Εκ μουρς, κερντάς επίθεση κι Ανέτ ντα πριν καν τι αγαβέλ βόι σο αβέλας-πες, περαντάς-λα τελέ. «Κεράβας σο νακχέλας μι βαστένταρ για τι νασάβ», βακερέλα. «Προσπαθιντόμ τι νταβ βίκος, αλλά να νικιόλας μάνταρ φωνή. Αρχισάλομ τι ταρτίναβ-λες, τι νταβ-λες ντα τι τσσινάβ-λες. Ντα αζομάν αγαντόμ ότι ντινάς-μαν τσσουριάσαρ. Σουκιλόμ».

Άμα ισινάνας κι θέση της Ανέτ, σο κα κερέας;

Ατζέ-ντα άμα προετοιμαντάν-τουτ, δηλαδή άμα αρακχαβέσα-τουτ όταν ισινάν αβρί ιράτ, μπορεί τι αβέλ-πες κάτι κακός. «Να νικίνενα πάντα οντουλά σο τθάβντενα μπουτ σουγκό κο τθαβντιπέ ούτε ο ζουρανέ κι μάχη, ούτε ο σοφοί τθερένα πάντα χαμπέ ούτε οντουλά σο αγαβένα μπουτ πράγματα τθερένα πάντα ο χουλανιπέ, ούτε τθερένα πάντα επιτυχία ο τζενέ σο τζανένα μπουτ πράγματα· επειδή κάτι σο να μπεσάσα μπορεί τι αβέλ σαριλένγκε».​—Εκκλησιαστής 9:11.

Μερικά τερνέ, σαρ η Ανέτ, δεχτισάλε επίθεση τζενένταρ σο να τζανένας-λεν, ενώ γιαβερά τερνέ τζενένταρ σο τζανένας-λεν ή ατζέ-ντα τζενένταρ αντράλ λένγκε φαμιλιάταρ. Κάνα η Ναταλί ισινέ σάντε ντεσέ μπρεσένγκι, δεχτιντάς επίθεση εκχέ τερνέσταρ σο μπεσέλας πασέ λάκε κχερέστε ντα κερντάς λάκε μπέτι πράγματα. «Νταρασάλομ ντα λατζασάλομ αζόμ μπουτ σο κι αρχή να βακερντόμ-λες καεκχέσκε», βακερέλα η Ναταλί.

Η Ανέτ τθερέλα ατζέ τύψεις οντουλέσκε σο αβιλό-πες. «Να νασέλα μι γκοντιάταρ οντουβά σο αβιλό-πες οντιά ιράτ», βακερέλα. «Νιωθίναβα ότι έπρεπε τι προσπαθίναβ πιο μπουτ για τι νασάβ λέσταρ. Ισί μπαγιά ότι όταν ντινάς-μαν τσσουριάσαρ, νταρασάλομ αζόμ μπουτ σο σουκιλόμ. Να μπορίναβας τι κεράβ τίποτα, αλλά νιωθίναβα ότι έπρεπε τι κεράβας κάτι».

Η Ναταλί-ντα τθερέλα ατζέκ ασακέ τύψεις. «Έπρεπε τι τσσινέλ μι γκοντί», βακερέλα. «Μο ντατ ντα μι ντάι τσσουντάς μάνγκε ντα μι πφενιάκε ο κανόνας τι αβάς πάντα γιεκ κάνα κχελάσα αβρί κατά κχερ, αλλά με να ασουντόμ-λεν. Οτθάρ νιωθίναβα ότι ντινόμ οντουλέ τζενέστε, σο μπεσέλας πασέ μι κχερέστε, ι ευκαιρία τι κερέλ μάνγκε ανταβά μπέτι πράγμας. Μι φαμιλί πληγωσάλι μπουτ ανταλέσταρ σο αβιλό-πες ντα νιωθίναβα ότι φταίναβα με. Ανταβά ισί σο πληγώνελα-μαν πιο μπουτ».

