PAHQANIK 8
¿Chajarik koruman chi ne inwehtʼaliij chi riij mi inkaaj kinkichopom reh chi ne nujotʼ i nukʼachariik?
¿CHAJARIK NAQ NE NABʼAN I HAT?
Chi maʼ rehtʼal i Annette xkutarik wach akʼal ruum jenaj winaq. Reʼ Annette iruqʼor: «Xnubʼan chuʼnchel i wilik naq pan nuqʼabʼ. Xnukʼer nuchiiʼ, xa reʼ laʼ maʼ nelik ta naq chik i nuqʼorbʼal. Xnumihnaaj, xnuyeqʼ, xnuqʼoj eh xwechʼej korehtaal xiruyokʼ ruukʼ jenaj cuchillo. Maʼxta chik xnubʼan, maʼ xnukoʼleej ta chik wiibʼ».
¿Chajarik naq ne nabʼan chuwach i kʼaxkilaal wilih?
CHAKAPAAJ I WILIH
Atoobʼ ta inachaʼjeej awiibʼ, xa ne woʼ inakʼul i tiʼ kʼaxik, jeʼ rukabʼ noq tiʼelik chaqʼabʼ. Reʼ Santo Laj Huuj iruqʼor chi maʼ reʼ taj i kow kiʼajiminik eh wilik kinaʼojbʼal kiʼelik korik, maj «maʼ kehtʼal taj jaruuj inchalik i tiʼ kʼaxik chikinaah» (Eclesiastés 9:11).
Reʼ xchopwik reh i Annette, maʼ rehtʼal ta naq wach. Wilik pech reʼ taqeh inkibʼan i wilih, ehtʼalimaj kiwach on kifamilia kiibʼ. Reʼ Noelia xa lajeebʼ haabʼ naq wilik reh noq xchoparik ruum jenaj kʼijool. «Qʼeʼ xinyoʼjik eh xinkʼix-ik iruqʼor i Noelia. Ruum ajreʼ maʼ ajwach ta eh xuqʼor i xukʼul».
MAʼ REʼ TAJ I HAT WILIK AMAHK
Reʼ Annette irukapaaj chi rumahk i xkʼuljik. Reʼ Annette iruqʼor: «Chuʼnchel qʼiij inkʼulik pan nukʼux i xkʼuljik i chaqʼabʼ reʼreʼ eh inukapaaj chi mareh xnukoʼleej naq wiibʼ. Korik, maʼ xinkʼuyʼujik ta chik noq xinkiyokʼ, xa reʼ laʼ, ko inukapaaj chi wilik naq xnubʼan reh rukoʼljik wiibʼ».
Reʼ Noelia jeʼ reʼ woʼ irukapaaj. «Xnubʼiraj ta naq i nutuut wajaaw. Reʼ taqeh wajaaw maʼ inkikanaaʼ ta naq chi reʼ nuchaaqʼ eh reʼ hin ne qojkʼoʼnik chiʼ paat chi qutkeel, xa reʼ laʼ, xinelik chi kʼoʼnik chi wutkeel. Maʼ kʼaxik ta naq chi reh i nukaʼjaah chi ne kiruchop. Reʼ nufamilia tiʼ xrikʼraaj eh reʼ hin wilik numahk. Reʼreʼ irutiʼbʼisaj nukʼux».
Mi nawikʼraaj awiibʼ jeʼ rukabʼ i Annette eh i Noelia, maʼ insahchik pan akʼux chi noq inkichop jenoʼ kʼachareel maʼ inpahqaljik ta reh mi iraaj. Wilik inkiqʼor chi reʼ i xukʼul i wilih, wilik rumahk. Xa reʼ laʼ, maʼ awach ta iraaj rukʼulum i wilih. Mi reʼ hat xakʼul i wilih kʼoloq pan akʼux chi maʼ reʼ ta amahk.
Ruqʼorarik maʼ kʼaxik taj, xa reʼ laʼ, rureqarik chi riij qʼeʼ kʼaxik. Wilik taqeh inkikʼul i wilih eh maʼ awach ta eh inkiqʼor eh chi kutkeel inkikuy i tiʼ kʼaxik wilih eh inkiqʼor chi wilik kimahk ruum i xkʼuljik. Xa reʼ laʼ, mi maʼ xatqʼorik ¿ajwach insuqbʼik rukʼux? ¿Reʼ hat on reʼ xbʼanik i tiʼ aweh? ¿Koruman na chi ne nasikʼ awach ne tirutobʼeej?
CHAQʼOR CHAJARIK XAKʼUL
Reʼ Santo Laj Huuj inqʼorik chi riij jenaj winaq korik wach rukʼux Job i rubʼihnaal. Noq xikʼik pan tiʼ kʼaxik xuqʼor: «Naawokiik chi tiij chuwach i Dios naa nuqʼorom reh chuʼnchel i rutiʼkiil nukʼux» (Job 10:1). Mareh koruman woʼ chi ne nabʼan i wilih. Mi wilik jenoʼ awamigo chaqʼor reh chajarik xakʼul. Reʼ wilih ne tirutobʼeej reh chi suq ne tiwihʼik.
¿Chaj woʼ reet noq maʼ tiqʼorik ruukʼ jenoʼ kristyaano reh chi ne tirutobʼeej? Reʼ ihq wilih qʼeʼ kʼaxik chi ne nakʼam awutkeel.
Reʼ Annette xubʼan i wilih eh xsuqbʼik rukʼux. Reʼ Annette iruqʼor: «Xinqʼorik ruukʼ jenaj wamiga eh xuqʼor weh chi ne nuqʼor keh taqeh aj kʼamal bʼeeh pan congregación chajarik xnukʼul. Insuqbʼik nukʼux chi xnubʼan i wilih. Kʼih pech xitzuhnik wuukʼ eh xkiqʼor weh chajarik inwaaj naq nubʼiram: chi reʼ hin maʼxta numahk».
