Tame fase jame di: David a wulu nlam éziñ e zañ alu. Mbôle dibi é ne, a kôme ke yene zen. Éyoñe te a teme na, a jañeya. A te yiane kobe zene vôm éziñ nté a mbe a wulu.

Nge wo ô mbe ô tele été David, ô nga ye bo aya?

Ô ne tyi’i na wo bo jame da ya mame ma:

1. Ô ne sili môte zene fé wo yiane nyoñ.

2. Ô ne belan ômes.

3. Ô ne kee dulu dôé ôsu, a tabe ndi na wo ye su’ulane yene zene jôé.

Nge wo tu’a fas, ô ne yene na jame lale (C), é nji bo di ya top.

Jame baa (B) e ne mvo’é a dañe di ôsu. Amu, nge ô bili ômes, wo ye faé wo éfufube nté wo ye wulu, asu na ô yene vôme wo ke.

Avale te da da, Kalate Zambe a ne volô wo.

Abui bôt é yeneya de; Kalate Zambe a ne ngule ya

• liti wo aval avé ô ne dañe minju’u ya ényiñ

• volô wo na ô yem avale môt ô né, a na, ô bi mbamba mefulu

• liti wo aval avé ô ne bi ényiñe ja dañe mvaé

Nane bia yeme kobô, bia taté fe na bia sili minsili.

• Amu jé yôp é ne nyule blum?

• Be nga kôm atété ya yôp a jé?

Éyoñe bia yaé, bi nga sili minsili a lat a mam bia yen me boba’an émo.

• Amu jé bia tôbane mbia be mam?

• Amu jé bôte ba wu?

Nge é bo ke na, nté ôsese’e wu, biyalane bite bi ne e Kalate Zambe?

Bôt abui ba nye’e ba jô na, Kalate Zambe a ne njalan a befe’e, a kañete minsos, na a keya abo si, nge ke na, a ne ayaé ya wôk. Ve ye Kalate Zambe nnye a ne ajô? Ye é nji bo mbia ñwô’ane bôte ba wô’ô Kalate Zambe ñwô ô ne ajô? Ye a ne bo na be nga du’u be?

Éve’ane ji, bôt ba buni na Kalate Zambe a jô na, Zambe nnye a jôé émo ji. Ye jam ete é ne fo’o nalé? Si nyô é ne ne zametan zametan! É ne njalan a mintaé, minjuk, akon a awu, azoé a bibubua bi mam. Nde be ne kôme ve Zambe ya nye’an ayeme ya mam mete mese aya?

Ye wo kômbô yem éyalane ya nsili ôte? Éyalane Kalate Zambe a ve ajô te é ne bo na ô ku avem!

Wo te yiane yene na, melebe mese ya nsoé kalate wu ma so e Kalate Zambe. Bengaa be Yéhôva ba buni na Kalate Zambe a ne mbamba nliti zen. Nalé a boban amu na, Kalate Zambe a ne “nsôane be Zambe, [a] ne fe mvolan mfa’a ya nsôane bôte zôsô, mfa’a ya yale bôt ñyalan ô ne mame ya zôsô été.” (2 Timothée 3:16, 17) Wo fe wo yiane yé’é Kalate ate, amu, akusa bo a tilibaneya ayap, a ngenane mfi den.