Antis di Janeti saporta algin ku atakal batil na con. Janeti fala: “N tenta fasi tudu ku N pudi, ma N ka pudi gera kel, N tenta grita, ma so ar ku na saiba na ña boka. N pincal, N suta-sutal, i N raña-rañal. I dipus N sinti i fidin faka. Kurpu moli tudu.”

Si bu staba na situason suma es, kuma ku bu na reaẑiba?

Nin si bu sta purparadu — talves bu ta sta atentu ora ku bu na sai di noiti — kusas mau pudi akontisi. Biblia fala: “I ka tudu ora ku jinti rapidu ta gaña kurida, . . . nin i ka so algin ku tene kuñisimentu ku ta sai ben, pabia tempu ku kusas ku ka speradu ta akontisi ku elis tudu.” — Eklesiastis 9:11, NM.

Suma Janeti alguns jovens sufri abusu seksual. Utrus atakadu pa un algin ke kunsi o pa un membru di se familia. Oca i teneba so des anu, Natalia sufri di abusu seksual pa un joven ku mora pertu di se kau. Natalia fala: “Suma N medi i tambi N burguñuba e ku manda N ka kontaba ningin.”

Janeti sta inda na lida ku sintimentus di kulpa pa ke ku akontisi. I fala: “I fika na ña menti, i tudu ora N ta lembra di ki noiti, N sinti suma si N dibi di tentaba inda luta mas ku el. Na bardadi, dipus ku N fakiadu, N pantaba mal. N ka pudiba fasi mas nada, ma N sinti kuma N dibi di fasiba algun kusa.”

Natalia tambi ta luta ku sintimentus di kulpa. I fala: “N ka dibi di teneba autokonfiansa. Ña papes pui regra di kuma ami ku ña irma no dibi di ba ta ndianta ora ku no na sai, ma N ka rispita kila. Asin N sinti di kuma N da ña visiñu oportunidadi di fasin mal. Ke ku akontisi afeta ña familia, i N ta sinti kulpadu di fasi elis fika ku dur garandi. N sta na luta ku es sintimentu.”

Si bu tene mesmu sintimentu suma Janeti o Natalia, lembra sempri di kuma kin ku bafadu i ka di si vontadi pa kila akontisi. Alguns jintis ta njuti seredadi di es asuntu, pa relis kulpa i di kilis ku bafadu. Ningin ka meresi bafadu. Si bu sedu vitima des abusu sibi kuma, bu ka tene kulpa!

Sin duvida, i fasil lei es diklarason: “Bu ka tene kulpa”; ma i pudi sedu mas difisil fia nel. Alguns jintis ta guarda sintimentu di ke ku akontisi i e ta lida ku sintimentus di kulpa o ku sintimentus negativu. Ma si bu ka konta, kin ku mas na benefisia — abo o kin ku abusa di bo? Bu dibi di pensa na utru opson.

Biblia fala kuma oca Jo omi justu staba na sufri ciu pabia di si duensa i fala: “N na papia ku kasabi na ña korson”! (Jo 10:1) Bu pudi tene benefisiu si bu fasi mesmu kusa. Papia ku un algin di konfiansa pudi judau ntindi ke ku akontisi i judau fika aliviadu i vensi bu sintimentus negativu.

Janeti oja di kuma es i bardadi. I fala: “N papia ku un amigu intimu, i nsentivan pa N papia ku un ansion di ña kongregason i ku si minjer. N kontenti fasil. E sinta ku mi manga di bias e falan izatamenti ke ku N pirsisa di obi — di kuma ke ku akontisi i ka ña kulpa. Nada di kila i ka ña kulpa.”

Natalia papia ku si papes aserka di abusu. I fala: “E apoian”, i fala mas “e nsentivan pa N papia aserka del, kila judan pa N ka fika tristi dimas i ku raiba.”

Natalia oja tambi konsolu atraves di orason. I fala: “Papia ku Deus judan, spesialmenti na ki mumentus ku N sintiba kuma N ka pudi splika utru algin ña sintimentus. Ora ku N na fasi orason, N pudi spresa livrimenti. I ta dan un sintimentu di pas ku trankilidadi di bardadi.”

Abo tambi bu pudi diskubri kuma i ten “tempu di kura.” (Eklesiastis 3:3) Kuida di bu kabesa na sintidu fisiku ku emosional. Diskansa diritu. I mas importanti di tudu, fiansa na Deus di tudu konsolu, Jeova. — 2 Koríntius 1:3, 4.

Si abo i un bajuda i bu sta na sufri preson pa entra na un konduta susu, i ka eradu pa bu fala ku tudu firmesa: “Ka bu fasi kila!” o, “Ka bu tokan!” Ka bu medi di kuma bu pudi bin pirdi bu namoradu. Si i kaba ku bo pabia di es asuntu, nta i ka meresiba pa bu kontinua ku el! Bu meresi un bon omi, kil ku rispita bu kurpu ku bu prinsipius.

“Ocan na liseu, rapasis ta tenta jundan sution e na falan kombersas indisenti — kuma N na sinti ben si N fasi seksu ku elis.” — Coretta.

Bu pensa kuma es rapasis staba na:

1. Brinka?

2. Flerta?

3. Abusu seksual?

“Na otokaru, un rapas kumsa ku falan kusas indisenti i kumsa ku tokan. N sakudil mon i N falal pa i sai ña dianti. I jubin suma un tulu.” — Candice.

Es rapas ku toka Candice ke ku bu pensa staba nel?

1. Brinka?

2. Flerta?

3. Abusu seksual?

“Anu pasadu, un rapas pega ña tras kuma i gosta di mi, kuma i misti pa no bai pasia, apesar di N falal sempri kuma N ka misti. Utru ora, i ta pasan mon na brasu. N falal pa i para, ma i kontinua. Un bias, oca N na mara sapatilia i dan na rabada.” — Bethany.

Na bu opinion, es rapas staba na:

1. Brinka?

2. Flerta?

3. Abusu seksual?

Nes tris situason, resposta sertu i C.

Kal ki diferensa di abusu seksual ku flerta o brinka?

Abusu seksual i ta bin di un ladu. I ta kontinua mesmu si vitima fala ki algin pa i para.

Abusu seksual i seriu. I pudi leba algin pa violensia seksual.