Reʼ Noelia xuqʼor keh taqeh rajaaw chajarik xukʼul. Reʼ Noelia iruqʼor: «Xinkitobʼeej eh xkikowbʼisaj nukʼux reh chi ne kinqʼorik chi riij i xnukʼul, reʼ wilih xirutobʼeej reh chi suq nukʼux eh maʼ intzʼirik ta nuwach».
Reʼ xuyeew rukowiil rukʼux reʼ i tiij. Reʼ Noelia iruqʼor: «Noq maʼ awach ta uukʼ kinqʼorik chi riij i xnukʼul, rubʼanariik nutiij chuwach i Dios xirutobʼeej. Noq inubʼan nutiij, inuqʼor reh i Dios chuʼnchel inwikʼraaj, eh reʼ reh iruyeew rusuqkiil nukʼux».
Reʼ hat ne woʼ inakoj rehtaal chi «wilik ru orahiil iqʼomanik» (Eclesiastés 3:3). Chakʼax awiibʼ reh chi maʼ ne ta tiyowabʼjik eh reh chi suq akʼux, eh tihiʼloq. Eh reʼ xti koruman: chasikʼ i Jehová, reʼ Dios inyeʼwik suqkiil kʼuxliis (2 Corintios 1:3, 4).
¿WILIK NA AHABʼUL (AHABʼIL) REH CHI NE INWIHʼIK AMEETZʼ?
Mi reʼ ameetzʼ iruqʼor aweh chi ne tiyohkik ruukʼ, chaqʼor reh: «¡Mabʼan i reʼ!» on «¡Maʼ kinatzʼaʼaj!». Matyoʼjik chi ne tirukanaaʼ. Matyoʼjik chi ruqʼorariik i wilih atoobʼ ta ne tirukanaaʼ. Mi xatrukanaaʼ maʼ raaj ta naq awach. Ne nareq jenoʼ chik ne tirukʼax eh ne imponik chuwach i holohik naʼojbʼal wilik aweh.
¿KʼAHCHIʼ NA KAAT KIJOTʼOM REH CHI NE KIYOHKIK AWUUKʼ?
«Jenaj qʼahxoq, noq wilik naq reh 13 on 14 haabʼ, reʼ taqeh kʼijool pan escuela inkiqerej naq i rubrasier eh inkiqʼor naq reh: Mi xatyohkik quukʼ suq ne nawikʼraaj» (Coretta).
¿Mi ne naq inaqʼor chi reʼ taqeh kʼijool wilih kʼahchiʼ naq keebʼ chi...
-
...kʼoʼnik?
-
...jotʼooj?
-
...inkaaj naq kichopom reh chi ne inyohkik kuukʼ?
«Pan jenaj camioneta, jenaj kʼijool xuqʼor weh kʼih qʼorik maʼ holohik taj eh xirutzʼaʼaj. Xnuqʼoj eh xnuqʼor reh chi maʼ ne ta irujil riibʼ wuukʼ. Xirilow xa jeʼ chik maʼ suq ta paam i nunaah» (Candice).
¿Mi ne naq inaqʼor chi reʼ kʼijool wilih kʼahchi naq chi...
-
...kʼoʼnik?
-
...jotʼooj?
-
...inkaaj naq kichopom reh chi ne inyohkik kuukʼ?
«Jenaj kʼijool kʼih pech xuqʼor chi irukʼax naq nuwach eh chi iraaj naq chi hin rumeetzʼ. Xnuqʼor reh chi maʼ inwaaj ta. Kʼih pech, irumajej naq i nuqʼabʼ. Xnuqʼor reh chi maʼ rubʼan chik, xa reʼ laʼ maʼ inbʼirinik ta naq. Jenaj pech, noq kʼahchiʼ naq nubʼakʼam i nuxijabʼ, xirutzʼaʼaj» (Bethany).
¿Mi ne naq inaqʼor chi reʼ kʼijool wilih kʼahchi naq chi...
-
...kʼoʼnik?
-
...jotʼooj?
-
...inkaaj naq kichopom reh chi ne inyohkik kuukʼ?
Pan korik reʼ kʼahchiʼ naq rukʼulariik wilik pan opción C.
¿Chaj woʼ reet maʼ jenaj ta wach i kʼoʼnik ruukʼ chi ne kinkijotʼ reh yohkik kuukʼ?
Noq tikijotʼ reh chi ne tiyohkik kuukʼ, maʼ suq ta ne tikahnik. Reʼ ajjotʼool maʼ irukanaʼ ta rubʼaan i wilih atoobʼ ta reʼ kʼachareel maʼ iraaj taj.
Reʼ jotʼooj maʼ reʼ ta kʼoʼnik: mareh ne tikimin reh chi ne tiyohkik ruukʼ jenoʼ kristyaano.
^ párr. 4 Atoobʼ ta reʼ taqeh naʼojbʼal wilih keh taqeh qʼahxoq, xa reʼ laʼ reʼ i wilih neʼ woʼ inkamanik keh taqeh kʼijool.
Puede que también le interese
RE’ TAQEH K’IJOOL INKIB’AN I PAHQANIK
¿Chajarik ne inubʼan mi kinkijotʼ reh chi ne inuchʼuwaʼrisaj wach i nukʼachariik?
Chanabʼeej mi kʼahchiʼ kaat kijotʼom. Chawil nikʼwach ne inakoʼleej awiibʼ.