Άμα νιωθίνεσα σαρ η Ανέτ ή η Ναταλί, προσπάθινε μα τι μπιστρές-τουτ ποτές ότι ο τζενό σο βιάντιβελα νανέ οτθέ επειδή μανγκέλα-λες. Κάποιοι πακιάνα ότι ανταβά νανέ αζόμ σοβαρός ζήτημας ντα βακερένα ότι ισί φυσιολογικός ο τσσαβέ τι κερέν ασακέ πράγματα, ντα ότι οντουλά σο βιάντιβενα τζάνας φιρί φιρί. Όμως, καέκ να αξίνελα τι βιάντιβελ. Άμα ισινάν τούι-ντα εκ ανταλένταρ, τι ντες-τουτ γκοντί ότι να φταίνεσα τούι ανταλέ πραγμάσκε!

Σίγουρα ισί εύκολος τι διαβάνες ι φράση «να φταίνεσα τούι». Αλλά μπορεί τι αβέλ μπουτ πιο δύσκολος τι πακιάς-λα. Μερικά τζενέ γκεραβένα οντουλά σο νιωθίνενα, οτθάρ τθερένα μπουτ τύψεις ντα γιαβερά μπέτι αισθήματα. Όμως, άμα να βακερντάν-λες, κας κα βοηθίνες πιο μπουτ, το νεαυτός ή οντουλές σο κερντάς τούκε ανταβά μπέτι πράγμας; Οτθάρ, πρέπει τι σκεφτίνες κάτι γιαβέρ-ντα σο μπορεί τι κερές.

Η Γραφή βακερέλα ότι ο δίκαιος Ιώβ, όταν τσσίντελας πι πιο μπαρί ταλαιπωρία, βακερντάς: «Κα κεράβ λάφι αντρέ κι μπαρί στεναχώρια σο τθεράβα!» (Ιώβ 10:1) Μπορεί τι βοηθίντιβες τούι-ντα άμα κερντάν ο ίδιος. Άμα κερντάν λάφι εκχέ τζενέστε σο τθερέσα λέσκε εμπιστοσύνη μπορεί τι βοηθίνελ-τουτ τι αγαβές ότι ναστί αλλάνεσα οντουβά σο αβιλό-πες ντα τι ηρεμίνες κατά μπέτι αισθήματα σο βασανίνενα-τουτ.

Ανταβά αβιλό-πες με την Ανέτ-ντα, βόι βακερέλα: «Βακερντόμ-λες εκχέ λατσσέ αμαλινάτε σο τθεράβα ντα βακερντάς μάνγκε τι κεράβ λάφι ντουέ πρεσβυτερόντζαρ. Χαιρίναβα σο κερντόμ-λες. Μπεσλάμ ντα κερντάμ λάφι μπουτ φαρ ντα βακερντέ μάνγκε ακριβώς οντουβά σο χρειαζίντιβαβας​—ότι να φταίναβας με οντουλέσκε σο αβιλό-πες. Να φταίναβας ιτς».

Η Ναταλί βακερντάς πι νταντέσκε ντα πι νταγιάκε ανταλέ μπέτι πραγμάσκε σο κερντέ λάκε. «Στηριντέ-μαν», βακερέλα. «Βακερένας μάνγκε τι κεράβ λάφι ανταλέ πραγμάσκε, ντα ανταβά βοηθιντάς-μαν μα τι νιωθίναβ αζόμ μπαρί στεναχώρια ντα χολί».

Επίσης, αρακχλάς παρηγοριά κι προσευχή. Η Ναταλί συνεχίνελα: «Κάνα κεράβας λάφι κο Ντεβέλ βοηθίνελας-μαν, ειδικά όταν νιωθίναβας ότι να μπορίναβας τι πουτράβ μο γκι καεκχέ τζενέστε. Κάνα κεράβα προσευχή, μπορίναβα τι πουτράβ μο γκι. Ανταβά ηρεμίνελα-μαν μπαγιά ντα κερέλα-μαν τι νιωθίναβ μπουτ λατσσές».

