Vakasamataka mada na ituvaki qo: E taubale tiko ena bogi o David ina dua na koro. E sese vua na irairai ni vanua, e sega ni bau raica e dua na ka me vakatakila vua na vanua sa yaco tu kina. Sa qai vakasamataka o David ni sa rairai muri cala.

Na cava o na cakava ke o sotava na ituvaki ya?

Qo e vica na ka o rawa ni cakava:

1. Kere veivuke.

2. Vakayagataka na cina livaliva.

3. Taubale tiko ga, de dua o na qai yaco ga ena vanua o gole tiko kina.

E sega ni vakatutu vinaka sara na kena ikatolu.

E bau vinaka na ikarua ni vakatutu mai na kena imatai. Io, ena yaga na cina livaliva ena nomu ilakolako, ni o na raica toka kina na nomu gaunisala.

Ena yaga tale ga vei iko na iVolatabu!

Na ivola uasivi qo

• ena veidusimaki ni o sotava na leqa

• ena nomu iloilo mo dikevi iko kina, qai veisautaka nomu ivakarau ni bula

• ena veidusimaki ena ivakarau ni bula vinaka duadua

Nida se qai kila vosa ga, e dau levu noda taro.

• Na cava e karakarawa kina na lomalagi?

• E buli mai na cava na kalokalo?

Toso na gauna eda sa vakataroga na veika e yaco wavoliti keda.

• Na cava e yaco kina na veika ca?

• Na cava eda mate kina?

Vakacava ke sa tu makawa ena iVolatabu na isau ni taro qori?

Era kaya e levu ni ivola ga ni itukuni se italanoa makawa na iVolatabu, sa madra na kena itukutuku se dredre me kilai. Ia vakacava e veivakaleqai dina na ka e kaya na iVolatabu, se cala ga na ka era rogoca eso me baleta na iVolatabu?

Kena ivakaraitaki, era nanuma e levu ni tukuna na iVolatabu ni lewa tu na vuravura na Kalou. Ia ke dina qori, na cava sa qai torosobu ga kina na ituvaki kei vuravura? Na cava sa qai levu ga kina na mosi kei na rarawa, tauvimate kei na mate, dravudravua kei na leqa? E vakavuna dina na Kalou dauloloma na veika qori?

Vakacava o via kila na kena isau? O na kurabuitaka na ka e kaya na iVolatabu me baleti koya e lewa tu na vuravura!

De dua o sa raica ni yavutaki ena iVolatabu na ivakasala o wilika ena ivola qo. Era vakabauta na iVakadinadina i Jiova ni nuitaki na ivakasala ena iVolatabu. Era kila ni “vakavuna na Kalou . . . e yaga me veivakavulici, me veivunauci, me veivakadodonutaki.” (2 Timoci 3:16, 17) A se volai makawa sara na iVolatabu, ia e se yaga tiko ga nikua. E bibi gona mo dikeva na ka e tukuni kina.