TITIRAKI 10
E na Kangaa ni Buokai te Baibara?
TERA AE KO NA KARAOIA?
Iangoa te bwai ae riki aei: E rianna David n te kaawa ngke e a rangi n rotongitong. Ao ibukina bwa e a roo, e a aki kona ni kinai raoi taabo. E a ataia ae e a bua kawaina. Tao e a tia ni bwakee n te tabo teuana ae bure.
Ngke arona bwa David ngkoe, tera ae ko na karaoia?
TEEI MOA AO IANGO!
Aikai aanga tabeua:
-
Bubutii kairani kawaim.
-
Kabongana te tooti.
-
Teimatoa n rianna ao ni kantaningaia bwa tao e na bon reke kawaim.
E teretere bwa te anga ae C e na bon aki uaana.
E angaraoi riki B nakon are te moan. Irarikina, ko na bon uouota te tooti ni kaotaa iai kawaim ni karokoa rokom.
E kona ni buokiko te Baibara n aron anne!
E kona te boki aei ae bati riki nakoni booki nako ni
-
kairiko ribuakoni kangaangan te maiu
-
buokiko n ataa raoi arom ao ni karikiko bwa te aomata ae tamaroa riki
-
kaota nakoim aroni karekean te maiu ae te kabanea n tamaroa
A KAEKAAKI IAI TITIRAKI AIKA KAKAWAKI AIKA IREKEREKE MA TE MAIU AEI
Man te tai are ti kona n taetae iai, ti a bon tabeki naba titiraki.
-
E aera ngkai e buruu karawa?
-
A karaoaki man tera taian itoi?
Imwina riki ti tabeki titiraki ibukini baika riiriki n te aonnaba.
Ma tera arona ngkana a a kamani mena kaekaaia n te Baibara?
A bati aika a taku bwa e on te Baibara ni karaki nikawai aika karioaki ao otokaraki, ke e rangi ni kangaanga te ota iai. Ma te koaua bwa e kangaanga te ota n te Baibara ke bon anne ae a iangoia aomata ibukin te Baibara? Tiaki n ae tao a mwamwanaaki?
N te katoto, a iangoia aomata bwa e taku te Baibara bwa e tautaekana te aonnaba te Atua. Ma e na kangaa n riki anne? Ai boni mangaongaora te aonnaba aei! E a on n te maraki ma te rawawata, te aoraki ao te mate, te maiu ni kainnano ao kabuanibwai. E na kangaa ni bukinaki te Atua ae tatangira ni baikai ni kabane?
Ko kan ataa kaekaana? Ko bae ni kubanako n te bwai ae taekinaki n te Baibara bwa antai ae taua taekan te aonnaba!
Ko bae n noria ae a boto man te Baibara taeka n reirei aika n te boroutia aei. A kakoauaa raoi Ana Tia Kakoaua Iehova ae te Baibara bon nibwan te kairiri ae kona n onimakinaki. E riki anne ibukina bwa ‘e kairaki koreana iroun te Atua ao e manena ibukin te angareirei, ao ibukini boaan te aomata, ao ibukini kaetani bwaai.’ (2 Timoteo 3:16, 17) E ngae ngke te boki nikawai ma e kakabonganaaki n taai aikai, ngaia are ko bon riai n neneria!