Na faafuaseʻi ona osofaʻia e se tagata Annette ma ato o ia i lalo. Ua ia faapea mai: “Na ou faia taumafaiga uma e tulei ese ai o ia. Na ou taumafai e ee, ae e lē lagona soʻu leo. Na ou taumafai e tulei ese o ia, aa, tatuʻi ma felaʻu o ia. Ae o le taimi lava na tui ai aʻu i le naifi, na matuā lē mafai ai loa ona ou toe faia se gaoioiga.”

Pe ana faapea na tupu iā te oe lenei mea, o le ā le auala e te tali atu ai?

Atonu e mafai ona e nofosauni, o se faataʻitaʻiga, e te faaeteete pe a e fealuaʻi i fafo i le pō. Peitaʻi, e mafai lava ona tutupu mea leaga. Ua faapea mai le Tusi Paia: ʻE lē manumalo pea i le tausinioga o ē e saosaoa, pe e aloaʻia foʻi i latou ua popoto; auā e tutupu faafuaseʻi mea iā i latou uma i le taimi e leʻi faatalitalia.’—Failauga 9:11.

O isi talavou e pei o Annette e faaleagaina i faiga taufeusuaʻiga e se tagata e lē masani ai, ae o isi e faaleagaina e se tagata e latou te masani ai, po o se tasi foʻi o o latou aiga. I le na o le sefulu o tausaga o Natalie, na faaleagaina ai o ia e se talavou e nofo latalata i le mea e iai lo latou fale. Ua faapea mai o ia: “Ina ua tupu lenei mea iā te aʻu, na ou matuā fefe lava ma māsiasi, ma ou te leʻi taʻuina i se isi i lenā taimi.”

O loo iai pea lagona nofosala o Annette e faatatau i le mea na tupu i lenā pō, ma e mafaufau pea i ai o ia. Ua ia faapea mai: “Ou te lagona sa tatau ona ou taumafai malosi e tulei ese o ia. Peitaʻi, ina ua tui aʻu i le naifi, na ou matuā fefe ma lē mafai ona ou toe faia se isi gaoioiga. Ae ou te lagona sa tatau lava ona ou taumafai.”

O loo tauivi foʻi Natalie ma na faalogona o le nofosala, ma e manatu sa lē tatau lava ona ia talitonuina lenā tagata. Sa fai e ona mātua se tulafono, pe a ō i fafo ma lona uso e taaalo, e lē tatau ona alu ese le isi mai i le mea o loo iai le isi. Ae e leʻi usitaʻi o ia. Na ia taʻua: “E pei ua ou tuu atu i lenā tagata le avanoa e na te faaleagaina ai aʻu. Na matuā mafatia loʻu aiga ona o le mea na tupu, ma ou te tuuaʻia aʻu ona o le faatigā iā i latou. E sili ona faigatā iā te aʻu le vaai atu o mafatia loʻu aiga.”

Pe afai e taitutusa ou lagona ma Annette po o Natalie, ia manatua o lē na faamalosia e faia feusuaʻiga, e lē faapea o se mea na ia malie i ai. E manatu māmā nisi i lea mataupu, ma faia faamolemolega e faapea o le mea lava sa mananaʻo i ai tagata na faamalosia. Peitaʻi, e lē tatau ona faamalosia se tasi e faia feusuaʻiga. Pe afai na faia iā te oe nei faiga matuā matagā, e lē tatau ona e tuuaʻia oe lava.

E faigofie le faitau i le faaupuga “e lē tatau ona e tuuaʻia oe lava,” ae atonu e sili atu ona faigatā le talitonu i ai. Atonu e lē faailoa atu e nisi le mea na tupu, ma mafatia ai i faalogona nofosala ma isi faalogona lē lelei. Ae o ai o le a sili ona puipuia pe afai e te lē faailoa atu le mea sa tupu? O oe po o lē na faia nei faiga matuā matagā? Nai lo o le lē faailoa atu i isi, o se mea lelei le mafaufau i se isi auala e taulima ai lea mataupu.

O loo taʻua i le Tusi Paia, ina ua matuā mafatia le tagata amiotonu o Iopu, na ia faapea mai: “Ou te tautala atu foʻi i le tigā o loʻu loto!” (Iopu 10:1) E ono aogā foʻi iā te oe le faia o le mea sa faia e Iopu. O le talanoa atu i se tasi e te talitonuina, o le a fesoasoani iā te oe e iloa ai le auala e taulima ai le mea na tupu, ma faaitiitia ai foʻi lou mafatia i faalogona lē lelei.

