Le Annette rap se ma ‘e avat ne le‘et huhur se iạ. Iạ ‘ea: “Gou rē te‘ ne tē ‘atakoa ne gou pō la a‘häe‘ȧk. Gou ‘ohō ka ‘otou lio kat pal ra. Gou ‘us, ạ‘ ma mö‘ tape‘ma iạ. Ma ‘e avat ne is ne ser ta kō e gou, gou kat pō pạu ra la rē ta tēet.”

Ka tes tä ‘äe la rē kepoi ka ‘äe la agtạu ma fūfū heta‘ag?

Kepoi ka ‘äe noh matạ‘ ‘e avat ne ‘äe la la‘o se ta utut ‘e pög, a‘häe‘ȧk ne pefä‘e la pō la sok. Puk Ha‘a ‘ea: “Lelea‘ jön väve kat marō ra ‘e te‘ ne av ‘i . . . ‘igke‘ te‘ ne lelea‘ ‘inea tē ‘es koroa ‘atakoa . . . pefä‘e hele‘ se te‘ ne famori.”—Le‘ Marag ta 9:11.

Fak ma se le Annette, lelea‘ haharȧg ma‘oi kat ‘inea‘ia ra le‘et rē kok se irisa. Lelea‘ haharȧg ne tore ‘inea le‘et ne sasapoa ne rē kok se iạ, ne kop ma le‘et ‘e ‘on kạunohoag ta. Le‘ fā haharạgit ne noh ‘el se Natalie rē kok iạ ‘e avat ne iạ fạu saghul. Natalie ‘ea: “Ti‘ ne ‘otou fea ma masraga, gou kat ‘ea pạu ra se ta le‘et.”

Annette nōnō kokon‘ạkia ma tē ne soko. Iạ ‘ea: “Gou kat mao‘ȧk pạu ra tē ne sok ‘e pög ta‘ag. Gou a‘häe ne gou fakpar sirietou. ‘E avat ne iạ kō sere e gou, ti‘ ne ‘otou fea ta a‘parpar sio gou. Gou kat pō pạu ra la rē ta tēet, ka av ‘on rereag gou a‘häe ne gou tạu la rē ta tē hoi‘ȧk.”

Natalie ‘on huga rū ma se tē ne soko. Iạ ‘ea: “Gou a‘pū‘atāan gou. ‘Otou ö‘rua gat ke av ‘ea la gou ma ‘otou sạsiạg ta la manea‘ ag‘esea ‘e sisi, ka gou kat a‘fại ra se. Kop ma gou ta hün ne iạ ne noh ‘el se gou rē koko e gou. Tē ne soko täe pạu se ‘otou kạunohoag ta, gou ‘inea ne gou a‘rū pạu ‘oris huga. Ta‘ag tēet ne a‘kokon‘ȧk pạu gou.”

Kepoi ka ‘äe ‘es ‘e räe ‘eseat ma ne Annette ne Natalie ‘ese, a‘häe‘ȧk ne le‘et ne rē koko kat ‘oaf ra la ag ta‘ag la rē se ia. Iris ‘on rereag fakfürmariạ‘ȧk tē te‘is ma iris ‘ea ne ta‘ag ag ‘on rä‘i fā. Ma iris ‘ea ne iris ne rē koko ta‘ag tēet ne iris aoa. Kat noj ra la le‘et la rē kok. Kepoi ka ta‘ag tēet ne ‘äe agtạu mar, ‘eake ‘äe ta sara!

Iạ vavhiạn pạu la ‘ea ne ‘eake ‘äe ta sara, ka iạ a‘noa pạu la mā sin. Iris ‘on rereag näe‘ȧk tē ne soko ‘e ‘oris huga, ta‘ag ta hün het ne iris fa hepa e ne kokon a‘ti‘u e. ‘On fūạg kat lelei ra la ‘äe la ‘ep‘ȧk ‘ou nuju? Ka tes tä ‘äe la rē?

Puk Ha‘a fäeag‘ạkia se ‘isa avat ne Jope kokono e, ma iạ ‘ea: “A‘fạim se ‘otou fäeag ko‘ȧk mah te‘is!” (Jope 10:1) ‘Ou huga la nōnō kokon ma kepoi ka ‘äe la noh a‘häe‘ȧk la‘mo tē ne soko. Iạ la hạiasoag ti‘ pạu la ‘äe la fäeag‘ạkia tē ne täe ‘e ‘ou huga se le‘et ne ‘äe tua‘nȧk sin. ‘Ou huga täla fürmariạ pạu.

Annette aier‘ȧk pạu tē te‘is. Iạ ‘ea: “Gou fäeag‘ạkia tē ne soko se ta kạumane‘ag ‘elet, ma iạ ‘ea la gou la kel se fā mamfuạ ne kạurotuga. ‘Otou huga ‘oaf ‘e avat ne gou a‘sok tē ne iạ ‘ea. ‘E av ne ‘ạmis hạifäegaga e, iris ‘ea ne gou la se keua sar ta se goua ‘e rēko tē ne soko. ‘Eake gou ta sara.”

