Kepar lembe mae: David ubewotho uthieno ikind pacu moko kinde ma piny ucido bii. Calu ma piny ucido, David ukwanyu yo mange m’uweko yo ma cuu. E epoi nia erwinyo. Ecicopere nia David uweko dhu yo ma nwang’u copo tere kaka m’ebecidho i ie.

Ka nwang’u itie David, nwang’u icopo timo ang’o?

Lembe tie dupa m’icopo ng’iyo nitimo:

1. 1. Nipenjo junyuth iri yo m’ikwany.

2. 2. Nitio ku torci pi nisayu yoje.

3. 3. Nimediri asu ku wotho nia ibinwang’u dhu yo m’ibesayu.

Ning’iyo lembe mir C utie ber ungo.

Ning’iyo lembe mir B utie ber nikadhu mi kwong’o, pilembe ibimaku torci i cingi man ebikonyi pi nimenyo yo saa m’ibewotho.

Biblia de copo nikonyi kumeno!

Buku maeno m’unyai lee copo

• nitelo wii kinde m’ibenweng’iri ku peko i kwo peri

• nikonyi kara ing’eiri giri man ibed dhanu maber akeca

• ninyutho iri lembe m’icopo nitimo kara ibed ku kwo maber m’usagu zoo

Niai ma wang’eyo niweco, wabed wapenjo penji.

• Pirang’o rangi pa polo utie ble?

• Ang’o m’uketho nyikaluku berieny?

Ing’eye, wacaku nipenjo penji iwi lembe m’ubetimere iwi ng’om.

• Pirang’o lembe mareco ubetimere?

• Pirang’o dhanu ubetho?

Icopo yero ang’o kan inwang’u nia dwokowang’ penji maeno utie i Biblia niai con?

Dhanu dupa giwacu nia Biblia upong’ ku lemb’uda mi vupo, nia kakare udaru kadhu, kunoke nia nyang’ i ie tie tek. Nyo lembe ma giyero eno utie lemandha? Nyo lembe ma jukoro igi iwi Biblia re m’uketho giyero kumeno, kunoke nyo juwondogi awonda?

Ku lapor, dhanu giparu nia Biblia uwacu nia Mungu re m’ubebimo wi ng’om. Nyo eno utie lemandha? Ng’om maeni utie rac akeca! Epong’ ku litho, masendi, remokum, tho, can, man peko ma wok rek. Nyo andha Mungu ma jamer copo nyayu peko maeno?

Nyo imaru inwang’ dwokowang’ penji maeno? Lembe ma Biblia ukoro iwi ng’atu m’ubebimo wi ng’om copo wang’u ii!

Saa moko nyo inwang’u nia, juk ma nwang’ere i nyathibuku maeni ujengere iwi Biblia. Jumulembe pa Yehova ging’eyo nia Biblia kende re ma copo nimio telowic mandha. Eno ke pilembe ‘Mungu uyuyo i wie en, man ke kulokane nuti mi ponji, mi nyuth ma junyutho ko dubo, ku mi twiny ma jutwinyo kojo de.’ (2 Timoteo 3:16, 17) Icopo somo in giri buku maeno ma con, ma re fodi utie ku kony asu tin eni!