Emen me tiahk suwedih Annette kesehdi ih nanpwelo mwohn eh tehkada dahme wiewiawi. E koasoia, “I wia uwen ei kak koaros en kihsang ih pohi. I song en wer, ahpw mwomwen kisiniengte me kohsang nan eweiet. I siken, kikim, pakirih, oh rakih. Oh ni ahnsowo me I kehn kisin naip doakoahdi paliwereiet. I uhdahn luwetala.”

Ma ke lelohng soangen irairo, dahme ke pahn wia?

Mwein ke kaunopadahr ong irair wet, ele ni ahmw kin tetehk wasa ni ahmw kin kohla wasa kis nipwong kan, ahpw soahng suwed kan kakete wiawi. Paipel mahsanih, “Kaidehkin me marahrahn tang kan me kin kalap kana ni weirin tang; . . . kaidehkin me loalokong kan me kin kalap diarada ar mehn komour; . . . pwe paisuwed kin lelohng aramas koaruhsie.”—Eklesiasdes 9:11.

Ekei me pwulopwul duwehte Anette kin lelohng tiahk lemei sang emen me re sehse. Meteikan kin lelohng met sang rehn irail kan me re ese de pil emen kisehn arail peneinei. Ni Natalie eh sounparte eisek, emen me pwulopwul me mi karanih imweo tiahk suwedih. E koasoia, “Uwen ei masepwehk oh namenek me kahrehda nin tapio I sohte padahkihong emen.”

Annette kin lokolongkihte pepehm en suwedki dahme wiawio. E koasoia, “I kin kalapw pwurepwurehng tamanda dahme wiawi nipwongo, I medewe me I anahne wia laudsang en kihsang ih pohi. Ni mehlel iei, mwurin eh doakoaiehdio, I uhdahn masepwehkada kahrehda I luwetala. I sohla kak wia mehkot, ahpw I pehm me I anahne wia laudsang met.”

Natalie pil kin lokolongki pepehm me e wiahda sapwung. E koasoia, “Ma I esehte, I sohte pahn nohn likih aramas. Ei pahpa nohno wiahda kosonned ehu me ngehi oh riei serepeino pahn kin mihpene ni ahnsou me se kin mwadong likin ihmw, ahpw I sohte rong. Eri I pehm me I mweidohng mehn mpeio ahnsou mwahu en kamedekeiehla. Ei peneinei pil iang lokolongki dahme wiawio, oh I pehm me ngehi me kahrehiong irail medek laud. Ih met me I kin keieu lokolongki.”

Ma ahmw pepehm kan duwehte ahn Annette de Natalie, me keieu mwahu en medewe iei aramaso me lelohng tiahk suwed wet sohte men wia tiahk wet. Ekei aramas kin wiahki me soahng wet sohte nohn laud, re kin medewe me uhdahn ih mwomwen pwutak de aramaso me lelohng angkehlail mwomwen pekipeki. Ahpw angkehlail sohte douluhl konehng en wiawihong emen. Ma kowe emen me lelohng soangen irair suwed wet, kaidehn kowe me kahrehda!

Mehlel e mengei en wadek koasoi wet, “kaidehn kowe me kahrehda” ahpw en kamehlele met ele pahn apwal. Ekei kin kolokolete arail pepehm duwen dahme wiawio oh kin lokolongki ar pepehm me irail me wiahda sapwung oh ekei madamadau teikan me duwehte met. Ahpw ihs me pahn paiekihda ma ke sohte kasalehda met, kowe de me tiahk suwedih iuko? Ke anahne medemedewe en wiahda ehu pilipil tohrohr.

Paipel mahsanihong kitail me ni ahnsou me ohl lelepek Sohp lelohng apwal laud ehu, e koasoia: “Komwi ketin karonge ei kaulim ni lingeringer.” (Sohp 10:1) Mwein ke pahn paiekihda ni ahmw wia duwehte. Koasoiong emen me ke likih kak seweseiuk en wehwehkihla dahme wiawi oh seweseiuk en nsenamwahula sang ahmw pwunod laud.

