Omushaija owaahambire Annette akamukwata yaamutuura ahansi atakamanyire ekyabaire nikiza kubaho. Naagira ati: “Nkakora kyona ekirikubaasika kumurwanisa ngu andugyeho. Nkateeraho kuteera enduuru, kwonka okaba nooshusha oti tinyine mwoya gurikumara. Nkamutsindika, naamushamba, naamuteera entomi, kandi naamuhara. Bwanyima naahurira yaancumita n’omusyo. Amaani goona gakampwamu.”

Waaba ori omu mbeera nk’egyo, noobaasa kutwaza ota?

N’obu orikubaasa kuba oyeteekateekire nka waaba noogyenda nyekiro aheeru, ebintu bibi nibibaasa kubaho. Baibuli neegira ngu “abairuki rugambwa tibo basinga omu mpaka z’okwiruka.” Kandi neegaruka egira eti: “N’abahangu tibo bashongoka; kureka boona bahikwaho obunaku n’ebihikiirizi.”—Omubuurizi 9:11.

Eminyeeto abamwe nka Annette, nibahambwa abu batarikumanya. Abamwe nibahambwa abu barikumanya, nangwa n’ab’omu maka gaabo. Natalie owaabaire aine emyaka ikumi, akahambwa omwojo omushogoyo owaabaire naatuura haihi n’owaabo. Natalie naagira ati: “Nkatiina kandi naagira n’enshoni naabanza kutagira ou naagambira.”

Annette na hati naakyeshiinja ahabw’ekyabaireho. Naagira ati: “Ninguma ninyijuka omu mutwe gwangye ekyabaireho ekiro ekyo. Ninteekateeka ngu shana nkaba nyine kumurwanisa nkamuremesa. Amazima gari ngu ku yaaherize kuncumita ekisyo, nkagira obwoba. Nkaba ntakiine kindi ky’okukora, kwonka nooshusha oti nkaba nshemereire kugira eki naakora.”

Natalie nawe naarwana n’okweshiinja. Naagira ati: “Tinkaabaire ninteganisibwa okweshiinja. Abazaire bangye bakaba bataireho ekiragiro ngu nyowe na barumuna bangye twine kuguma hamwe twaba nituzaana turi aheeru, kwonka nkanga kuhurikiza. N’ahabw’ekyo ninteekateeka ngu nkaha omutaahi omugisha gw’okunkora kubi. Ekyabaireho kikakwata aha ka yangye, kandi nindeeba ngu niinye naabareeteire obusaasi bwingi. Ekyo nikyo kirikukira kunteganisa.”

Ku oraabe nooyehurira nka Annette nari Natalie, guma noijuka ngu omuntu ohambirwe naaba atekundiire. Abamwe nibatwara enshonga egyo nk’etari y’amaani, barikwekwatsa ngu n’ekya butoosha aboojo kutwaza batyo nari ngu abarikuhambwa nibaba nibakyenda. Kwona tihaine ohikire kuhambwa. Ku oraabe waahikirweho ekintu ekyo ekirikutiinisa, tiiwe oine kuteebwaho orubanja!

Amazima gari ngu, kyorobi kushoma ebigambo “tiiwe oine kuteebwaho orubanja,” kwonka okubiikiriza nikibaasa kuguma munonga. Abamwe nibaguma nibateekateeka munonga aha kyabaireho, reero kibareetera kweshiinja n’okugira enyehurira ezindi mbi. Kwonka shi waahunama nikihwera oha? Iwe nari owaakuhambire? Oshemereire kugira ekindi eki waakora.

Baibuli neetugira ngu obu Yobu yaabaire ari omu busaasi bw’amaani akagira ati: “Ninyija kugamba ahabw’obusaasi bw’omu mutima gwangye!” (Yobu 10:1) Naiwe noobaasa kugasirwa waaba nikyo waakora. Okugambira omuntu ou orikwesiga nikibaasa kukuhwera kwebwa ekyabaireho n’okutaguma oine enyehurira mbi.

