Fosi Annette sabi san pasa, a man trowe en go na gron. A e taki: „Mi feti nanga en teleki mi kon weri. Mi bari, ma a gersi leki mi sten ben gowe. Mi pusu en, mi skopu en, mi naki en, mi krabu en. Ne mi firi fa a dyuku mi nanga wan nefi. Mi no ben man du nèks moro.”

Efu so wan sani pasa nanga yu, san yu ben o du?

Kande yu e luku bun te yu e go na strati te neti. Ma toku sma kan du ogri nanga yu. Bijbel e taki: ’A no den wan di gaw e wini a streilon. Èn a no den wan di sabi sani sma feni bun, bika ogri ten nanga sani di den no e fruwakti kan miti den alamala.’—Preikiman 9:11.

Son leisi na wan sma di yu no sabi e verkracht yu, neleki san pasa nanga Annette. Ma tra leisi baka na sma di yu sabi, noso yu eigi famiri srefi. Natalie ben abi tin yari di wan boi fu en birti verkracht en. A e taki: „Mi ben frede èn mi ben e syen so te taki mi no ben wani taigi nowan sma.”

Te now ete Annette e denki taki na en fout taki a man verkracht en. A e taki: „Solanga mi e tapu mi ai, mi e si san pasa a neti dati. Mi e firi leki mi ben musu feti moro tranga fu kan stop en. Ma baka di a dyuku mi, mi kon frede èn mi no ben man du noti moro. Ma tòg mi e firi leki mi ben kan du moro.”

Natalie srefi e denki taki na en fout. A e taki: „Mi no ben musu frutrow sma so. Mi papa nanga mama ben taigi mi nanga mi sisa taki te wi e prei na dorosei, wi musu tan nanga makandra, ma mi no arki. Now mi e firi leki na mi gi a boi kans fu verkracht mi. Mi heri famiri e sari fu a sani disi èn mi feni taki na mi fout. Na disi e hati mi moro.”

Efu yu e firi leki Annette nanga Natalie, dan hori na prakseri taki te den verkracht wan sma, dan a no ensrefi ben wani dati. Son sma no e si disi leki wan seryusu sani, fu di den feni taki na so boi de kaba. Noso den feni taki efu den verkracht wan sma, dan na a sma srefi suku en. Ma nowan sma wani taki trawan verkracht den. Dus efu a sani disi miti yu, a fout no de na yu!

A moi fu leisi dya taki „a fout no de na yu”. Ma a no makelek fu bribi dati. Son sma no e taki fa den e firi èn ala yuru baka den e feni taki a fout de na den. Den e prakseri ala sortu fruferi sani tu. Ma denki a tori: Te yu no e fruteri wan sma san pasa, suma o firi en? Yu noso a sma di verkracht yu? Luku san moro bun fu du.

Bijbel e taki fu a reti-ati man Yob di ben abi bun furu broko-ede. Di a ben kon hebi gi en, a taki: „Sani e moro mi. Meki mi taki!” (Yob 10:1) Te yu e du a srefi, yu o firi bun. Te yu e taki nanga wan sma di yu kan frutrow, dan disi o yepi yu fu si fa yu kan libi nanga a sani di pasa nanga yu. Yu no o firi brokosaka so furu moro tu.

Na dati Annette kon si. A e taki: „Mi fruteri wan bun mati fu mi san pasa èn a gi mi deki-ati fu go taki nanga den owruman fu mi gemeente. Mi breiti taki mi du dati. Den sidon taki nanga mi omeni leisi èn den taki sani di trowstu mi. Den taigi mi taki a no mi fout. Mi no du noti.”

Natalie fruteri en papa nanga mama taki a boi verkracht en. A e taki: „Den yepi mi èn den gi mi deki-ati fu taki fu a tori. Dati meki mi no ben e sari so furu moro èn mi ati no ben e bron moro nanga misrefi.”

Begi trowstu Natalie tu. A e taki: „Te mi ben e taki nanga Gado, dan dati ben e yepi mi, vooral te mi no ben abi a deki-ati fu taki nanga wan sma. Te mi e begi, mi kan taki fri. Dati e yepi mi fu firi moro bun èn fu no broko mi ede moro.”

Yu srefi o si tu taki ’wan ten de fu meki sani kon betre’ (Preikiman 3:3). Sorgu bun gi yusrefi èn prakseri sani di o meki yu firi bun. Rostu bun. Ma san moro prenspari na fu frutrow tapu Yehovah, a Gado di e trowstu sma.—2 Korentesma 1:3, 4.

Efu yu na wan meisje èn wan boi wani dwengi yu fu du wan sani di no fiti, dan a bun fu taigi en krin: „No du!” noso „No fasi mi!” No frede fu taki wan sani fu di yu denki taki yu o lasi en. Efu a boi no wani de nanga yu moro fu di yu taigi en a sani disi, dan a no wan bun boi. Wan bun boi o abi lespeki gi yu fu di yu e du san Bijbel e taki. Na so wan sma yu abi fanowdu!

„Na skoro den boi ben e hari mi beha èn den ben e taki sani fu gi mi syen. Den ben e taki dati mi ben o firi moro bun te mi abi seks nanga den.”—Coretta.

San den boi disi ben e du?

1. Gewoon den ben e fruferi en?

2. Den ben e skèin en?

3. Den ben e muilek en fu di den wani abi seks nanga en?

„Di wi ben de na ini skorobus, wan boi taigi mi wan lo fisti sani èn a grabu mi hori. Mi naki en anu puru, dan mi taigi en fu skoifi. Ne a luku mi leki mi e law.”—Candice.

San a boi disi du nanga Candice?

1. Gewoon a fruferi en?

2. A skèin en?

3. A muilek en fu di a wani abi seks nanga en?

„A yari di pasa, wan boi ben gwenti taigi mi taki a lobi mi èn taki a wani go koiri nanga mi. Ma ala leisi mi ben e taigi en taki mi no wani. Son leisi a ben e prei nanga mi anu. Mi taigi en fu stop, ma a no ben wani. Ne wan leisi di mi beni fu tai mi fetre, a fasi mi na mi bille.”—Bethany.

San yu denki a boi disi du?

1. Gewoon a fruferi en?

2. A skèin en?

3. A muilek en fu di a wani abi seks nanga en?

A piki tapu ala den dri aksi disi na C.

Te wan boi e muilek wan meisje fu di a wani abi seks nanga en, dan dati a no a srefi leki te a e fruferi en gewoon noso te a e skèin en. Fu san ede?

Fu di na wan bigi ogri te wan boi e muilek wan meisje fu di a wani abi seks nanga en. Son leisi a e pasa srefi taki wan meisje e taigi wan boi omeni leisi taki a no wani, ma toku a boi e tan muilek en.

Disi na wan seryusu sani fu di a kan meki srefi taki wan sma e verkracht wan trawan.