Na faamaonia e Annette le moni o lenā manatu. Sa ia talanoa atu i se uō vavalalata, ma na uunaʻia ai o ia e talanoa atu i ni toeaina Kerisiano i la latou faapotopotoga. Ua ia faapea mai: “Ua ou fiafia ona sa ou faia faapea. E tele taimi na matou talanoa ai, ma na la faailoa mai le mea tonu na tatau ona ou iloa, e lē o aʻu na māfua ai le mea na tupu. E lē tatau lava ona ou tuuaʻia aʻu i le mea na tupu.”

Na talanoa Natalie i ona mātua e faatatau i le faaleagaina o ia. Na ia faapea mai: “Na la fesoasoani mai iā te aʻu. Na la faamalosiau mai ina ia talanoa atu, ma na fesoasoani lea iā te aʻu e aua ai neʻi soona faanoanoa ma soona ita.”

Na maua foʻi e Natalie le faamāfanafanaga mai i le tatalo. Na fai mai o ia: “Na fesoasoani iā te aʻu le talanoa atu i le Atua, aemaise lava i taimi na ou manatu ai e lē mafai ona sasaa atu oʻu faalogona i se isi. Pe a ou tatalo, e saʻoloto laʻu talanoa. Ou te lagona ai le toʻa ma le filemu.”

E manaʻomia foʻi se taimi e toe faafoʻisia ai lou “malosi.” (Failauga 3:3) Ia tausi lelei lou soifua mālōlōina. Ia ʻalofia mafaufauga lē lelei, ae taumafai e uaʻi atu i mea lelei. Ia lava le mālōlō. Ae sili atu i lenā, ia faalagolago iā Ieova o le Atua o faamāfanafanaga uma.—2 Korinito 1:3, 4.

Pe afai o oe o se teine ma ua tauanau oe e se isi e faia amioga lē mamā, e lē leaga lou fai atu ma le maumauaʻi, “Soia!,” pe fai atu foʻi “Aua e te tago mai iā te aʻu.” Aua le avea lou fefe ina neʻi musu lau uō tama iā te oe, ma itu e te fefe ai e fai saʻo i ai. Pe afai e na te faauma le lua faigāuō ona o lenā mea, e sili lenā nai lo o le maʻimau ai o oe. E tatau ona e maua se uō tama e faaaloalogia, e faaaloalo iā te oe ma mea e te faatāua.

Ua faapea mai Coretta: “I le aʻoga tulaga lua, e toso e tama le pito i tua o loʻu papa ma fai mai tala lē mamā e faapea, o le a lelei oʻu faalogona pe a matou momoe.”

Pe e te manatu sa

1. 1. Taufaalili e na tama Coretta?

2. 2. Faatafai iā Coretta?

3. 3. Faia gaoioiga faatosina matagā i faiga taufeusuaʻiga iā Coretta?

Ua faapea mai Candice: “I luga o le pasi, sa fai mai e se tama ni tala lē mamā ma tago mai i se auala lē talafeagai. Na ou tago po ese lona lima ma fai i ai e alu ese. Ae tilotilo mai iā te aʻu ma manatu e leaga loʻu ulu.”

O le ā e te manatu sa faia e lenei tama iā Candice?

1. 1. Taufaalili iā te ia?

2. 2. Faatafai iā te ia?

3. 3. Faia gaoioiga faatosina matagā i faiga taufeusuaʻiga iā Candice?

Ua faapea mai Bethany: “I le tausaga ua teʻa, na masani ona fai mai le isi tama e fiafia iā te aʻu ma na manaʻo e ma te uō, e ui lava na ou fai i ai i taimi uma ou te lē fia uō iā te ia. O isi taimi e tago milimili loʻu lima. Ou te fai i ai soia ae lē tuua ai lana gaoioiga o loo fai. I se tasi taimi ina ua ou punou e nonoa loʻu seevae, sa tago o ia ma po loʻu nofoaga.”

I lou manatu, po o:

1. 1. Taufaalili e le tama Bethany?

2. 2. Faatafai le tama iā Bethany?

3. 3. Faia e le tama ni gaoioiga faatosina matagā i faiga taufeusuaʻiga iā Bethany?

O le tali saʻo mo nei fesili uma e tolu, o le numera 3.

O le ā le eseesega o gaoioiga faatosina matagā i faiga taufeusuaʻiga, ma le faatafai po o le taufaalili?

O gaoioiga faatosina matagā i faiga taufeusuaʻiga, e lē faapea na manaʻo i ai lē ua aafia i nei faiga. E faaauau pea nei faiga e tusa pe tetee atu lē o loo aafia ai.

O nei faiga e matuiā. E mafai ona iʻu atu ai i faiga sauā taufeusuaʻiga.