Sa kun yɛ: Davidi su cisan loto nun. Lika nga w’a ju lɛ’n, ɔ siman lɔ laa. Kɛ ɔ nian ninnge nga be tali be akpɔ’m be nuan mɔ be kle atin’n, ɔ wun kɛ w’a mlin.

?Sɛ ɔ ti wɔ’n, ngue yɛ á yó ɔ?

Like nga a kwla yo’n:

1. A kwla se sran wie kɛ ɔ kle wɔ atin’n.

2. Sɛ be jajali lika’n i fluwa kun su’n, a kwla nian su.

3. A kwla se kɛ á kɔ́ ɔ ɲrun naan kannzɛ ɔ yo sɛ’n á fíte atin kpa’n su.

Ajalɛ kasiɛnfuɛ’n yɛ ɔ ti be nun tɛfuɛ’n niɔn.

Sɛ a fa ajalɛ’n i nɲɔn su’n, ɔ́ yó kpa mán wɔ trá ajalɛ kliklifuɛ’n. Afin, be jajali lika’n i fluwa su. Yɛ a kwla nian su tikatika naan w’a mlinman.

I wafa kunngba’n, Ɲanmiɛn nuan ndɛ’n m’ɔ o Biblu’n nun’n, ɔ kwla yo wɔ ye.

Fluwa sɔ m’ɔ leman wunsu’n,

• ɔ kwla kle wɔ ngwlɛlɛ naan w’a wun sa’m be trawlɛ.

• ɔ kwla tike ɔ ɲin naan w’a si ɔ wun kpa, naan w’a kaci ɔ nzuɛn’n.

• ɔ kwla kle wɔ like ng’ɔ fata kɛ a yo naan ɔ liɛ w’a yo ye’n.

Kɛ e ko si ijɔ cɛ’n, nn y’a bo kosan usalɛ bo.

• ?Ngue ti yɛ ɲanmiɛn su lɔ’n ti ble ɔ?

• ?Ngue ti yɛ nzraama’m be kpaja ɔ?

Kɛ e yo kaklaka’n, e usa kosan wie mun ekun.

• ?Ngue ti yɛ sa tɛtɛ’m be ju ɔ?

• ?Ngue ti yɛ sran’m be wu ɔ?

?Yɛ sɛ Biblu’n w’a dun mmua tɛ kosan sɔ’m be su’n nin?

Sran sunman be se kɛ Biblu’n nun ndɛ’n ti ngua. Annzɛ ɔ ti lalafuɛ ndɛ naan i wlɛ wunlɛ’n ti kekle. ?Sanngɛ, ɔ ti sɔ sakpa? ?Annzɛ Biblu’n i wun akunndan nga sran’m be bu’n yɛ ɔ timan su ɔ? ?Annzɛ kusu’n, ato ndɛ yɛ be fali su ɔ?

Sran wie’m be bu i kɛ Biblu’n se kɛ Ɲanmiɛn yɛ ɔ sie mɛn’n niɔn. ?Sanngɛ, i sɔ’n ti nanwlɛ? Mɛn’n w’a tɔ nvati. Afɛ’n nin ɲrɛnnɛn’n, nin tukpacɛ’n nin wie’n, ɔ nin yalɛ dilɛ’n nin sa kekleekle’m b’a yi i piɛ. ?Ɲanmiɛn m’ɔ ti sran klofuɛ’n, ɔ kwla fɛ i sɔ sa mun yi i sran’m be su?

?A kunndɛ kɛ á sí kosan sɔ’n i su tɛlɛ’n? Wafa nga Biblu’n tɛ su’n, ɔ kwla bo wɔ nuan.

Kɔlɛ a sieli i nzɔliɛ kɛ fluwa nga nun afɔtuɛ’m be fin Biblu’n nun. Zoova i Lalofuɛ’m be lafi su kɛ ndɛ nga Biblu’n kan’n, ɔ kwla yo sran ye dan. Afin, ɔ ti Ɲanmiɛn i nuan ndɛ. Yɛ “be fa kle like, be fa kle sran mun lele be wun nanwlɛ’n, be fa tu be fɔ, be fa kle be sa nga be yo-ɔ ɔ ti kpa’n.” (2 Timote 3:16, 17) Biblu’n o lɛ w’a cɛ kpa. Sanngɛ, i nun ndɛ’n ti e blɛ sufuɛ’m be liɛ wie. Kanngan nun nian.