Miiri k’a filɛ: Dawuda be tagara dugudennin dɔ la sufɛ. Komi suu kora, a m’a lɔn a be yɔrɔ min na. O wagati le la a y’a faamu ko a tununa. N’a sɔrɔ a filila sira ma le.

Ni ele lo tun ye Dawuda ye, i tun bena mun lo kɛ do?

Fɛɛrɛ caaman b’i fɛ:

1. I be se ka ɲiningali kɛ.

2. I be se ka tɔrɔsi mana.

3. I be se ka to ka taga ani k’a miiri ko i bena i ka sira sɔrɔ.

Tiɲɛn na, fɛɛrɛ sabanan kɔni man fisa.

Fɛɛrɛ filanan ka fisa ni fɔlɔ ye. Mun na do? Sabu i ka tagama bɛɛ la ni tɔrɔsi b’i bolo, a bena se ka yeelen bɔ i ye sira kan.

Bibulu be se k’i dɛmɛ o cogo kelen na!

Gafe si ma jɛnsɛn ka se Bibulu ma ani a be se k’i dɛmɛ:

• k’i ka gwɛlɛyaw ɲɛnabɔ

• i k’i yɛrɛ lɔn ani k’i sɔɔn fisaya

• ka ɲɛnamaya kɛ cogo fisaman na

An mana kumacogo lɔn dɔrɔn, an b’a daminɛ ka ɲiningali kɛ.

• Tile be taga min sufɛ?

• Lolow dilanna ni mun lo ye?

Kɔfɛ, an b’a daminɛ k’an yɛrɛ ɲininga duniɲa ka koow la.

• Mun na koo juguw be kɛ?

• Mun na mɔgɔ be sa?

Nka, n’a fɔra i ye k’o ɲiningaliw jaabiliw be sɔrɔ Bibulu kɔnɔ kabi wagatijan do?

Mɔgɔ caaman b’a fɔ ko nsiirinw ni maanaw lo fanin be Bibulu kɔnɔ, ko a sanga benna, wala ko a faamuyali ka gwɛlɛ kojugu. Yala o miiriyaw tilennin lo tiɲɛn tiɲɛn na wa? Mɔgɔw be min miiri Bibulu koo la, o lo bɛnnin tɛ wala u ma tiɲɛn fɔ u ye Bibulu koo la?

Ɲɛyirali fɛ, mɔgɔw ka miiriya la, Bibulu b’a fɔ ko Ala lo be duniɲa nin marala. Nka o be se ka kɛ cogo di? Duniɲa nin ɲagaminin lo kosɔbɛ! Dusukasi ni tɔɔrɔ koow ka ca. Banaw ni saya be yɔrɔ bɛɛ. Fantanya ni balawo koow fana ka ca. Nin bɛɛ be se ka kɛ kanutigi Ala nɔɔ ye cogo di?

I b’a fɛ k’o ɲiningaliw jaabiliw sɔrɔ wa? Mɔgɔ min be duniɲa nin marala, Bibulu be min fɔ o koo la, o be se ka bari i la!

Ladili minw be sɔrɔ sɛbɛ nin kɔnɔ, n’a sɔrɔ i y’a kɔrɔsi k’u bɔra Bibulu lo kɔnɔ. Jehova Seerew lanin b’a la kosɔbɛ ko ladili ɲumanw be sɔrɔ Bibulu kɔnɔ. O tɛ bari an na, sabu Bibulu “sɛbɛnna Ala yɛrɛ ka sebagaya barika la. Nafaba b’o la ka mɔgɔw kalan n’a ye, ani ka galon ban, ani ka mɔgɔw bila siraɲuman kan, k’u tilen.” (2 Timote 3:16, 17). Bibulu ye kitabu kɔrɔ ye, nka a bele be sanga la. A ka ɲi i k’a sɛgɛsɛgɛ koɲuman!