihodiiłtʼiʼ, éí tʼáá shí áshtʼı̨́įgo biniinaa nisin. Éí tʼáá áłahjįʼ baa shíniʼ.”

Annette dóó Natalie átʼéiigi, ni daatsʼí ałdóʼ ákótʼéego nitsíníkees. Ákótʼé ládą́ą́ʼ díí béénílniih doo, tʼáá háiida ákóbiʼdilyaaígíí éí doo yee lą́ asłííʼgóó biniinaa da. Diné łaʼ kódaaníi łeh. Éí ashiiké tʼáá ákódaatʼı̨́, doodaiiʼ tʼáá hó ádajitʼínígíí biniinaa ákódabiʼdilneʼ. Tʼáá háiida rape ábidiʼdoolníłígíí éí doo bee hazʼą́ą da. Ákondi díí doo tsʼíí átʼéii ániʼdilyaago éí doo ni íinízinígíí biniinaa da, ákó ni éí doo bee nikʼíhadootʼah da!

Áko “ni éí doo bee nikʼíhadootʼah da” haʼnínígíí jidoodląąłgi ayóó nanitłʼa. Łaʼ ákódabiʼdilyaaígíí éí tʼóó yił ádaatʼé, biniinaa ayóó yikʼee tidaʼhoonííh. Áko díí tʼóó bił ánítʼéego, háísh éí tʼóó bá nanilʼin? Éí biniinaa hazhóʼó baa hodíílnih.

Diyin Bizaad aaníigo hastiin Job tʼáá íiyisí tiʼhojooníihgo kódiiniid ní: Tiʼhooshnííhdę́ę́ʼ “hahideesdzih.” (Job 10:1) Ni ałdóʼ tʼáá ákótʼéego ádíínííł. Łaʼ nikʼis baʼíínílnínígíí, éí áhóótʼįįdígíí bił hodíílnih áko tʼóó bił ánítʼéhígíí niiʼdę́ę́ʼ hááhodiyooldoh.

Annette éí tʼáá aaníí ákótʼéé lágo bił bééhoozįįd. Áko ájíní: “Shikʼis łaʼ tʼáá íiyisí bił ahééh honisin léiʼ bee bił hooshneʼ. Ńtʼééʼ bee shił hwíínílneʼígíí éí hastóí oodlání yá naazíinii bee bił hodíílnih shidííniid. Éí tʼáá ákónéehee lá. Naakidi bił yah ánáásdzáago ádashiłní, díí áhóótʼįįdígíí tʼáadoo bee ákʼíhátʼáhé. Éí doo ni íínítʼįįd da.”

Natalie éí bimá dóó bizhéʼé áhóótʼįįdígíí ałdóʼ yee yił hólneʼ. Ńtʼééʼ kóshidííniid: “Díí áhóótʼįįdígíí ałtso bee nihił hólneʼ, ákósdzaago éí yéigo shíká eelwod. Tʼáá áłah shikééʼ jizínígíí binahjįʼ doo tʼóó yínííł nishłı̨́į da. Áádóó sháháchʼįʼ yę́ę ałdóʼ biiʼ hááyá.”

Natalie ałdóʼ sodizin yee haʼólní. “God bichʼįʼ yáshtiʼgo éí shika análwoʼ. Éí háiida bee bichʼįʼ hadeesdzihgi doo bíighahgóogo éí sodizinígíí ayóó baa ahééh nisin” ní. “Jó, éí binahjįʼ shiʼdiiłʼáhígíí baa hidishʼaahgo binahjįʼ shiiʼ hááhwiildóóh.”

Ákóhóótʼįįd ndi, tʼahádóó haʼólní bee náánáádáał doogo átʼé. (Ecclesiastes 3:3). Nitsʼíís dóó níniʼ baa áhályą́. Hazhóʼó náʼinilwosh. Jiihóvah éí aláahdi baʼíínílı̨́. Éí níká análwoʼgo binahjįʼ niiʼdę́ę́ʼ hááhwiildóoh doo.—2 Corinthians 1:3, 4.

Atʼééd nilı̨́į ládą́ą́ʼ, bił ahééhonílzįįhígíí bił bąąhígi ádíínííł nóʼnínígíí, kóbididíiniiłgo átʼé: “Tʼáádoo ánítʼíní!” doodaiiʼ, “Tʼáadoo shídílchihí!” Áko éí biniinaa neʼashkii doo niniizı̨́įʼgoshąʼ éí tʼáadoo baah dah sínítíní. Kojígo baa nitsíníkees, diné łaʼ diyin kʼehgo oodááł yaa ahééh nízinígíí éí tʼáá ákónéehee doo.

“Jr. highgi ííníshtaʼgo, łaʼ ashiiké shineʼdę́ę́ʼ shibra nídeediłtsʼǫʼgo saad nichxǫ́ʼígíí shídeeʼááh. Áko łaʼ ádashiłní: “Shił nínítʼéezhgo éí ayóó nił hózhǫ́ǫ doo.”—Coretta.

Éí ashiikéésh kódaatʼį

1. Tʼóósh hoł naané?

2. Hoł flirt átʼı̨́?

3. Sexually harass áháłʼı̨́?

“Bus biiʼ ashkii léiʼ saad nichxǫ́ʼígíí shííʼáahgo shiiłtsood. Bílaʼ nídííłtsʼingo háadi da dah nídaah bidííniid. Ńtʼééʼ haalá jiidzaaígi átʼéego shinééłʼı̨́ı̨́ʼ.”—Candice.

Díí ashkii éí Candice haa yiyiilaa nínízin?

1. Tʼóósh hoł naané?

2. Hoł flirt átʼı̨́?

3. Sexually harass áháłʼı̨́?

“Nááhai yę́ędą́ą́ʼ, ashkii léiʼ ahił neitʼaash doo shił níigo yaa nídiidzá. Azhą́ shı̨́ı̨́ dooda yeeʼ chʼééh bidishníi ndi, doo shikʼidigháah da. Łahda shigaan yídílchidgo yaa nínádiidááh. Tʼáadoo ánítʼíní bidishníi ndi, doo shidiitsʼaʼ da. Łahda shikeeʼ beʼdeeshtłʼóół biniyé, yaa kósdzaa ńtʼéé shitłʼaaʼ néiidííkaad.”—Bethany.

Baa nitsíníkeesgo, díí ashkiísh:

1. Tʼóósh hoł naané?

2. Hoł flirt átʼı̨́?

3. Sexually harass áháłʼı̨́?

Díí táaʼgo bíndaʼídéékidígíí éí tʼáá átʼéii ńtʼééʼ C.

Sexual harassment éí haitʼéego flirting dóó tʼóó naʼaʼné bił ałʼąą átʼé?

Sexual harassment éí azhą́ shı̨́ı̨́ dooda, chʼééh bidiʼníigo doo akʼidighááhgóó óolyé.

Harassment éí yéigo baa hastiʼ. Biniinaa da, bee atíjiʼdoolíiłgo átʼé.