Baziaboro azi degude nga Annette ki ba ri kusande mbata fu ri ini gupai naamanga. Ri aya: “Mi aasadi ai gupai ka mi mangihe tipa ka ko kodinga ba na mi ya. Mi aasadi ka ta ngbare, ono ka fugore akuranga ya. Mi ki siko ko, ki naki ko, na ki votoko ko. Na ni yangaraha, mi abi gupai nga sape narimo tire. Omere abati mi ki zezere.”

Ka singia mo du naadu rogo gu ngbatungapai re, ginipai ka mo amangihe?

Mo mbakadi tiro ki du na rugatise ho mo ayera ni yuru mbiko gbegberẽpai ima rengba ka manga. Baibiri naya: “Mosoro ho fu gu ni naora ni ipo te irisa fu tatamana aboro a te; ono rago gbia kuti mamu namanga fu yo dũ.”—Batungusipai 9:11.

Kura paranga aboro kinaho wa Annette ainongo agu aboro nakodiba na yo ngbaome ya. Agu akurayo kinaho agu aboro i naima inoyo watadu boro dagba gayo aborokporo yo akodiba na yo ngbaome. Ho garã Nataria adu ni bawe, paranga nga gayo murakporo akodiba na ri ngbaome. Fugori nga: “Mi aima gunde ni kerehe na zee kini zi re ka mi aidanga ka pehe fu boro ya.”

Annette nabira tiri kindi mbiko gupai namangi re. Sangbari nga: “Pa gu yuru re nake rire yo kindi ti aregbo dũ. Mi naberãha nga ka mi asovura aso na ko berewe nyanyaki ti gu mi amangihe re. Ono gu rengo du nga, ho ko arũ re ni na sape, mi aima zezera be gunde. Pai ho mi arengbe ka mangaha berewe te, ono mi nabihe nga ka mi aˈasadi aˈasada nyanyaki berewe gbe.”

Nataria nabira tiri kinawo a. Sangbari nga: “Si aaidanga mi du na bakere kido kuti gu paranga re wa gure te. Avungure aima rũ ndiko nga ho ani akura ni kusayo na tamere ka ngi mbaro, si naida ani du rogo ba sa na ri, ono mi aagianga sangbayo te. Mi nabihe nga mi du nafu momu fu gu paranga re ko gberesi pare. Gupai namangi re aima fuda gimi aborokporo ni kerehe, na mi nabihe nga mi du naye na ni. Si nga gupai nafuda re kisusi.”

Ka apai du tipa ro wa ga Annette watadu Nataria, gu bambatapai si aida mo tingidihe nga, gu boro i azio ní azio ngbaome ka kodaba na ní, anga ní du idihe te. Kura aboro rengbe ka sa gupai re si duwa taatapai ni gumbayo gupai nga sino akumbagude du gbua nga ka mangapai wa gure watadu gu boro i akodiba na ní re du nasanahe tipaha. Ono boro ho rẽ i kodiba na ní ngbaome te. Ka si du nga i azi ro azio ngbaome ka kodaba na mo, ka i biranga ro te!

Ono ka boro vura ino aino nga i azi ní azio ka kodaba na ní, si taata si he fuda ní te. Kura aboro nanye na gupai namangiyo yo re zanga gumbaha fu boro. Ono ka mo ongo aonga na ni, da si nika undo ní, mo watadu gu boro namangi ro ngbaome re?

Baibiri nape gupai furani nga, ho gu ruru kumba nangia Eyobo adu ni rogo bakere imisiri, ko aya: “Mi afu rogo gu nirãnirãpai du torore yo.” (Eyobo 10:1) Mo rengbe arengba ka gbia undo ka mo mangihe wo a. Ka mo pehe fu gu ngangarã boro mo akido akido kuti ní, si rengbe ka undoro mo rugutiro wenengai na pa gupai namangi na mo ki gbia zereda be gupai nafuda ro re.

