Hi poristhiti polloi: David aplea ghaddier provas korta. To jea zagear pavla thoim soglench onvollkhi dista. Thoinche roste ani bhonvtonnchim ghoram polloun David-ak kolltta apunn dusreach kodden pavlo mhunn. Apunn sanddla mhunn taka khatri zata. To chukon dusreach rostean bhitor sorla.

David-achea zagear tum aslo zalear tum kitem korta aslo?

Tujea lagim zaite upai asat:

1. Vatter konnakui rosto vichar.

2. GPS vo Map-achi modot ghe.

3. Koso tori sarkea rostear pavtolo mhunn chintun ghaddi choloit rav.

Tisro upai vinchlear faideak poddot mhunn sangonk zaina.

Dusro upai poilea upai-a poros odik boro karonn, GPS vo Map provasachea survatek thaun xevott porian tuka vatt dakhoitolem.

Bible-ui tuka teach ritin adar korunk xokta!

Soglea pustokam poros, chodd vinklolem pustok Bible,

• tujea jivitachea koslea-i koxttank fuddo korunk tuka modot korunk xokta

• tujem unnemponn ani bore gunn zannam zaun, tuka ek boro munis zaunk adar diunk xokta

• sogleant borem jivit jieunk tuka adar diunk xokta

Ami ulounk lagtanch prosn vicharunk suru kortanv.

• Mollob nillem kiteak?

• Noketram khoinchean ailim?

Uprant ami sonvsarant kitem ghoddtta tea vixim prosn vicharunk suru kortat.

• Sonvsarant vaitt kiteak ghoddtta?

• Lok kiteak morta?

Bible-ant he prosnnanche zobab asat kai?

Zaite zann mhunnttat ki Bible-ant fokot munxamnim ghoddloleo kanneo asat, tem adlea tempachem pustok ani atam upkarona. Tem somzonk khub kotthin oxem tankam dista. Punn lok jem Bible-a vixim chint’tat, tem khorem kai? Vo tankam konnem-i chukichi mahiti dilea zait?

Udharonnak, lok somzota ho sonvsar Dev choloita, oxem Bible sangta mhunn. Punn hem koxem zaunk xokta? Hea sonvsarachi poristhiti munxachea hata bhair gel’li asa! Ho sonvsar dukh, duens, moronn, goribkai ani odruxttan bhorla. Ek mogall Dev hea soglea vaitt ghoddneank zobabdar koso zaunk xokta?

Hacho zobab tuka zannam zaunk zai? Sonvsar konnachea tabeant asa, hea vixim Bible kitem sangta tem aikolear tuka ojap distolem!

Hea pustokant dil’li mahiti Bible-acher adarit asa mhunn tunvem polloilam astolem. Jehovachea Sakxeank khatri zalea ki fokot Bible tankam sarkem margdorxon diunk xokta. Karonn Bible hem pustok, “Devachea preronnan boroilam; xikovnn diunk, chuki kaddun dakhounk, lokak nittaier haddunk, . . . tem upkarta.” (2 Timotak 3:16, 17) Bible adlem pustok, tor-ui tem amchea kallar upkarta! Tor tunvem tem topasun polloilear tukach faideak poddttolem.