Annette diarada me met mehlel reh. E nda: “I koasoiong kompoakepahi keren men, oh e kangoange ie en koasoiong ekei elder kan nan ei mwomwohdiso. I uhdahn peren pwe I wia met. Re pwurepwurehng tuhwong ie oh re ndaiong ie soahng kan me I anahne rong, me dahme wiawihong ie kaidehn ei sapwung. Soahng koaros me wiawi kaidehn ei sapwung.”

Natalie pil koasoiaiong eh pahpa oh nohno duwen tiahk suwed me wiawihong ih. E koasoia: “Ira utung ie, ira kangoange ie en koasoiahda dahme wiawi, oh met seweseie en dehr nohn nsensuwed oh lingeringer.”

Natalie pil diarada kamweitpe ni eh kin kapakap. E koasoia, “Kapakapohng Koht sewese ie, ahpw mehlel ni ahnsou pwuko me I pehm me I sohte kak koasoiaiong aramas emen ei kahpwal kan. Ni ahnsou me I kin kapakap, I kak saledek en koasoi. E kin kahrehda I en ahneki meleilei oh nsenamwahu loalei.”

Ke pil kak diarada me mie “ahnsoun kakehlahda.” (Eklesiasdes 3:3) Apwalih mwahu ahmw roson oh medemedewehte soahng mwahu kan. Kommoal ahnsou kan me ke anahne. Oh laudsang mepwukat koaros, likih Siohwa Koht me kin ketikihda soahng kansenamwahu koaros.—2 Korint 1:3, 4.

Ma kowe serepein men oh ke lelohng kasongosong en wia tiahk samin, e sohte sapwung en nda ni kehlail, “Ke dehr wia men!” de, “Dehr doahke ie!” Ke dehr masak me ke pahn luhssang pwutak me ke kin pehsehiong. Ma e sohla kin tehk uhk pwehki ahmw kahng dahme e wiao, sohte katepen eh pahn wia pwutak men me ken pehsehiong! Ke warohng ohl emen me uhdahn mehlel, emen me wauneki paliweromw oh dahme ke kamehlele.

“Nan sukuhl, pwutak kan kin waik mwurin ei sispando oh kin wia koasoi samin kan, duwehte ia uwen ei pahn nsenamwahula ahnsou me I pahn wia nsenen pwopwoud rehrail.”—Coretta.

Ia duwe, ke medewe me pwutak ko kin

1. Kapailoke serepeino?

2. Kalahiong serepeino?

3. Tiahk suwedih serepeino?

“Nan bus, emen pwutak tepida koasoiaiong ie soahng samin kan oh kol ie. I wokihsang peho oh ndaiong en keilasang limwahi. E kilangdohng ie oh medewe me I sahliel.”—Candice.

Ia ahmw madamadau, dahme pwutako wiahiong Candice?

1. Kapailoke?

2. Kalahiong?

3. Tiahk suwedih?

“Pahr me ahpwtehn neko, pwutak emen kin pwurepwurehng ndaiong ie me e mwahukin ie, oh e men sen pehsepene, mendahki I kin kalapw ndaiong ih soh. Ekei pak e kin damwer pehie. I ndaiong ih en uhdi, ahpw e sohte men uhdi. Ah ni ei pirepire selin ei suht kat, e mwadangete poakih nan tihnseweie.”—Bethany.

Ia ahmw madamadau duwen pwutak menet, e wie:

1. Kapailoke serepeino?

2. Kalahiong serepeino?

3. Tiahk suwedih serepeino?

Pilipil pwung ong ire siluh pwukat koaros iei pasapeng C.

Ia duwen tiahk suwedih emen eh weksang kalahiong emen de kapailoke emen?

Me tiahk suwedo kelehpw me pwungki dahme e wiewia. E kin pwurepwurehng wiewia met mendahki me e lidereo kin ndaiong en uhdi.

Tiahk suwedih emen wia mehkot me inenen suwed. E kak kahluwalahng angkehlail.