Annette ke rhe riẹn obo re phia, ohwo rọ guọnọ gba duẹ na tuarọ botọ nure. Annette tare nẹ, “Me davwẹngba mẹ eje me vwọ họnrọ, ji kperi phia, ẹkẹvuọvo, ota se nu vwe unu-u. Mi ghwiẹrẹ, mi genre nẹ oma. Etiyin me da rhe riẹn nẹ ọ vwẹ aphia vwo duvwu ovwẹ. Ọke yena, ẹgba re rhe vwe-e.”

Wọ da mrẹ oma wẹn vwẹ ẹdia tiọyena, die yen wo che ru?

Ọkiọvo wọ nabọ gbẹrophiyotọ ọke wo vwo kpo asan vwẹ ason, ẹkẹvuọvo obo re brare sa phia. Baibol na tare nẹ, “onẹdjẹ na dia ọ rẹ otu ro bro okpakpa-a, . . . eyẹrẹ ọghọ dia ọ rẹ ohwo ro ruona-a; ẹkẹvuọvo ọke vẹ uphẹ ro di bru ayen ejobi cha.”—Aghwoghwo 9:11.

Kerẹ Annette, erhorha yen me gbe ighene buebun ẹgua. Igbeyan yẹrẹ ihwo rẹ orua yen gbe efa ẹgua. Ọke rẹ Natalie vwọ hẹ ẹgbukpe ihwe yen eghene ọfa rọ dia kẹrẹ vwo gbe ẹgua. Ọ tare nẹ, “Ẹsosuọ, me rhọnvwe vuẹ ohwo vuọvo-o, kidie oshọ mu we, oma je vo vwẹ.”

Ẹwẹn rẹ abe ji kpokpo Annette fikirẹ obo re phiare na. Ọ tare nẹ, “Ke me rhoma roro kpahen obo re phiare vwẹ ason yena. Mi rorori nẹ me ra je sa davwẹngba re me vwọ họnrọ jovwo. Jẹ vwọrẹ uyota, ọke rọ vwọ vwẹ aphia vwo duvwu ovwẹ nu, oshọ da rhe vọn oma mẹ. Mi rhe se ru emu ọvuọvo ọfa-a, ẹkẹvuọvo, mi rorori nẹ me ra je sa davwẹngba jovwo.”

Ẹwẹn rẹ abe ji kpokpo Natalie. Ọ tare nẹ, “Ofori nẹ me kerhọ jovwo. Ọsẹ vẹ oni mẹ jẹ urhi nẹ siẹrẹ avwanre da heha vwẹ otafe, e jẹ mẹvwẹ vẹ oniọvo mẹ rẹ ọmọtẹ rha dia kuẹgbe, ẹkẹvuọvo, me kerhọ-ọ. Ọtiọyena, ki mi roro nẹ mẹvwẹ yen vwẹ uphẹn kẹ ohwo rọ dia kẹrẹ avwanre na nẹ ọ kon ovwẹ oma. Obo re phiare na djobọte orua mẹ mamọ, mi ji roro nẹ mẹvwẹ yen sorọ. Ọyena yen tobọ ma da vwẹ.”

Ọ da dianẹ oka rẹ ẹwẹn ro rhe Annette vẹ Natalie na yen rhe we, gba karophiyọ nẹ ọ dia arogba yen wo vwo ruo-o, a gba wẹ ruo. Ihwo evo sa vwẹ ẹro otete vwo ni ota na womarẹ ayen vwọ tanẹ, ọyen obo ri shephiyọ rẹ ọmọshare vwo ru ọtiọyen yẹrẹ nẹ oborẹ ihwo ra gba du na guọnọre yen ayen mrẹre. Ẹkẹvuọvo, ofori nẹ a gba ohwo vuọvo du-u. Ọ da dianẹ wo she ro obọ rẹ ihwo tiọyen jovwo re, ọ dia owẹ yen sorọ-ọ!

Vwọrẹ uyota, ra vwọ ta ota na “ọ dia owẹ yen sorọ-ọ” lọhọre, ẹkẹvuọvo, ọ bẹn e vwo se ota na gbuyota. Evo rhọnvwe kpairoro vrẹ obo re phiare na-a, kẹ ayen rioja rẹ ẹwẹn rẹ abe vẹ iroro efa re chọre. Ẹkẹvuọvo, ono yen rioja rẹ iroro na, wẹ gbanẹ ohwo ro gbe we ẹgua na? Ofori nẹ wo roro kpahen orọnvwọn ọfa wo se ru.

Baibol na vuẹ avwanre nẹ ọke rẹ emiavwe rẹ Job vwọ gan mamọ, ọ da ta: “Ke me ta ota vwe evun rẹ ophu ro mu vwe djọghọ-djọghọ na!” (Job 10:1) Wọ je sa mrẹ erere siẹrẹ wo de ru ọtiọyen. Ra vwọ vuẹ ugbeyan ra vwẹroso sa nẹrhẹ wọ kpairoro vrẹ obo re phiare na, ọ je sa nẹrhẹ wọ mrẹ omafuvwe vwo nẹ iroro ro kpokpo owẹ na.

