Mo susu si fɔfɔɛ nɛ ɔ he nɛ o hyɛ: David ngɛ lɔle hɛɛe nɛ e na kaa he nɛ e su ɔ, e li lejɛ ɔ. Blɔ tsɔɔmi okadihi kɛ níhi nɛ e ngɛ nae ngɛ blɔ ɔ he ɔ, ha nɛ e na kaa e laa. Eko ɔ, e tla blɔ.

Ke mo ji David ɔ, mɛni o maa pee?

Níhi fuu ngɛ nɛ o ma nyɛ maa pee:

1. A. O ma nyɛ ma bi nɔ ko nɛ e tsɔɔ mo blɔ.

2. B. O ma nyɛ maa hyɛ zugba he foni nɔ, aloo o kɛ GPS nɛ tsu ní.

3. D. O ma nyɛ maa ya o hɛ mi kɛ susumi kaa o ma ya je kpo ngɛ he ko nɛ o le.

E ngɛ heii kaa eko ɔ, nihi bɔɔ ko pɛ nɛ a kɛ ga womi nɛ ji D ɔ ma tsu ní.

Ga womi nɛ ji B ɔ hi pe kekle ga womi ɔ. Zugba he foni aloo GPS ɔ maa hi o dɛ be fɛɛ be ngɛ o blɔ hiami ɔ mi, nɛ e maa tsɔɔ mo blɔ.

Jã kɛ̃ nɛ Baiblo ɔ ma nyɛ maa ye bua mo!

Womi nɛ a jua ha nihi pe womihi tsuo ɔ ma nyɛ

• maa ye bua mo kɛ tsu nyagbahi nɛ o kɛ kpeɔ ɔ a he ní

• maa ye bua mo nɛ́ o le bɔ nɛ o ngɛ ha, nɛ e ma nyɛ ma ha nɛ o pee nɔmlɔ kpakpa hulɔ

• maa tsɔɔ mo níhi nɛ ke o peeɔ ɔ, o si himi maa pee kpakpa

Ke wa bɔni munyu tumi pɛ ɔ, wa biɔ sanehi.

• Mɛni he je nɛ hiɔwe ɔ ngɛ bluu?

• Mɛni a kɛ pee dodoe ɔmɛ?

Pee se ɔ, wa biɔ sanehi kɛ kɔɔ níhi nɛ yaa nɔ ngɛ je ɔ mi ɔ a he.

• Mɛni he je nɛ haomihi baa nihi a nɔ?

• Mɛni he je nɛ nihi gboɔ?

Ke sane bimi nɛ ɔmɛ a heto ngɛ Baiblo ɔ mi hu nɛɛ?

Nihi fuu deɔ ke nyaziahi sɔuu lɛ ngɛ Baiblo ɔ mi. Ni komɛ deɔ ke Baiblo ɔ be be, nɛ ni komɛ hu ke Baiblo ɔ sisi numi yee. Se jã ji bɔ nɛ Baiblo ɔ ngɛ niinɛ lo, aloo jã ji bɔ nɛ nihi nuɔ kaa nihi deɔ ngɛ Baiblo ɔ he? Anɛ pi nɛ a ngɛ mɛ sisie lo?

Kaa nɔ hyɛmi nɔ́ ɔ, nihi susu kaa Baiblo ɔ tsɔɔ kaa Mawu nɛ ngɛ je ɔ kudɔe. Se anɛ e ji anɔkuale lo? Je ɔ puɛ kulaa! Haomihi kɛ nɔ́ nami, hiɔ kɛ gbenɔ, ohia kɛ oslaahi hyi lɛ tɔ. Anɛ Mawu nɛ ngɛ suɔmi lɛ ha nɛ ní nɛ ɔmɛ tsuo ngɛ bae ɔ lo?

Anɛ o suɔ kaa o maa le sane bimi nɛ ɔ heto lo? Ke o ba le nɔ́ nɛ Baiblo ɔ de ɔ, e maa pee mo nyakpɛ!

Eko ɔ, o yɔse kaa ga womihi nɛ a kɛ ha ngɛ womiyo nɛ ɔ mi ɔ je Baiblo ɔ mi. Yehowa Odasefohi he ye kaa Baiblo ɔ ma nyɛ maa tsɔɔ mɛ blɔ nɛ da. Ejakaa “Mawu mumi ɔ lɛ ha nɛ nihi ngma; nɛ e hi kɛ ha ní tsɔɔmi, kɛ ha hɛ mi kami, kɛ ha nɔ dlami.” (2 Timoteo 3:16, 17) E ngɛ mi kaa Baiblo ɔ se kɛ mohu lɛɛ, se e be bi, enɛ ɔ he ɔ, e sa nɛ mo nitsɛ o kase!