Annette wort von eenen Framden no de Ieed jeschmäten. Daut jinkj sea haustich. See sajcht: “Ekj proowd dän auftowäaren, soo aus et jinkj. Ekj wull brellen, oba kunn nich. Ekj schupst dän, ekj stankad un kjield un kleiwd dän. Met eemol späad ekj, daut een Massa mie spekjt. Un dan kunn ekj nich wieda.”

Waut wurscht du doonen, wan die daut soo jinkj?

Wan eena uk aul oppaust, wan eena zeowes veleicht rutjeit, kaun eenem doawäajen waut schlajchtet passieren. De Schreft sajcht, daut de Bosichste nich emma dän Rees jewennen un daut et bie dee, waut väl weeten, nich emma goot utkjemt, wiels “Tiet un Jlekj spälen emma eene Roll” (Liera 9:11).

Eenjemol sent daut Framde, waut de junge Menschen mesbrucken, soo aus bie Annette. Bie aundre deit daut veleicht een Bekaunda, wäa von de Famielje ooda Frintschoft. Natalie wia noch mol tieen Joa, aus een Jugentlicha von äare Omjäajent ar mesbrukt. See sajcht: “Ekj haud soo Angst un mie schämd sikj daut soo sea, daut ekj doa to kjeenem von räd.”

Annette feelt sikj noch emma schuldich, waut met ar wort. See sajcht: “Waut dän Zeowes wort, dreit emma wada en mienen Kopp väa. Ekj feel mie soo, ekj haud mie bloos sult noch dolla wäaren. De Trubbel wia: Aus daut Massa mie spekjt, wort ekj gaunz jerettelt un ekj kunn nich mea. Oba mie es eegol soo, ekj haud mie sult dolla wäaren.”

Natalie mott uk doarunja lieden, daut see sikj schuldich feelt. “Ekj haud nich sult soo driest sennen,” sajcht see. “Miene Elren hauden daut met mie un miene Sesta berät, daut wie emma toop sullen buten spälen, oba ekj horcht nich. Mie feelt sikj soo, ekj jeef onsen Noba de Jeläajenheit, mie waut auntodoonen. Miene Famielje haft daut väl toojesat. Daut jeit mie daut schlajchste un ekj feel mie schuldich.”

Wan die daut soo jeit aus Annette ooda Natalie, dan hool daut kloa em Denkj, daut dee, waut doa mesbrukt wort, daut selfst nich wull. Eenje sajen veleicht, daut es goanich soo oajch un daut de Junges daut bloos soo haben, un daut dee, waut doa mesbrukt wort, doano socht. Oba soont sull kjeenem passieren. Du hast nich de Schult, wan die soo waut schlemmet passieet es!

Oba to sajen: “Du best nich schuldich” es leichta, aus daut auntonämen. Eenje hoolen daut bloos stell, waut doa aunjegonen es, un schmieten sikj daut emma wada väa un kjwälen sikj met äare schwoare Jedanken. Wäm läfst du toom Jefaulen, wan du daut bloos stellhelst: die ooda dän, waut daut jedonen haft? Wurscht du nich leewa sellen no Help sieekjen?

De Schreft sajcht, waut de gooda Maun Hiob säd, aus hee sea schwoaret derchmuak: “Ekj woa frie doavon räden, woo schwoa daut es” (Hiob 10:1). Daut kaun die uk halpen. Vetal met eenen Frint, waut du vetrust, un schedd die to dän ut. Daut woat die halpen, daut die daut leichta es, waut die soo bedrekjt.

Annette wort en, daut et werkjlich halpt. See sajcht: “Ekj vetald met eenen gooden Frint, un dee rod mie too, met een poa Eltestasch von de Vesaumlunk to räden. Mie freid daut, daut ekj deed. Dee haben sikj ieremol Tiet jenomen fa mie, un dee säden mie krakjt daut, waut mie fäld to hieren: daut et nich miene Schult wia. Nich een beskje wia miene Schult.”

Natalie räd met äare Elren äwa daut, waut doa passieet wia. See sajcht: “Dee stunden mie fuaz bie. Dee rooden mie too, daut ekj doaräwa räden sull, un daut holp mie, nich soo truarich un doll to sennen.”

Natalie kjrieech uk Troost derch daut Jebäd. See sajcht: “To Gott räden halpt mie. Un besonda dan, wan sikj mie daut soo späat, daut ekj to aundre doa nich von räden kaun. Wan ekj bäd, dan kaun ekj Gott aules sajen, un daut beruicht mie un jeft mie ennaliche Fräd.”

Du woascht enwoaren, daut et soo es, aus Liera 3:3 sajcht: “Veheelen haft siene Tiet”. Pauss opp, woo die daut kjarpalich uk ennalich jeit. Vereiw die jenuach un vejät kjeenmol von dit: Vetru opp Jehova Gott, dee onen Enj treesten deit (2. Korinta 1:3-4).

Wan dien Jung die bemotten well, waut schlajchtet to doonen, dan kaust du gaunz driest sajen: “Doo soont nich!” ooda “Hool diene Haunt tus!” Lot die nich aules jefaulen, bloos daut dien Jung die nich velat. Wan dee die wäajen dit aufsajcht, dan es dee daut aulmols nich wieet, dien Frint to sennen! Du hast die waut bätret vedeent aus aul daut: eenen Jung, waut dienen Kjarpa un diene Meenunk achten deit.

“Aus ekj soo bie 13 ooda 14 Joa wia, kjeemen de Schooljunges hinja mie un reeten mie aune Weestbenja un hauden schlajchte Räd, soo aus: ‘Die wudd daut väl bäta gonen, wan du met mie Sex hautst’” (Coretta).

Waut jleefst du, wullen dise Junges . . .

1. met ar sposen?

2. no ar schmeichlen?

3. ar doamet baudren, Sex to haben?

“Aus ekj enne Boss wia, funk een Jung met dwautsche Räd aun un bekleiwd mie. Ekj däwad dän siene Haunt fuat un säd, hee sull wiedagonen. Hee kjikjt mie aun, aus wan ekj nich kluak wia” (Candice).

Waut jleefst du, waut deed dis Jung hia?

1. met ar sposen?

2. no ar schmeichlen?

3. ar doamet baudren, Sex to haben?

“Tojoa säd een Jung emma wada, daut hee mie jleicht un met mie wull, wan ekj uk aul eegol säd Nä. Noch mol foot dee mie uk aum Oarm. Ekj säd, dee sull opphieren, oba dee deed nich. Eemol, aus ekj miene Schoo toobunk, klautscht dee mien eent von hinjen” (Bethany).

Waut wurscht du sajen, deed de Jung . . .

1. met ar sposen?

2. no ar schmeichlen?

3. ar doamet baudren, Sex to haben?

De rajchte Auntwuat es emma de C.

Sposen ooda schmeichlen es eene Sach. Waut es aundasch, wan se eenem doamet baudren, Sex to haben?

Wan die wäa doamet baudat, Sex to haben, dan hieet sikj daut nich opp, wan du uk aul sajchst, dee saul opphieren.

Daut es nich Spos, oba waut iernstet. Deejanja kunn mau rajcht met Jewault doaropp schaufen, Sex to haben.