Ghee igiemwi na ghee: E Devid fi imọto khian vbe eke nọ ma rẹn ẹdẹ. Eni idunmwu nọ rre esanbọd nọ bẹghe i re eke nọ te khẹke nọ gha ye. E Devid na do bẹghe ẹre wẹẹ te irẹn wa wii na. Egbọre ọ mwẹ eke ne ọ na ba odẹ ku.

Adeghẹ uwẹ ọre Devid, de emwi ne uwẹ gha te ru?

Emwi bun ne u gha sẹtin ru:

1. Tama ọmwa nọ gie odẹ ma ruẹ.

2. Ghee emapu ra GPS.

3. Ye gha fi imọto khian, egbọre u gha domian sẹ eke ne u rrie.

Ọ dewuarorua wẹẹ nogieha ma zẹdẹ deyọ.

Nogieva ẹre ọ maan sẹ nokaro. A gha gele wẹẹ ne a ghee ẹre, u gha sẹtin gha ghee emapu ra GPS khian, u ke ya sẹ eke ne u rrie.

Egbe odẹ vberriọ ẹre Baibol khian vbe ya ru iyobọ nuẹ!

E Baibol nọre ebe nọ ghi kpọ sẹ, gha sẹtin

• dia ruẹ vbuwe ọlọghọmwa nọ rhirhi gha khin ne u werriẹ aro daa

• ru iyobọ nuẹ ya rẹn aro ọmwa ne u khin kevbe ne u ya khian ọmwa nọ rẹn enegbe

• giẹre ma ruẹ ighẹ arrọọ nọ ghi maan sẹ

Ma gha wa suẹn gha guan nẹ zẹvbe ọmobọ, ẹghẹ nii ẹre ima ke nọ ọta.

• Vbọsiẹ ne iso na mwẹ egbe ona vbenia?

• De ọmwa nọ yi avbe orhọnmwẹ?

Ma gha ghi wan nẹ, ma ghi do gha nọ ọta ni dekaan emwi ni sunu vbe agbọn.

• Vbọsiẹ ne emwi dan na sunu?

• Vbọsiẹ ne emwa na wulo?

Adeghẹ ewanniẹ ọnrẹn rre uwu e Baibol ke otọ gha dee ghi vbo?

Emwa nibun keghi kha wẹẹ okha ọghe ohoghe ẹre ọ gba e Baibol, emwa vbe kha wẹẹ ai ghi loo ẹre kevbe wẹẹ, ọ lọghọ na rẹn otọre. Ebe nẹi gia loo ẹre Baibol gele khin ra, ra iziro ọghe emwa ni ya aro vberriọ ghee ẹre, ẹre ọ ma gba? Ra obọ emwa ni rhaan otọre ma iran ẹre ọ ye?

Vbe igiemwi, emwa keghi roro wẹẹ e Baibol khare wẹẹ Osanobua ẹre ọ kha yan agbọn na. Sokpan vbọ ya re Osanobua hẹ? Agbọn na wa lighua! Ọ vuọn ne obalọ kevbe usẹ, emianmwẹ kevbe uwu, ogue kevbe oguomirẹ. Vbe Osanobua nọ mwẹ ahoẹmwọmwa khian gha mwẹ obọ vbe ena hia hẹ?

Uwẹ gha hoo ne u rẹn ewanniẹ ọghe avbe inọta na ra? Ọmwa ne Baibol khare wẹẹ ọ kha yan agbọn na sẹtin kpa ruẹ odin!

Egbọre u yẹrẹro nẹ wẹẹ, ẹmwẹ ibude ni rre ebe ẹmu na keghi hẹnhẹn egbe yan e Baibol. Avbe Osẹe Jehova wa yaeyi wẹẹ ibude kevbe adia nọ rre Baibol keghi re nọ gia hẹnhẹn egbe yan. Evbọ ya iran yaeyi ọre wẹẹ, “Osanobua ọre ọ rhie ẹre ye iran ekhọe ighẹ emwa ni gbẹnnẹ avbe Ebe nii hia, ọ keghi vbe re emwi esiesi ne a ya ma emwa emwi ẹmwata ni, ne a ya gbe ọmwa hin ọkhọ rre, ne a ya rhie emwi ne a ma ru ẹse ye vbe ne ọ te kei yi.” (2 Timoti 3:16, 17) Ọ keghi bi yọ ruẹ egbe ne u zanzan e Baibol ghee. Agharhemiẹn wẹẹ ẹghẹ nẹdẹ ere a gbọẹn, te ọ wa yevbe na ghee ebe na gbẹn vbe ẹghẹ ne ima ye na!