Akham amuytʼañäni: David waynajj autopat sarkasajja, jan uñtʼat callenaka, jan uñtʼat utanakwa uñji, ukhakiw yaqha cheqar sarjjatap amuyasi. Inas sarkasin yaqha thakinjam sarawayjjchïna, jupajj janiw uk amuyaskpachänti.

Jumatï David waynäsma ukhajja, ¿kuns lurasma?

Akanakwa lurasma:

1. Mayniruw jisktʼasisma.

2. Mapa jan ukajj GPS sasin uñtʼatäki ukwa uñjjattʼasisma.

3. Puriskäwa sasin autot saraskakismawa.

Jan sum yatisa autot saraskakisma ukhajja, jukʼampiw chhaqjjasma.

Ukat maynir jisktʼasiñat sipansa, mapa jan ukajj GPS sasin uñtʼatäki uk uñjjattʼasis sarasma ukaw jukʼamp askïspajja.

Bibliajj ukhamarakiw suma amtanakar puriñatak yanaptʼiristamjja.

Bibliajj aka toqenakanwa yanaptʼiristamjja:

• Jan waltʼäwinakan uñjasisma ukhajj amuytʼayiristamwa.

• Juma pachpa sum uñtʼasiñamatakisa, suma jaqëñamatakis yanaptʼiristamwa.

• Kunjamatsa kusisit jakasisma uksa yaticharakiristamwa.

Parlañ yateqktan ukhatpachwa akham jisktʼasiñ yattanjja:

• ¿Khitis alajjpach lurawayi?

• ¿Warawaranakajj kunat luratäpjjesa?

Tiempompejj akhamwa jisktʼasjjaraktan:

• ¿Kunatsa jan walinakajj utjpacha?

• ¿Kunatsa jiwañajj utji?

Bibliaw uka jisktʼanakar qhanañchi uk ¿yatiyätati?

Ukampis walja jaqenakajj akham sapjjewa: “Kʼari cuentonakakiw Biblian utji, nayra librowa jan ukajj jan amuytʼkay librowa” sasa. Kuntï Bibliat sapki ukajj ¿cheqapunïpachati? ¿Jaqenakakich ukham amuyasajj pantjasipjjpacha?

Amuytʼañataki, ‘Diosaw aka Oraq apnaqe’ sasaw jaqenakajj sapjje. Ukampis ukajj ¿cheqäpachati? Aka oraqenjja, jan walinakakiw utjaski. Taqe cheqansa tʼaqhesiñanakakiw utji, taqeniw usuntapjje ukat jiwapjjaraki. Waljaniw kunayman jan waltʼäwinakan uñjasipjje ukat pisinwa jakasipjjaraki. ¿Wali munasir Diosajj ukanak utjayaspati?

Khitis aka Oraq apnaqpacha uk ¿yatiñ munasmati? Kuntï Bibliajj uka toqet qhanañchki ukajj muspharkañawa.

Aka qellqatan ewjjtʼanakapajj Bibliarjam apstʼatätapjja, amuypachätawa. ‘Bibliajj cheqapuniw yanaptʼistaspa’ sasaw Jehová Diosan Testigonakapajj amuyapjje. ¿Kunatsa? ‘Taqe Qellqatasti Diosan amuytʼayatawa, askirakiw yatichañataki, ukhamarak cheqañchañataki’ (2 Timoteo 3:16, 17). Bibliajj nayra tiempons qellqaskchïnjja, jichhürunakans yanaptʼaskakistuwa.