Anata abusac runaga pai mana musiaricllaita, allpama shitai pasashca ara. Ana nin, “ñuca ushashcata paihuan macanacurani. Caparinata munashahuas mana usharanichu. Paita tangasha, aitasha, huactasha, shillusha difindirirani. chasnaibi cuchilluhuan susirichihuara. Chihuasha mana imatas rana usharanichu”.

Casna shinai aushaga imata ranguima

Cuirarisha puricpihuas, imasaibiga tuta ima, casna tunu susirinagunahuan tuparishun. Bibliaga nin: “Caya ima tucunatas mana yachaibacchu” (Santiago 4:14).

Anata abusac runaga mana pai ricsishca runa chara. Imasaibiga amigoguna aillugunallata man. Natalia chunga huatata charishcaibi, pai mayanbi causac shuc malta runa paita abusara. Natalia nin, “pingashcamanda, manzhashcamanda mana pitas cuintarani”.

Anaga chasna tucushcamanda chara culpayuc shina sintirin. Pai nin, “Chi tuta ima tucushcata cuti yuyarisha, imahuashi mana mas difindirirani nisha pinsarini. Cuchilluhuan susirichishca huashaga mana imatas rana usharanichu. Chasna ashahuas, imahuashi mana mas alita difindirirani nisha pinsarini”.

Nataliahuas chasnallatami culpayuc shina sintirin. Pai nin, “imahuata mana musiaru arani. Ñuca yayagunaga ñuca ñañahuan aullaibi canzhama pugllanata saquic anaura. Chasna acpihuas mana cadsurani. Chimandami ñuca mayanbi causac runaga huaglichihuara. Ñuca ailluga yapacta sufrira. Chiraicumi culpayuc sintirini. Caimanda shungüi nanarini”.

Ana, Natalia shina sintirishaga caita yari: Shuc abusac runa canda violacpi, mana can munaimandachu chasna rai tucurangui. Maicanda violashcata uyasha runaguna ninaun, paiba culpallata man nisha. Mana pihuas chasna sufrina chan. Canda casna abusashca acpiga caita yari: mana camba culpamanda chara.

Mana ñuca culpa chara ninaga facil man. Chasna ashahuas, ima tucushcata cungarinaga mana facil chan. Maican abusashcaguna ima tucushcata mana pitas cuintanaunzhu. Chimandami, mana ali yuyaiguna shamucpi sapalla turmintarinaun. Chasna acpihuas, chunlla saquirinaga mana ali chan. Shuccunata yanapaita tapuna ushangui.

Biblia nin, yapacta sufriusha Job nishca runa casna nishcata: “Ñuca turmintariushcata cuintashami” (Job 10:​1). Cambaraicu caita rana ali manga. Can ima tucushcata shuc amigota cuintanaga mas alita sintiringahua yanapanga.

Chita rana, Anata yanapara. Pai nin, “shuc amigata cuintacpimi paiga muntunda cuirac turigunata cuintai nihuara. Cuintashcamanda alitami sintirini. Ashca cutin ñucahuan tandarisha, ñuca ima minishtishcata rimanaura: mana ñuca culpa ashcata ninaura”.

Natalia pai ima tucushcata yayagunata cuintara. Pai nin, “ñuca yayaguna alita uyasha ima tucushcata cuintai ninaura. Cuintanami mana yapacta piñarisha llaquiringahua yanapara”.

Chimandahuas Diosta mañana yanapai tucura. Pai nin, “chasna tucushcata mana pitas cuintana munashcaibi, Yaya Diosta cuintana yanapahuara. Diosta mañashaga tucui ñuca pinsashcata paita cuintarani. Chimi cungailla angahua yanapahuara”.

Cambas “ambirina timpu” tiyacta yachanguimi (Eclesiastes 3:​3). Mana yapa ungungahua cuirari. Chasnallata alita samangui. Chasna acpihuas, Jehova Diosta mascana mas balishca an. Paiga tucuibi canda cushiyachisha sinzhiyachinga (2 Corintios 1:​3, 4).

Camba enamorado irusta rasha nicpi mana manzhasha casna rimai: “Ama chita raichu”, “ama apihuaichu” nisha. Saquihuangami nisha ama chunlla saquirichu. Canda saquishaga mana ali runa chan. Canda balichic runata, chasnallata can quirishcata respetac runata ricuna angui.

“13, 14 huatata charishcaibi escuelaibi compañeroguna ñuca huashamanda sostenbi apisha aisahuac anaura. Chasna rasha irusta rimac anaura: ‘Ñucahuan puñushaga cushillami pasangui’ ” (Carla).

Can imata ningui, cai maltagunaga...

1. asiungunachu.

2. pugllashachu asiun.

3. abusana munashachu chasna ran.

“Buspi shuc malta runa iridsata rimasha apihuara. Maquihuan huactasha ‘ama apihuaichu’ nirani. Chasna nicpi, piñarisha rabian ricuhuara” (Claudia).

Can imata ningui, cai malta runaga...

1. asiunzhu.

2. pugllashachu asiun.

3. abusana munashachu chasna ran.

Shuc malta runa huata intiruta ñuca enamorada tucui nisha molestahuara. Ñuca mana munac charani. Imasaibiga cuyasha rigraibi apihuac ara. Ama apihuaichu nicpihuas mana uyac chara. Shuc punzha ñuca zapatosta huata riushcaibi, siquibi maquihuan huactahuara” (Beatriz).

Can imata ningui, cai malta runaga...

1. asiunzhu.

2. pugllashachu asiun.

3. abusana munashachu chasna ran.

Cai maltagunaga abusana munashami chasna ranaura.

Abusasha nisha molestashca, pugllasha asishcahuan chillata chan.

Abusasha nisha molestashcaga irustami amuta sintichin. Ama molestahuaichu nicpihuas abusanata munac runaga mana saquinzhu.

Caiga manzhanayacta man: Abusasha nisha molestaccunaga violanata ushanaunmi.