Annette mrẹre nẹ ota yena uyota. Ọ tare nẹ “Me vuẹ ugbeyan mẹ rọ kẹre ovwẹ mamọ, ọ da vuẹ wẹ nẹ me ta ota kẹ ekpako rehẹ ukoko mẹ. Oma vwerhen ovwẹ nẹ mi ru ọtiọyen. Ayen nene uvwe chidia ọke sansan, ayen da vuẹ vwẹ obo re me ghene guọnọ nyo. Ayen vuẹ vwẹ nẹ ọ dia mẹvwẹ yen so obo re phiare na-a.”

Natalie vuẹ ọsẹ vẹ oni rọyen kpahen obo re phiare na. Ọ tare nẹ, “Ayen bicha vwẹ, ayen vuẹ vwẹ nẹ mi dion phiyọ oma-a, ọyena nẹrhẹ me sa vrabọ rẹ ivun ro miovwo ovwẹ vẹ omaemuophiyọ.”

Natalie je mrẹ ẹnẹrhẹ vwo nẹ ẹrhovwo rhe. Natalie da ta, “Ẹrhovwo me nẹ rhe Ọghẹnẹ chọn vwẹ uko, ma rho, vwẹ ọke mi vwo roro nẹ me cha sa vuẹ ohwo vuọvo kpahọ-ọn. Ọke me da nẹrhovwo, ọyen me da sa ta obo rehẹ ẹwẹn mẹ. Ọ nẹrhẹ udu mẹ totọ, oma ji fu vwe.”

Wọ je sa riẹn nẹ o vwo “ọke re vwo sivwẹ.” (Aghwoghwo 3:3) Vwẹrote oma wẹn. Nabọ rovwonma. Ọ rọ ma rho, vwẹroso Jihova rọ dia Ọghẹnẹ rọ kẹ avwanre ufuoma.—2 Kọrẹnt 1:3, 4.

 Wọ da dia ọmọtẹ, ke kpokpo uwe nẹ wo vwobọ vwẹ uruemu rọ fọnro-o, ọ chọre-e siẹrẹ wọ da tanẹ, “Wọ davwọ-ọn!” yẹrẹ, “Siobọ nu vwe!” Wo jẹ oshọ mu we nẹ ọmọshare rọ kọnphiyọ owẹ na cha yanje owẹ vwo-o. Ọ da yanje owẹ vwo fikirẹ ọnana, kọyen o fo ohwo rọ rọvwọn owẹ-ẹ! Wọ guọnọ uvi rẹ ọshare, ọ ro che muọghọ kẹ ugboma kugbe iwan rẹ akpeyeren wẹn.

“Ọke rẹ me vwọ hẹ isikuru, emeshare na ki siẹ ọkparivie mẹ, ayen ta eta rẹ ehwẹjẹ kerẹ, mavọ yen o che yovwin te siẹrẹ mẹvwẹ vẹ owẹ de bru ehware.”—Coretta.

Wo rorori nẹ emeshare nana

1. Nene jehwẹ?

2. Nene frẹfrẹ?

3. Guọnọ gbe ẹgua?

“Vwevunrẹ imoto, ọmọshare ọvo kọ ta erharhe rẹ eta kẹ vwẹ, je yọnrọn ovwẹ. Me da fa obọ rọyen kufia, je vuẹ nẹ o bioma. Ko ni vwe kerẹsiẹ a da mrẹ nẹ mẹvwẹ ẹkpa.”—Candice.

Die yen wo rorori nẹ ọmọshare nana ruẹ kpahen Candice na?

1. Nene jehwẹ?

2. Nene frẹfrẹ?

3. Guọnọ gbe ẹgua?

“Ukpe rọ wanre na, kọke kọke yen ọmọshare ọvo vwọ vuẹ vwẹ nẹ o vwo ẹguọnọ mẹ, ọ je guọnọ kọnphiyọ ovwẹ, dede nẹ ọkieje yen me vwọ vuẹ nẹ ẹjo. Ọkiọvo, ọ vwẹ obo ghworo obọ mẹ, me da vuẹ nẹ ọ dobọji, ẹkẹvuọvo, ọ davwerhọ-ọn. Ọke rẹ mi vwo kuẹ isabatu mẹ phiyọ, ọ da vwẹ obọ fa ikebe mẹ.”—Bethany.

Vwọ kẹ wẹ, ọmọshare nana:

1. Nene jehwẹ?

2. Nene frẹfrẹ?

3. Guọnọ gbe ẹgua?

Ẹkpahọnphiyọ rọ gbare vwọ kẹ enọ na eje yen 3.

Diesorọ a vwọ guọnọ gbe ohwo ẹgua vwọ fẹnẹ a vwọ frẹfrẹ yẹrẹ e vwo nene ohwo jehwẹ?

Ra vwọ guọnọ gbe ohwo ẹgua, obọ rẹ ohwo ọvo yen o nẹ cha, a da tobọ vuẹ ohwo na nẹ ọ dobọji, ọ rhọnvwa-a.

Uruemu ra vwọ guọnọ gbe ohwo ẹgua brare mamọ. Ọ sa nẹrhẹ a gba ohwo du.