Damudiri, Annette nọ mẹrẹn omayen uvuẹn otọre, ọrhọ ta: ‘Mi damu omẹgbanhon mẹ ephian mi na wọrọn,’ ‘mi damoma mi ne bunu, ọrẹn mia sabu bunu-u. Mi mware, bọmọchẹn jeghwai tinfabọ. Ọke ọrana nọ yẹ a ha aphia dumu mẹ, mia rha sabu ru emru owuorowu-u.’

Wu rha mẹrẹn oma uvuẹn erhirhiẹ ọrana, me ọyẹ wu ne ru?

Dedevwo wu rhe mwuegbe—nyoma wa rha dabu notọre sua ọke rẹ we rhe nẹ oghwa ason—ekwakwa ibiobiomu ena je sabu phia. Baibol na ọrhọ ta: ‘orhiẹ ọrẹ ọ mai zorhẹ yo fiẹkparobọ-ọ,’ yanghene eri vwo irherhe ye rhiẹ ọke ephian fiẹkparobọ-ọ, nime ọke ọrhẹ oborẹ e vwe roro rhọ o te aye ephian oma.’—Ecclesiastes 9:11.

Iphuphẹn jerẹ Annette, ihworho rẹ aye i vwe rhe ye sehiẹn aye. Awọrọ, ihworho rẹ aye i rheri yanghene owuọwan uvuẹn ekrun aye yo sehiẹn aye. Oke Natalie ọ ha ẹgbukpe ikpe yẹ ọmọhworhare ro rhirhiẹ kẹrẹ aye ọ gba ye gbọfanrhiẹn. ‘Ofẹn omwurun mẹ, ofa ọ je ro mẹ, ọrhọ lẹrhe mẹ ta rẹn ohworho owuorowu-u,’ omaran Natalie ọ tare.

Ẹhẹn i Annette o ji kpokpie fọkiẹ oborẹ ọphiare. Nọ tare: ‘Mie roro kpahen oborẹ ọphiare ason ẹdẹ ọrana ọgbọ buebun, ni mie roro taghene manẹ mia damoma ghwomaran. Itiọrurhomẹmro, ọke e dumu mẹ hin, ofẹn no mwuru mẹ omamọ. Mia sabu ru emru owuorowu-u, ọrẹn mie roro taghene manẹ mia damoma ghwomaran.’

Ẹhẹn i Natalie o ji kpokpie fọkiẹ oborẹ ọphiare. Nọ tare: ‘Manẹ me vwa hẹrosuiẹ-ẹ, eri vwiẹre mẹ i ta mẹ taghene mẹmẹ rhẹ omizu mẹ ọgbọtọ i daji ekete owu ọke ame erhe ruiruẹn otafe, ọrẹn mia kerhọ-ọ. Omarana ni mi ha uphẹn rẹn ohworho ro rhirhiẹ kẹrẹ ame nọ gba mẹ gbọfanrhiẹn. Oborẹ ọphiare na o djobọte ekrun mẹ, ẹhẹn mẹ no kpokpi mẹ nime mi ha omiamiamo rẹn aye. Ọrana yọ mai kpokpi mẹ ẹhẹn omamọ.’

Orhianẹ wu ha uvuẹn erhirhiẹ Annette yanghene Natalie, fie rhẹ ẹhẹn taghene ohworho ra gba gbọfanrhiẹn na orhiẹ oborẹ ọ guọlọre-e. Ihworho ezẹko a ha ikẹro ọlolọhọ e ni erhirhiẹ na, rẹ aye a ta taghene idama i vwo uruemru ọrana yanghene ihworho ra gba gbọfanrhiẹn na ọrana oborẹ aye i guọlọre. Ọrẹn o vwo ohworho rẹ oma ọmerhan na gba ye gbọfanrhiẹ-ẹn. Orhianẹ a gbaruọ gbọfanrhiẹn, orhiẹ owẹwẹ ye ne kperi-i!

Itiọrurhomẹmro, re se ẹmro ọnana ‘orhiẹ owẹwẹ ye ne kperi-i’ ọ phẹrẹ; ne vwo imwẹro kpahiẹn ọbẹn omamọ. Ihworho ezẹko i vwa ta oborẹ ọ phiare-e, nẹ aye a rioja iroro ọsọsọ, ẹhẹn no ji kpokpo aye. Ọrẹn, wu rha fọ, ọrọmo yẹ ọnọ mẹrẹn userhumu—wẹwẹ yanghene ọrẹ o ru uruemru na? Ono rhomu wu rha djẹ odjẹ ọrọrọ.

Baibol na ọ ta rẹn ọwan taghene ọke ebẹnbẹn enẹyen e bun omamọ, Job ro rhiẹ ọvwata nọ tare: ‘Mi na ta ebẹnbẹn mẹ phia!’ (Job 10:1) Wu na ji sabu mẹrẹn erere wu rhe ru omaran. Wa rha tẹmro rẹn ohworho wu hẹroso, ọnọ sa erhumu kpare iroro vrẹn oborẹ ọphiare, jeghwai sa erhumu dobọ iroro rọ nọ lẹrhẹ ẹhẹn ọnọ seriotọre ji.