Natalie fäeag‘ạkia se ‘on ö‘rua tē ne soko. Iriạ ‘ea: “ ‘Otou ö‘rua hạiasoag pạu se gou. Iriạ gat ke av ‘ea se gou la fäeag‘ạkia tē ne täe ‘e ‘otou huga, ma tape‘ma la gou la se kokon ne la fek hạihạiạ.”

Natalie pō fürmariạ tape‘ma ‘e ro‘ạitu. Iạ ‘ea: “ ‘E avat ne noanoa e la gou fäeag‘ạkia se ta le‘et tē ne täe ‘e ‘otou huga, gou fäeag‘ạkia ma se ‘Ạitu. Iạ vavhiạn la gou la fäeag‘ạkia ‘e avat ne gou la ro‘ạitu e, ‘otou huga fürmariạ pạu.”

‘Äe täla räe ne ma ‘on “av het se a‘mȧür tē.” (Le‘ Marag Ta 3:3) Matạ‘ a‘lelei se ‘ou mạuri, matạ‘ la ‘äe la a‘u‘uạ a‘lelei. Hȧ‘ȧk ‘e räe se nonojo. ‘On pumuạ pạu, tua‘nȧk se ‘Ạitut ne a‘hele‘ue fürmaria ‘atakoa, Jihova.—2 Korinita 1:3, 4.

 Kepoi ka ‘äe le‘ hạnit ma le‘et hasoa ‘äe la a‘sokoa ag se ma‘ma‘a, ‘äe la ‘ea: “Tā‘ea!” ne, “Se ‘atạk se gou!” Se pa a‘oaf‘ạkia huạg ne ‘ou kạumane‘ag fā ta, ‘e ‘ou a‘häe ne iạ täla tokana ‘e la ‘oaf se ‘äe. ‘Äe la se huạg ‘af‘af, kepoi ka iạ la a‘vȧh ‘ạmiạr hạikạinagaga ‘e rēko ‘äe kat a‘sok ra ‘on pa ‘ese! Iạ lelei se‘ la ‘äe la ‘inos ma fāat ne la ‘ē‘ȧk ‘ou foro ma ‘ou pilifi.

“‘E rako räi‘ fā ta a‘mou fut uạuạ ne ‘otou käv susu, ma ‘ea fäeag ‘ar se ȧr a‘fại, iris ‘ea ne gou la ‘oaf‘oaf pạu ‘e avat ne gou la mös ag‘esea e ma irisa.”—Coretta.

Ka tei ka ‘äe a‘häe ne iris

1. A. Oioia iạ?

2. E. ‘Ar‘ia?

3. I. Has‘ȧk a‘ne‘ne‘ia ag ne ‘inoso se iạ?

“Le‘ fāat ‘atạk se gou ma ‘ea fäeag se a‘fạiạg lelei. Gou panạu ‘on ‘uhapa ma ‘ea se iạ la ‘ut la sousou. ‘On ‘io heta se gou fak se gou jạurarā.”—Candice.

Ka tei ka ‘äe a‘häe ne le‘ fā te‘

1. A. Oioia iạ?

2. E. ‘Ar‘ia?

3. I. Has‘ȧk a‘ne‘ne‘ia ag ne ‘inoso se iạ?

“‘E fạut öf se le‘ fāat gat ke av ‘ea ne iạ ‘oaf se gou, ma iạ pa ‘es la gou la rē kạumane‘ag ma iạ, aier ma ne gou ‘ea vȧh se iạ ‘igkȧ‘. Av ‘on rereag iạ la sao ‘otou uma. Gou ‘ea se iạ la tā‘ea, ka iạ kal toak ra. Ma ‘e avat ne gou ‘o‘oroa ‘äp ne ‘otou säkänäve, iạ panạu ‘otou muri.”—Bethany.

Ka tes tä ‘ou a‘häe, le‘ fā tē:

1. A. Oioia iạ?

2. E. ‘Ar‘ia?

3. I. Has‘ȧk a‘ne‘ne‘ia ag ne ‘inoso se iạ?

Tög ne sạio‘ folu ta I.

Ka tes tä rē e has‘ȧk a‘ne‘ne‘ia ag ne ‘inoso la tū ‘e ‘ara ma oi tē?

Has‘ȧk a‘ne‘ne‘ia ag ne ‘inoso iạ hap ‘esea. ‘On fūạga iạ la sok ma kikia, aier ma ne famör ta la ‘ea ‘igkȧ‘ ne tā‘ea.

Kop la se fakfürmariạ‘ạkia ag te‘, iạ la pō la hele‘ la a‘sokoa ‘e ag ne‘ne‘i ag ne ‘inoso.