Πρέπει τούι-ντα τι αγαβές ότι υπαρχίντιβελα “βακίτι τι αβές λατσσές”. (Εκκλησιαστής 3:3) Μα μουκχ το νεαυτός, προσπάθινε τι νασκιαρές ο μπέτι σκέψεις τι γκοντιάταρ ντα τι σκεφτίνες ότι ο πράγματα κα τζαν πιο λατσσές. Τι ξεκουράντιβες αζόμ χρειαζίντιβελα. Ντα ο πιο σημαντικός, τι τθερές εμπιστοσύνη ντα τι μουκχές το νεαυτός κο Ιεχωβά, κο Ντεβέλ κάθε παρηγοριάς.​—2 Κορινθίους 1:3, 4.

Άμα ισινάν τσσάι ντα οντουβά τσσαβό σο νικιόσα λέσαρ πιένελα-τουτ τι κερές μπίλατζανε πράγματα, νανέ λάθος τι βακερές σταθερά: «Μα κερ-λες ανταβά!» ή «Λε το βας οπρά-μάνταρ!» Μα σκέφτινε ότι άμα βακερντάν κάτι ασακό κα χασαρές-λες. Άμα βοβ να μανγκέλα τι συνεχίνεν τουμαρί σχέση ανταλέσκε, αζομάν κα αγαβές ότι να αξίνελας! Αξίνελα τούκε εκ πραγματικός μουρς, κάποιος σο σεβάνελα το σώμας ντα οντουλά σο πακιάσα.

«Κο γυμνάσιος, ο τσσαβέ ταρτίνενας παλάλ μο σουτιέν ντα βακερένας μπέτι λάφια, για παράδειγμας ότι κα νιωθίναβας μπουτ πιο λατσσές άμα κα σοβάβας λέντζαρ».​—Κορέτα.

Πακιάσα ότι ανταβά σο κερένας ο τσσαβέ ισινέ

1. 1. Σακάς;

2. 2. Καμάκι;

3. 3. Σεξουαλικός πείραγμας;

«Κο λεωφορείος, εκ τσσαβό αρχισάλο τι βακερέλ μάνγκε μπέτι λάφια ντα τι ακουμπίνελ-μαν. Ντινόμ-λες κο βας ντα βακερντόμ λέσκε τι νασέλ. Ντικχέλας-μαν σαρ τι ισινόμας ντινιλί».​—Κάντις.

Σο ισινέ ανταβά σο κερντάς οντουβά τσσαβό κι Κάντις;

1. 1. Σακάς;

2. 2. Καμάκι;

3. 3. Σεξουαλικός πείραγμας;

«Πέρσι, εκ τσσαβό βακερέλας μάνγκε συνέχεια ότι μπεϊντίνελας-μαν ντα ότι μανγκέλας τι νικιάς ραντεβού, παρόλο σο με βακεράβας λέσκε πάντα όχι. Μερικές φορές, γαλίνελας μι μουσί. Βακεράβας λέσκε τι σταματίνελ, αλλά βοβ τίποτα. Εκ ντιβές, σαρ πφάνταβας μο κορδόνια, ντινάς-μαν κι μπουλ».​—Μπέθανι.

Πακιάσα ότι ανταβά σο κερντάς ισινέ:

1. 1. Σακάς;

2. 2. Καμάκι;

3. 3. Σεξουαλικός πείραγμας;

Η σωστή απάντηση κο τριν-ντα ερωτήσεις ισί η 3.

Σο διαφορά τθερέλα ο σεξουαλικός πείραγμας κατά καμάκι ή κατά σακάς;

Ο σεξουαλικός πείραγμας μπεϊντίνελα-λες σάντε ο εκ κατά ντούι. Συνεχίντιβελα ατζέ-ντα όταν ο γιαβέρ βακερέλα λέσκε τι σταματίνελ.

Ο σεξουαλικός πείραγμας ισί σοβαρός πράγμας. Μπορεί τι ερεσέλ κι σεξουαλική βία.