Annette o se ẹmro ọrana gburhomẹmro. Nọ tare: ‘Mi ta rẹn ugbehian rọ kẹre mẹ oma, nọ ta mẹ ni mi ta rẹn ekpako ezẹko uvuẹn ukoko mi havwọ. Oma ọmerhenren mẹ mie ru tomaran. Aye i leliri mẹ siyẹ ọgbọ buebun, jeghwai ta mẹ taghene orhiẹ omẹmẹ yi suẹ oborẹ ọphiare na-a—ọnana oborẹ mi ghini guọlọ rhon. Mia suẹ emru owuorowu-u.’

Natalie nọ ta rẹn eri vwiẹ riẹ kpahen oborẹ ọphiare na. Nọ tare: ‘Aye i ha userhumu mẹ, aye i ha udu rhọ mẹ aghwẹ ne mi ta ye phia, ọrana nọ yọ sa re mẹ erhumu dobọ ekwẹre ọrhẹ omemwurhọ ji.’

Natalie ọ je mẹrẹn userhumu nẹ ẹrhomo ẹnẹ rhe. Nọ tare: ‘Ẹmro ẹta rẹn Osolobrugwẹ yọ sa re mẹ erhumu, maido ọke mie roro taghene mi sabu ta rẹn ohworho owuorowu-u. Ọke mia nẹrhomo, ni mia sabu ta ye nẹ ẹhẹn sa. Nọ yẹre mẹ ufuoma ọrhẹ ẹhẹn ro totọre.’

Wu na sabu mẹrẹnvwrurhe taghene ovwo ‘ọke usimi.’ (Ecclesiastes 3:3) Hẹrote ugboma ọnọ ọrhẹ oborẹ we roro. Romoma. Maido, hẹroso Osolobrugwẹ urhebro ephian, Jehova.—2 Corinthians 1:3, 4.

Orhianẹ ohworho ọ guọlọre ne wu fioma rhẹ irueru ro vwo fo, ta rẹn ọravwọ, ‘Dobọji!’ yanghene ‘Tiobọnu mẹ!’ We je ofẹn ọrẹ ọ kọn rhọ na ọnọ vabọ mwuo-o. Ọrhọ nya jo vwo fọkiẹ ọnana, o fo ohworho wẹwẹ rhẹ ọye ina gba kọ-ọn! Ọhworhare ro mwuọghọ rẹn ugboma ọnọ ọrhẹ iruemru-urhi ọnọ, yo fo ha wẹn.

“Uvuẹn isukuru, idama na lọrọ ọkparinye mẹ oberhumu, aye vwa ta erharhere ẹmro—jerẹ, oborẹ ono rhomu te mi rhe lele aye bru ehware.”—Coretta.

Me wu rorori taghene idama erana e ruẹ

1. A ha ye djechẹ?

2. Irueru obẹlẹme?

3. E kpokpie fọkiẹ ehware?

“Uvuẹn ibọsu, idama owu nọ ta erharhere ẹmro mẹ, nọ jeghwai mọren mẹ. Ni mi fan ọbo ye nẹ omamẹ, jeghwai ta riẹn nọ nyaji mẹ vwo. No ni mẹ kamẹriẹn mie rhe oborẹ mia ta-a.”—Candice.

Me wu rorori taghene idama ọnana o ruẹ i Candice?

1. Ọ ha ye djechẹ?

2. Irueru obẹlẹme?

3. O kpokpie fọkiẹ ehware?

“Ẹgbukpe rọ vrẹnre na, idama owu ọ ta mẹ ọke ephian taghene mie je yi, ọ jeghwai guọlọ taghene mẹmẹ rhẹ ọye i kọn, ọrẹn ọke ephian yẹ mia ta riẹn taghene mie kwe-e. Ọkezẹko ọ ha obọ vwravwre mẹ. Mi ta riẹn taghene ọ dobọji, ọrẹn o vwo kwe-e. Ọke mie kwu isabatu mẹ rhọ, nọ ha obọ fa mẹ ikebe.”—Bethany.

Me wu rorori taghene idama ọnana o ruẹ:

1. Ọ ha ye djechẹ?

2. Irueru obẹlẹme?

3. O kpokpie fọkiẹ ehware?

Ẹkpahenrhọ rọ gbare harẹn enọ esa enana yẹ C.

Marhẹ e kpokpo fọkiẹ ehware o ru vẹnẹ irueru obẹlẹme yanghene ẹ ha djechẹ?

E kpokpo fọkiẹ ehware ọ havwọ san, fọkime ọke ra ta rẹn ohworho na nọ dobọji, o vwo kwe-e.

E kpokpo fọkiẹ ehware, emru ọgbogbanhon. Ọ sabu suẹn riẹ irueru ra gba ohworho bru ehware.