Hégda le jam lini: David a yé luk litôa i homa mam momasôna ma yé nye nkén. Biyimbne ni mabam a ntehe i pañ loñ, bi ñunda nye le a mbéna bé ke mu njel i. David a nléba le a nimil. I mpôôna le a nyoñ béba njel mu liké jé.

Ibale wen u bak David, ki u mboñ lelaa?

U nla gwélél ngandak manjel:

1. U nla bat le bôt ba éba we njel u nlama noñ.

2. U nla béñge lipep li ñéba minloñ, tole gwélél GPS.

3. U nla kida u nluk litôa, u hémlege le w’a léba loñge njel ni wemede.

I yé mbale le njel 3 yon i ta bé ilam ngandak.

Ndi njel 2 i yé ilam iloo njel 1 inyule u nla bana lipep li ñéba minloñ mu liké joñ, li nla ki hôla we i yimbe loñge njel u nlama noñ.

Hala nyen yak Bibel i nla hôla we!

Bibel i yé kaat i bisu bôt ba nsomb. I nla

• niiga we lelaa u nla nihbe mandutu u nkôhna mu niñ yoñ

• hôla we i yi wemede, ni i kônde yila loñge mut

• unda we lelaa u nla bana bañga niñ kiyaga

Ngéda di mbôdôl yi hop, di mbat mambadga.

• Inyuki ngii i nene blum blum?

• Inyuki tjôdôt di mbai?

I mbus, di mbôdôl bat mambadga inyu mam di ntehe munu nkoñ isi.

• Inyuki mam mabe ma yéne?

• Inyuki bôt ba nwo?

Ndi baa mandimbhe inyu mambadga mana ma ta bé ntilbaga ikété Bibel ibôdôl behee?

Ngandak bôt i nkal le Bibel i yé nyonok ni bindéé ni dingaana, hala wee i ntagbe ngéda, tole i nlet ngandak i nok. Ndi baa njom i yé i Bibel? Baa bañga njom i nlôl bé ni mam bôt ba nok bape ba mpot inyu Bibel? Baa ba ntembene bé bôt ba?

Kii héga, bôt ba nhoñol le Bibel i nkal le Djob nyen a ñénél nkoñ isi unu. Ndi lelaa hala a nla bôña? Nkoñ isi unu u yé ikété lisanda likeñi! U nlôôha ni njôghe, ni mandutu, ni makon, ni nyemb, ni liyep, ni bikuu bikeñi. Lelaa Djob li gwéha li nla ba njom i mam mana momasôna?

Baa u nsômbôl yi ndimbhe? Jam Bibel i nkal inyu mut a nkena nkoñ isi li nla hélés we!

Bebeg le u nyimbe le maéba ma ma yé munu man kaat nunu ma nyôñna ikété Bibel. Mbôgi Yéhôva i yé nkwoog nkaa le di nla bôdôl Bibel ñem inyu maéba mé. Di nla ki bana i botñem i, inyule Bibel “i nlôl ni Nyambe, i mbahal, inyule i nti maéba, i yoiyak, i béhge.” (2 Timôtéô 3:16, 17) Inyu loñge yoñ wemede, u nlama wan ini kaat i i bi tilba behee—ndi i ngi yii nseñ—inyu dilo tjés!