Gure nga gupai Annette amangihe. Fugori nga: “Mi afura fu bawene nakureami sa, na ri aya fere mi pehe fu bete abaakumba rogo dungurati. Mi na ngbarago nga mi amangihe wo. I asungu na mi bara dunguhe na ki gumba kina boro gupai mi aaida ka giaha. I aya fere gupai namangi re gi ingahe nangiaha te. Gu ho nangia gi ingahe te.”

Nataria ape gupai namangi ri fu avunguri. Fugori nga: “I asongodi re. I angarasi re mi fura tipaha, na gure naundo re ka mi dunga na bakere gberãrago gbiati zinga kpotoreyo ya.”

Nataria agbia wasa mbiko kparakpee. “Fura fu Mbori aima undore, gbe ti gu regbo mi abihe nga ka mi pekenga agu apai namangi re fu boro te. Ho mi akpara ni fu Yekova, mi nafura wenengai. Si nafu ndikidi zereda fere.”

Mo rengbe arengba ka ino gupai a nga “rago husa” kina ti ni. (Batungusipai 3:3) Mo mbu berã kina kurii gupai namangi ro re, ono mo niberẽkurii kura weneapai. Mo niongodi wenengai. Na gu susi gbe nga, mo fu tiro ku be Mbori wasa, nga Yekova.—2 AKorindo 1:3, 4.

Ka mo ngia degude nambakada pa rogatise na paranga ono ko kini sosodi ro oni mangi gupai arunga mangaha mbata fu rogatise ya, mo rengbe arengba ka fura nyanyaki ki ya, “Ka mo mbedinga na mi ya!” watadu, “Mo di bero tire!” Ka mo gundenga nga ka mo pehe wo fuko mo nika zanga ko ya. Ka ko kati na mo mbiko gipai re, gure nga ko nga gu kumba si aida mo diko te! Si naida mo di ndikidi kumba, nga guko nairiso kpotoro na gamo arugute.

Koreta aya: “Ho mi adu ni sukuru yo, aparanga anaagbefa gimi sitiani kini gumba ngbatunga agu apai nga, ka mi kodiba na yo mi duadu na ngbarago.”

Ya mo mo naberãha nga agu aparanga re

1. Aangi mbaro na ri?

2. Aaba nyemuyo ti ri?

3. Aafuda ri na pa kodaba?

Candice aya: “Ho mi adu ni rogo tarambiri, kura paranga sa atona kaa gumba pa kodaba fere, na ki dungo re. Mi asiko beko kusayo na ki ya fuko ko gbisi kusayo. Ko ki bi re wa gu boro arunga rini yo ya.”

Ginipai mo aberãha nga gi paranga re aamanga Candice na ni?

1. Ko aangi mbaro na ri?

2. Ko aaba nyemuko ti ri?

3. Ko aafuda ri na pa kodaba?

Bethany aya: “Rogo gu garã nasusi, paranga sa anaape gupai fere dedede nga mi ima ngbatiko na ko naida ani merẽ na ko, wa mi avura kaa ya fuko mi aidanga ha te vurũ. Ti kura aregbo, ko anaakofĩa bere. Mi anizingi kutiko ono ka ko aidanga ka mbuhe ya. Fuoho, ho mi anugo ni ka vo gi giri rakata rogo kura uru, ko anarĩ rumbure.”

Mo nabihe nga gi paranga re:

1. Aangi mbaro na ri?

2. Aaba nyemuko ti ri?

3. Aafuda ri na pa kodaba?

Gu ruru karagapai du tipa agu asanahe re dunduko nga namba 3.

Gini kparakparapai du dagba fuda boro na pa kodaba na kungbo ngi mbaro na boro watadu ba nyemuro ti boro?

Fuda boro na pa kodaba naye be bangisa boro. Na si rengbe kaa ndu kindi kumbatayo ka kura boro re vura ká gupai re vurũ.

Fuda boro na pa kodaba nga kerepai. Si ima rengba ka sa boro ní mangi kodaba ngbaome.