Annette akashanga ekyo kihikire. Naagira ati: “Nkagamba na munywani wangye, kandi akampiga kugambaho n’abareeberezi omu kibiina kyangye. Nyine okushemererwa ahabw’okugira ngu nkakikora. Bakashutama naanye emirundi mingi, kandi baangambira ebi naabaire niinyenda kuhurira, ngu ekyabaireho rukaba rutari rubanja rwangye. Tihaine na kimwe ekyabaire kiri enshobe yangye.”

Natalie akagambira abazaire be ngu akahambwa. Naagira ati: “Bakanshagika. Bakampiga kutatiina kukigambaho, kandi ekyo kikampwera kutaguma nyine enaku.”

Kandi okushaba kukahwera Natalie. Naagira ati: “Okugamba na Ruhanga kikampwera na munonga omu bwire obwo obu naabaire nimpurira ngu tindikubaasa kugambira omuntu weena. Ku naabaire nshaba, mbaasa kugamba ntarikutiina. Kikaambaasisa kugira obusingye n’obuteeka.”

Naiwe noobaasa kushanga ngu hariho ‘obunaku bw’okukiza.’ (Omubuurizi 3:3) Yefeho omu by’omubiri n’enyehurira. Huumura ekirikumara. Kandi ekikuru munonga, yesigye Ruhanga ow’okuhuumuriza kwona Yehova.—2 Abakorinso 1:3, 4.

Ku oraabe ori omwishiki kandi orikugyemeserezibwa kwejumba omu bikorwa bibi, tikigwire kugamba butunu oti: “Ekyo otakikora!” nari, “Otagaruka kunkwataho!” Otakaatiina kugamba ahabw’okugira ngu noija kufeerwa munywani waawe omwojo. Yaakurugaho ahabw’okugira ngu waayanga, ogwo naaba atakushemereire! Oshemereire kutunga omushaija ohikire, orikuha omubiri gwawe ekitiinisa n’emisingye ei orikukuratira.

“Aha ishomero, aboojo bakaba bakwata aha kareega kangye reero bagamba ebigambo birikuhemurana ngu noija kuhurira gye waateerana naitwe.”—Coretta.

Nooteekateeka ngu aboojo abo bakaba

1. Nibamurahura?

2. Nibamuzaanazaaniraho?

3. Nibamugyemesereza kuteerana nawe?

“Omu baasi, omwojo akatandika kugamba ebigambo bijunzire arikunkwataho. Nkateera omukono gwe reero naamugambira kundugaho. Akandeeba yaabura nkummarayo.”—Candice.

Nooteekateeka ngu omwojo ogwo akaba ariyo naakora ki Candice?

1. Naamurahura?

2. Naamuzaanazaaniraho?

3. Naamugyemesereza kuteerana nawe?

“Omwaka oguhweire, omwojo akaguma naangambira ngu naankunda kandi ngu naayenda kugyenda naanye kweshemeza, n’obu ndaabe naabaire nyanga. Obumwe, akaba antsiitsiitira omukono. Nkamugira ngu andugyeho, kwonka akanga. Reero ku naabaire ninkoma enkaito zangye, yaanteera aha kibunu.”—Bethany.

Omu miteekateekyere yaawe, omwojo ogu akaba:

1. Naamurahura?

2. Naamuzaanazaanisa?

3. Naamugyemesereza kuteerana nawe?

Omu by’okureeberaho ebi byona bishatu eky’okugarukamu ekihikire ni C.

Ahabw’enki okugyemesereza nikutaana n’okurahura nari okuzaanazaanisa?

Okugyemesereza kuteerana kwine orubaju rumwe. Nikugumizamu n’obu ou barikugyemesereza yaakubagambira ngu bamurugyeho.

Okugyemeserezibwa ti nshonga y’okuzaanisa. Nikubaasa kurugamu okuhambwa.